Ağdamın planı təsdiqlənməmiş özəl tikinti şirkətləri “başladılar”... 1250 manat?..
Azad edilən ərazilərimizdə tikinti-quruculuq işlərinin həyata keçirilməsi, şübhəsiz ki, müsbət haldır. Bu gün Zəngilan rayonunun Ağalı kəndində həyatın geriyə qayıtması, insanlarımızın yaşaması çox müsbət hadisədir.
Mətbuatın yaydığı məlumata görə, Ağdamda özəl şirkət tərəfindən yeni çoxmənzilli bina – “novostroyka” tikintisinə başlanılıb.
Yerli medianın yazdığına görə, Ağdamın mərkəzində tikilən bina “Ağdam şəhərinin ilk müasir yaşayış kompleksi” kimi təqdim edilir. Fərqli memarlıq üslubu ilə 6 mərtəbədən ibarət binada mənzillər 30% ilkin ödənişlə 36-48 aylıq faizsiz kreditlə satılır. Mənzillərin kvadratmetri 1250 manatdır.
Tikintini “Parkhill” şirkətinin həyata keçirdiyi qeyd edilir. Tikinti şirkətindən Ağdamda yaşayış binasının tikintisini təsdiqləyiblər. Buradan bildirilib ki, “Park Qarabağ” adlanan kompleks şəhərin mərkəzində, məscidin yaxınlığında, gələcəkdə salınacaq Ağdam şəhəri mərkəzi parkının yaxınlığında inşa edilir. Eyni zamanda yeni tikilən bina yeni açılacağı gözlənilən Ağdam-Bərdə yolunun üstündə yerləşir.
Şirkətdən bildirilib ki, artıq burada bina tikintisinə icazə verilir. “Burada dövlətin və sahibkarların layihələri var”. Ağdamda inşa edilən binada mənzillərin qiymətinin belə bahalı - kvadratmetri 1250 manat olmasına gəlincə, şirkət nümayəndəsi buna zarafatla “Masazır deyil, Əhmədli deyil, Ağdamdır, o torpaqlar dəyərlidir” deyə bildirib.
Daha sonra isə bildirilib ki, Ağdamda tikilinin maya dəyəri yüksəkdir:“Beton-armaturun qiyməti artıb, Bakıda fəhlə günü 20 manata işləyirsə, orada 40 manata işləyir, armatur burada bazardan 100 manata gəlir, oraya isə 400 manata gedir. Demək olar, başa gəlmə qiymətinə satırıq” - deyə şirkətdən bildirilib.
Mətbuatda o qeyd edilir ki, Ağdam şəhərinin Baş Planı hələ təsdiqlənməyib. Baş Plan dövlət başçısına təqdim edilsə də, onun detalları ictimaiyyətə də açıqlanmır və bu zaman sənədin hələ Nazirlər Kabineti tərəfindən təsdiqlənmədiyi əsas gətirilir. Sözügedən layihə Şəhərsalma və Arxitektura Komitəsinin tikintilərin reyestrində də yerləşdirilməyib. Bunu da yerli media yazıb.
Qeyd edək ki, Ağdamın Baş Planı Prezident İlham Əliyevə 2021-ci il mayın 28-də təqdim edilib.
Ağdamda özəl tikinti şirkəti bina tikir və elan edir ki, mənzillərin kvadratmetri 1250 manatdır, bu nə deməkdir? Bu qiymət nəyə xidmət edir? Qiymət hansı səbəbdən belə baha ola bilər?
- “Bu şirkətlər bununla nə demək istəyir və özbaşına nə oyun çıxarırlar?”
Ekspert Elçin Bayramlı bizimlə söhbətində bildirdi ki, dünyada mənzillərin qiymətinə görə ən bahalı şəhər Bakıdır. Qiymətin bu şəkildə baha olmasını biabırçılıq adlandıran ekspert hesab edir ki, belı çıxır, regionlarda da qiymətlər bahadır: “Özü də hansı region ki, orada insan yaşamır. İnsan yaşayışının hələ ki, mümkün olmadığı xarabalıqların arasında tikilən binada belə mənzillərin Bakı qiymətinə satışa qoyulması heç bir məntiqə sığışmır. Bu qiymətlər hansı ölkənin əhalisi üçündür? Orta statistik azərbaycanlının praktik olaraq kvadratmetri 1250 manata ev alması mümkün deyil. Bu qiymətləri hardan çıxarırlar, necə təşkil edirilər anlamıram. Bu şəhərin baş planı hələ təsdiq edilməmiş hansı şirkət hansı yolla ora girib bina tikir və astronomik qiymətə mənzil təklif edir. O ərazidə yaşayanlar dövlət dəstəyi ilə, müəyyən güzəştlərlə ora qayıtmalıdırlar. Onlara ucuz qiymətə mənzil və torpaq sahəsi verilməlidir ki, o cür vəziyyətdə olan yerə insanlar qayıtmaqda maraqlı olsun. Birincisi, heç Bakıda camaat kvadratmetri 1250 manata mənzil almır, o da qala heç bir şəraiti olmayan şəhərdə o qiymətə mənzil ala. Bu şirkətlər bununla nə demək istəyir və özbaşına nə oyun çıxarırlar? Bu məsələyə ciddi nəzarət olmalıdır. Ümumiyyətlə, işğaldan azad edilmiş ərazilərdə güzəştli, sərfəli qiymətə mənzillərin tikintisi həyata keçirilməlidir. Bunun üçün tenderlər elan edilməlidir. Hansı şirkət evləri, binları daha sərfəli tikəcək, bunu necə əsaslandıracaq, əsas bu götürülməlidir. Bilirik ki, Bakıda astronomik dərəcədə bina tikintisi üçün rüşvət faktları var. Yəni binanın real qiymətinin iki qatı da qeyri-rəsmi xərclərə gedir deyə qiymətlər çox baha olur. Amma bu xərclər olmasa normalda mənzilin kvadratmetri 500-600 manat civarında olmalıdır. Ağdamda da əlavə xərclər var? Müxtəlif dövlət orqanları məgər azad olunmuş ərazilərdə bina tikən özəl şirkətlərdən “şirinlik” istəyir? Belədirsə, biz buna görə torpaqları azad etdik? Onda biz camaatı necə yerləşdiriləcək?
Azad ərazilərdə bərpa işləri, Böyük Qayıdışla bağlı çox ciddi strateji dövlət siyasəti aparılır. Dövlət o əraziləri qurub tikməyə çalışır, ümdə məqsəd tezliklə əhalimizi öz yurdlarına köçürməkdir”.
E.Bayramlı qeyd edir ki, özəl şirkətlərin belə davranışları dövlətin siyasətinə kölgə salmaqla yanaşı, həm də cəmiyyətdə haqlı narazılıq yaradır. O hesab edir ki, özəl tikinti şirkətləri nələrisə bəhanə gəturib qiymət artımına qaçmamalıdır, bu çox ziyanlı haldır: “Əgər özəl şirkətlərin məqsədi dövlətin Böyük Qayıdış siyasətinə dəstək verməkdirsə, onda 1250 manat nə deməkdir? Heç Avropa ölkələrində belə qiymət yoxdur. Bunu kimlər üçün tikib satırlar? Bu 300 manat maaş alan vətəndaşın büdcəsinə uyğun deyil. Hesab edirlər ki, vaxtilə Ağdamda yaşamış insanlar imkanlıdırlar və geri qayıdıb iki-üç otaqlı evi astronomik qiymətə, 100-150 minə alacaqdır. Onda niyə qayıtsın ki, Bakıda daha yaxşı şəraiti olan mənzil ala bilər. Yaxud da hansısa rayonda 30-40 minə ev alar. Bu kimi hallara son qoymalıdır, bu görülən işlərə kölgə salır”- deyə E.Bayramlı vurğuladı.
Leyla QARAXANLI
