Altay və Elgün qardaşdırlar. Lerik şəhərində əsl azərbaycanlı adət-ənənələri üzərində qərar tutan Mövlanovlar ailəsində dünyaya göz açıblar. Ailənin böyüyü Tahir kişi elinə bağlı, halal süfrəli dəyərli bir insandır. Ömrü boyu yaxşılıq edib, özü də yaxşılıq gözündə ucalıb. İkinci Qarabağ müharibəsi başlanan kimi Tahir kişinin dağ vüqarlı, dağ qürurlu oğlanların ikisi də əlinə silah alıb müharibənin ən qızğın yerində haqq savaşımıza atılırlar. Şiddətli döyüşlər zamanı hər iki qardaş sözün əsl mənasında erməni faşistlərinə qan uddurur, onların qəhrəmanlığı, mərdliyi əsgər yoldaşlarına da nümunə olur. Qardaşlar Vətən, millətin xoş gələcəyi naminə döyüşə-döyüşə şərəfli şəhidlik zirvəsinə ucalırlar. Fəqət, ömür yolları nə qədər qısa olsa da, millət üçün örnək olacaq bir tarix yazıb qoyurlar...
Qardaşlardan Altayın yaşının 22-ci ilinin tamamında Lerik camaatı müqəddəs saydıqları Tahir kişinin halal ocağına toplaşdı. Rayon İcra Hakimiyyəti başçısı Əkbər Abbasov, Yeni Azərbaycan Partiyası Lerik rayon təşkilatının sədri Malik Mirzəyev, hüquq-mühafizə orqanları, ictimaiyyət nümayəndələri, şəhid ailələri, Müharibə veteranları ilk öncə şəhid Altay və Elgün Mövlanov qardaşlarının adına inşa olunan bulaq kompleksini ziyarət etdilər. Sonra qəhrəmanların əziz xatirəsinə ehtiram əlaməti olaraq məzarlarına baş çəkdilər, onları tər gül dəstələrinə bürüdülər.
Tahir kişinin evində olan ziyarətçilər ailənin qayğı və problemləri ilə maraqlandı, qardaşların şərəfli döyüş yollardan danışdılar, onu da bildirdilər ki, bütöv bir xalqın qəhrəmanlıq simvoluna dönən qardaşlar heç zaman yaddaşlardan silinməyən xoş xatirələrdə yaşayacaqlar. Qəhrəmanlar atası Tahir kişi isə dedi: “Oğlanlarım həyatı dərk edən gündən Vətənə, onun daşına, torpağına ürəkdən bağlandılar. Mənə çətin olsa da, onların Vətən yolunda şəhid olması böyük bir xalqa baş ucalığı gətirdi... Onu da deyim ki, şəhid ailələrinə yüksək diqqət və qayğıya görə ölkə başçısı cənab İlham Əliyevdən, Birinci vitse-prezident Mehriban xanım Əliyevadan çox razıyam”.
2018-ci ildə Milli ordu sıralarında hərbi xidmətə başlayan Altay Tahir oğlu 2020-ci ilin aprel ayında ordudan tərxis olunur. Vətən sevgisi, Qarabağı düşmən tapdağından azad etmək istəyi onu yenidən ordu sıralarına qaytarır. Müddətdən Artıq Hərbi Xidmət Qulluqçusu kimi xidmətə başlayır. 2020-ci il sentyabrın 27-də başlanan Vətən müharibəsində 29 oktyabrda Füzuli uğrunda gedən döyüşlərdə şəhid olur. Ölümündən sonra "Vətən uğrunda", "Füzulinin azad olunmasına görə" medalları ilə təltif edilir.
Zəfər ORUCOĞLU Azərbaycan Jurnalistlər Birliyinin üzvü
