Hazırda ölkəmizdə dövlət bağçaları ilə yanaşı özəl bağçalar da fəaliyyət göstərir. Dövlət bağçalarında aylıq qiymətlər 30-60 manat arasında dəyişir. Bu məbləğə saat 08:00-dan 18:00 kimi uşağın bağçada qalması, 3 dəfə qidalanma və müxtəlif məşğələlər daxildir. Amma məşğələlərin uşağınız tərəfindən yaxşı qavranılması üçün, daha dəqiq desək, yaxşı öyrədilməsi üçün əlavə 10-15 manat da ödəməli olacaqsız.
Ölkəmizdə dövlət bağçaları ilə yanaşı özəl bağçalar da fəaliyyət göstərir ki, bu növ biznes əməlli-başlı gəlirli sahələrdən biri hesab olunur.
Fərdi sahibkarlar tərəfindən açılan bağçalar belə dövlət müəssisələri ilə müqayisədə 15-20 dəfə bahadır. Belə ki, bu tip bağçalarda ödəniş 250-dən 12 min manata kimidir. Balacaları bu tip təhsil mərkəzlərinə nəinki aylıq, həmçinin gündəlik də qoymaq olar. Onu da qeyd edək ki, dövlət və ya özəl bağçalarda uşaqlar üçün eyni proqram müəyyən olunub. Maraqlıdır, özəl bağçalarda qiymətin yüksək olması nə ilə bağlıdır?
“Sehirli Dayə" uşaq bağçasında endirimsiz real aylıq qiymətlər 400, endirimlə isə 360 manatdır.
"Baby Plaza" bağçasında hazırda aylıq ödəniş 650 manatdır. Burada uşaqlara gündə 5 dəfə yemək verilir. Bildirildi ki, bağçada tədris azərbaycan, rus və ingilis dilində aparılır: “Uşaqların gündəlik fəaliyyətlərinə musiqi, rəqs, gimnastika və idman dərsləri daxildir. Uşaqlar gün ərzində 5 dəfə qida ilə təmin olunur”.
Fin təhsil proqramını tədris edən "XXI Əsr Məktəbi"ndə isə illik qiymətlər bölmədən asılı olmayaraq 7 min manatdır. Səhər 08:30-dan axşam 18:00-dək fəaliyyət göstərən bağçanın aylıq ödənişinə günlük 3 dəfə qidalanma, bir dəfə meyvə saatı, rəsm, musiqi, gimnastika daxildir. Azərbaycan və rus bölməsində olan uşaqlara həftədə 3 dəfə xarici dil olaraq ingilis dili tədris edilir. İngilis dili bölməsində isə tədris ancaq ingilis dilindədir.
"Baku Oxford School"da isə 3 yaşdan məktəbəqədər qruplarda ödəniş illik 8 min manatdır.
"Baby on board" uşaq bağçasında səhər 08:00-dan axşam 18:00-dək aylıq 400 manat ödəniş tələb olunur. Burada həmçinin türk və rus dilində bölmələr fəaliyyət göstərir. Aylıq qiymətə 5 dəfə qidalanma, şahmat, ingilis dili, gimnastika daxildir.
“Uşaq baxıcılığı sahəsində təcrübəsi olmayan insanlar uşaq bağçaları açır, onların fəaliyyəti uşaqlara xidmət deyil, biznesdir”
Iqtisadçı Kamran Məmmədli qeyd etdi ki, özəl bağçalarda qiymətlər sadə insanlar üçün əlçatan deyil: “Mən heç də bu fikirlə razı deyiləm ki, özəl bağçalarda xidmət səviyyəsi daha yaxşıdır. Dövlət bağçalarında uzun illər çalışmış təcrübəli kadrlar var. Özəl bağçalar isə çox az resurslarla daha çox uşağa xidmət etmək istəyirlər. Buna görə də problem ondan ibarətdir ki, bizdə məktəbəqədər təhsilə cəlb olunan uşaqların sayı çox azdır və bu da dövlət bağçalarında olan sıxlıq səbəbindəndir. Digər tərəfdən, bölgələrdən Bakıya kütləvi şəkildə axın var, bu da bağçalara tələbatı artırır”.
Həmsöhbətimiz onu da əlavə etdi ki, uşaq baxıcılığı sahəsində təcrübəsi olmayan insanlar uşaq bağçaları açır. Onların fəaliyyəti isə uşaqlara xidmət deyil, biznesdir: “Ölkədəki minimum əməkhaqlarını və orta gəlir səviyyəsini nəzərə alsaq, özəl bağçaların qiyməti olduqca bahadır. Nəzərə alsaq ki, bu gün Azərbaycanda əhalinin tələbatı çox böyükdür, bu qiymətlər əksər insanlar üçün əlçatan deyil. Rəsmi statistikaya görə, Azərbaycanda məktəbəqədər təhsillə təmin olunan uşaqların sayı 25 faizdən yuxarı deyil. Ona görə də, daha çox bağçalara tələbat var. Özəl bağçalar da bundan istifadə edir və biz bu qiymətləri adekvat hesab etmirik. Bu qiymətlərin nisbətən yumşaldılması üçün özəl uşaq bağçalarına dəstək konsepsiyası olmalıdır”.
Günel CƏLİLOVA
