İyulda ünvanlı sosial yardımın məbləği artıb. Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondundan verilən məlumata görə, 2022-ci ilin iyul ayında orta hesabla 1 ailəyə ödənilən ÜDSY-nin məbləği artaraq, 260,2 manatdan 360,0 manata çatıb.
Bildirilib ki, bu da ötən ilin müvafiq dövrü ilə müqayisədə 38,3% artım deməkdir.
“Ünvanlı sosial yardımın məbləğinin təxminən 40 faizə qədər artması müsbətdir”
Tanınmış ekspert Elçin Bayramlı “Bakı-Xəbər”ə bildirdi ki, bu addım da dövlətin sosial siyasətinin davamlı xarakter aldığının göstəricisidir. “Azərbaycan dövlətinin sosial siyasətinin əsasında vətəndaşın rifahının yüksəldilməsi dayanır. Dövlət vətəndaşlara hər zaman dayaq durur və öz dəstəyini ifadə etmək üçün müxtəlif layihələr həyata keçirir. Ünvanlı sosial yardım proqramı da əhalinin aztəminatlı ailələrinin sosial-rifah halının yaxşılaşdırılmasına yönəlib. Bu yardımın məbləğinin təxminən 40 faizə qədər artması müsbətdir. Amma bahalaşma daha yüksək faizdədir. Yəni bu artımı bahalaşma artıq iki dəfə “yeyib”. İndiki bahalığa görə ailəbaşına ödənilən 360 manat çox azdır”.
E.Bayramlı qeyd etdi ki, bu sahədə problemlər də yox deyil. O bildirdi ki, ünvanlı sosial yardım proqramının genişlənməsinə və məbləğinin xeyli dərəcədə artırılmasına ehtiyac var. Ekspert ümid edir ki, yaxın gələcəkdə hökumət bu məsələyə baxacaq. E.Bayramlı hesab edir ki, ünvanlı sosial yardım proqramı əhalinin heç 30 fazini əhatə etmir. Onun sözlərinə görə, elə ailələr var ki, aylıq gəlirləri adam başına 200 manatdan aşağıdır, amma müxtəlif bəhanələrlə onlara bu yardım verilmir. Onun qeyd etdiyinə görə, nazirlik ünvanlı sosial yardımı daha çox ehtiyacı olanlara verməlidir. “Elə ciddi ehtiyacı olan ailələr var ki, ünvanlı sosial yardım ala bilmir, nədir ki, həyətində 70 ildən qalmış köhnə bir avtomobil var, yaxud torpaq sahəsi var. Belə olmaz. Dərindən araşdırsaq görərik ki, ünvanlı sosial yardım alanların içində çoxlu sayda imkanı olan şəxslər, ailələr var. Bununla bağlı çoxlu faktlar var və biz tez-tez bu barədə məlumatlarla sosial şəbəkələrdə, mətbuatda rastlaşırıq. Mənə elə gəlir ki, ünvanlı sosial yardımın verilməsi məsələsi elə də ədalətli həyata keçirilmir, bu tələblərə cavab verən ailələrin çoxu onu ala bilmir. Yaxşı olardı ki, ölkə üzrə adambaşına gəliri 200 manatdan aşağı düşən ailələrə bu pul kompensasiya olsun. Yəni beş nəfərlik bir ailəyə 1000 manat daxil olmursa bu artıq ifrat yoxsul sayılır. Mən statistikalara da etibar etmirəm. Müşahidələr göstərir ki, nadir ailələrdə gəlir 1000 manat olur, yaxud 1000 manatı keçir. Bu baxımdan, ünvanlı sosial yardımın əhatə dairəsini artırmaq lazımdır. Həqiqətən bu tələblərə cavab verən bütün ailələr əhatə olunmalıdır. Ya da ki, onlar işlə təmin edilməlidir…”-deyə mütəxəssis qeyd etdi.
İradə SARIYEVA
