Dörd ildən bir keçirilən beynəlxalq idman tədbiri İslam Həmrəylik Oyunlarında İslam Əməkdaşlıq Təşkilatına üzv olan ölkələrin idmançıları iştirak edir. Məlumat üçün qeyd edək ki, ilk dəfə bu oyunlar Səudiyyə Ərəbistanında keçirilib və bu yarışda İslam Konfransı Təşkilatının 57 üzvü iştirak edir. Yarış dördüncü dəfə 2017-ci ildə Bakıda keçirildi.
Xatırladaq ki, “Bakı-2017” IV İslam Həmrəyliyi Oyunlarına hazırlıq yüksək səviyyədə idi. İslam Həmrəyliyi Oyunlarında 57 ölkə iştirak edirdi ki, bu da rekord göstərici idi. Oyunlarda, ümumilikdə 8 minə qədər könüllü iştirak edirdi. Aprelin 5-də start götürən "Bakı-2017" IV İslam Həmrəyliyi Oyunlarının Xəzərdən başlayan su səyahəti Naxçıvanda, sonra Azərbaycanın digər 14 şəhərində də davam etdirildi.
Bu oyunlar Azərbaycanda təkcə idman yarışması kimi deyil, eyni zamanda, xalqlar arasında əlaqələrin və dialoqun təşviqi platforması kimi də tarixə düşdü. Əsas şüarı "Həmrəylik bizim gücümüzdür" olan oyunlar idman yarışması olsa da, müasir dünyada müxtəlif xalqları bir araya gətirərək, onlar arasında birlik və həmrəyliyin güclənməsində rol oynadı. Xatırladaq ki, Bakıda İslam Həmrəyliyi oyunları keçirilən zaman bəzi qara düşüncəli şəxslər bu oyunun mənasız olduğunu və Azərbaycandan başqa bir ölkədə keçirilməyəcəyini iddia etmişdirlər. Ancaq o deyilən sözlər elə söz olaraq qaldı.
Bildiyimiz kimi, bu il avqustun 9-da Türkiyənin Konya şəhərində V İslam Həmrəyliyi Oyunlarının təntənəli açılış mərasimi oldu.
“Bu yarış gələcəkdə digər İslam ölkələrində də keçiriləcək”
Millət vəkili Musa Quliyev “Bakı-Xəbər”ə açıqlamasında qeyd etdi ki, İslam Həmrəyliyi Oyunlarının keçirilməsi tək İslam dünyasının deyil, dünyanın bütün sülhpərvər, sağlam münasibətlər arzulayan bəşəriyyət üçün çox vacib hadisədir. Qardaş ölkədə keçirilən İslam Həmrəyliyi Oyunları yüksək səviyyədə təşkil olunub: “Həmin yarışda Azərbaycan böyük heyətlə iştirak edir. Hətta Prezident İlham Əliyev və vitse-prezident Mehriban Əliyeva da həmin yarışı izləmək üçün Konyaya gedib. Azərbaycan nümayəndə heyətinin Türkiyədə yüksək səviyyədə qarşılanması qardaş ölkə ilə münasibətlərin dünyaya bir ifadə formasıdır. Eyni zamanda, İslam ölkələrinin də sülhpərvər, həmrəyliyə açıq ölkələr olduğu bu yarış vasitəsilə dünyaya bəlli olur”.
Həmsöhbətimiz hesab edir ki, İslam Həmrəyliyi Oyunları idmanın inkişafına da xüsusi töhfə verəcək, çünki hər oyun zamanı yeni idmançılar kəşf olunur.
Millət vəkili onu da əlavə etdi ki, 2017-ci ildə Bakıda İslam Həmrəyliyi Oyunları Azərbaycanda keçirilən zaman bir sıra şəxslər bu yarışın mahiyyətini bilmədən nə gəldi danışırdılar: “Hətta ölkəmizdə keçirilən zaman bu yarışın bir daha keçirilməyəcəyi ilə bağlı fikir bildirənlər də var idi. Ancaq bu gün İslam Həmrəyliyi Oyunlarının qardaş ölkədə keçirilməsi həmin qara düşüncəli insanların yanlış fikirdə olduğunu bir daha göstərdi. Bu yarış gələcəkdə digər İslam ölkələrində də keçiriləcək. İslam Həmrəyliyi Oyunları “Həmrəylik bizim gücümüzdür” şüarı altında keçirilir.
Millət vəkilinin sözlərinə görə, dünyanın idman ictimaiyyətinin diqqətini çəkən Azərbaycanda - paytaxt Bakıda irimiqyaslı yarışlar yüksək səviyyədə təşkil olunur. Artıq Azərbaycan bu sahədə zəngin təcrübəyə malikdir. "Bakı - 2015" ilk Avropa Oyunlarında olduğu kimi, sülh, əminamanlıq və sabitlik ölkəsi olan Azərbaycanda "IV İslam Həmrəyliyi Oyunları"ı da idman tarixinə yeni səhifə yazdı.
Günel CƏLİLOVA
