Məlum olduğu kimi, müəllimlərin işə qəbulu müsabiqəsinin vakansiya seçimi mərhələsi artıq yekunlaşıb. Bütün fənlər üzrə 40 və daha yüksək bal toplamış namizədlər şəxsi səhifələrinə daxil olaraq vakansiya seçimində iştirak ediblər.
Qeyd edək ki, namizəd seçdiyi vakant yerə yerləşdikdən sonra həmin yerdən imtina edərsə, müsabiqənin növbəti vakansiya seçimlərində iştirakı təmin olunmayacaq.
Müəllimlərin işə qəbulu müsabiqəsinin vakansiya seçimi ilə bağlı narazılıqlar var. İddia olunur ki, müəllimlərin işə qəbulunun (MİQ) elektron qaydada həyata keçirildiyi miq.edu.az portalı vakansiya seçimi ərəfəsində gecə saatlarında çöküb. Bildirilir ki, bununla kimlərsə öz namizədlərini daha uyğun yerlərə yerləşdirməyə çalışıblar.
Onu da bildirək ki, bu il 55 minə yaxın namizəd müəllumlərin işə qəbul imtahanında iştirak edib. Ancaq bu qədər iddiaçıya qarşı təxminən 5 min vakansiya olacaq.
Ekspertlər bildirir ki, vakansiya yerləri gizlədilir. İmtahanda təxminən 50-60 min müəllim iştirak edir. Vakant yerlər isə 8-9 min olur: “Təəssüf ki, vakant yerlər direktorlar, yaxud da müvafiq aidiyyəti şəxslər tərəfindən gizlədilir. Həmçinin direktorlar vakant yerləri rüşvət müqabilində kiməsə satırlar”.
Mütəxəssislərin fikrincə, bu sahədə yaşanan problemlərə son qoymaq üçün ölkədəki bütün məktəblərdə monitorinqlər keçirilməlidir. İddia olunur ki, vakansiyaların gizlədilməsində daha çox məktəb direktorları və təhsil şöbələrinin rəhbərləri maraqlıdır.
Elm və Təhsil Nazirliyi: “Yüklənmə nəticəsində yaranan problem dərhal aradan qaldırılıb”
Məsələ ilə bağlı Elm və Təhsil Nazirliyindən bildirildi ki, avqustun 4-dən başlanılan vakansiya seçimi avqustun 8-i saat 11:00-da yekunlaşıb: “Namizədlərin həmin gün saat 00:00-dan sonra miq.edu.az-da daha aktiv olması və serverlərdə müvafiq işlərin aparılması sistemdə yüklənməyə səbəb olub. Yüklənmə nəticəsində yaranan problem dərhal aradan qaldırılıb. Vətəndaşların müraciətlərində heç bir dəyişiklik faktı qeydə alınmayıb. Bununla yanaşı, vakansiya seçimi prosesi üçün namizədlərə əlavə 3 saat vaxt verilib".
Kamran Əsədov: “Bunu müqavilə əsasında hansısa müəllimlərə həvalə edirlər, burada birmənalı şəkildə proses bazara döndərilib”
Təhsil məsələləri üzrə ekspert Kamran Əsədov bildirdi ki, Azərbaycanda müəllimlərin işə qəbulu prosesi 2009-cu ildən etibarən şəffaf keçirilib. Onun sözlərinə görə, son iki il ərzində müəllimlərin işə qəbulunda ciddi problemlər ortaya çıxıb: "Bu, suallarla bağlıdır, texniki problemləri də biz müşahidə edirik. Bütün bunlar onu göstərir ki, ora ciddi şəkildə kənar müdaxilə var. Məsələn, burada sualları yazan şəxslər birbaşa imtahan təşkilində iştirak edirlər. Elm və Təhsil Nazirliyi özü imtahanları birbaşa keçirə bilmir, əvəzində bunu müqavilə əsasında hansısa müəllimlərə həvalə edirlər. Burada birmənalı şəkildə proses bazara döndərilib. Neqativ proseslərin qarşısını almaq üçün müəllimlərin işə qəbulunu Dövlət İmtahan Mərkəzinə (DİM) həvalə etmək lazımdır”.
Günel CƏLİLOVA
