Daştatük Lənkəran rayonun ucqar kəndi olsa da, təbiətin füsunkar guşəsində qərar tutub. Dörd tərəfi meşəlik olan kənddə 250-yə yaxın təsərrüfat var. Ölkəmizdə gedən quruculuq işləri, hər yerdə olduğu ki, buranın əhalisini də çox sevindirir. Qədim tarixə malik daştatüklülər əzəldən halal zəhmətlə gün-güzəran keçirir, dövlətinin gücünə, onun rəhbərinə ürəkdən inanır və bundan sonrakı xoş gələcəyini onu adı ilə bağlayırlar. Şanlı qələbəmizlə başa çatan 44 günlük Vətən müharibəsində bu kənd bir şəhid verib.
Daştatükdə bir sıra sosial problemlər qalmaqdadır. “Mavi” qazın yoxluğu son illər burada yaşayan əhalini daha çox əziyyətə salır. Artıq yanacaq qıtlığı üzündən get-gedə evləri isitmək əhaliyə çətinlik yaradır. Belə ki, əvvəllər yanacaq odunu meşələrin hesabına tədarük olunurdu. Meşələr tükəndiyinə görə onlara əhali tərəfində giriş qadağan olunub. Odunun qiyməti də beş qat bahalaşıb. İndi bu yaşayış məntəqəsinə qazın çəkilişi olduqca vacibdir.
Onu da bildirim ki, uzun illərdir Daştatük kəndinə qazın verilməsi söz olaraq qalır. Bu işin həlli ildən-ilə yubadılır. Ölkə başçısı isə daha çox ehtiyac duyulan yerlərə qaz çəkilişini əsas məsələ hesab edir. Daştatük də ucqar ərazidə yerləşdiyi üçün buranın soyuq günlər çox olur. Sakinlər deyirlər ki, keçən il oktyabrın 21 də “Azəriqaz” İB kəndimizdə “Açıq mikrofon” aksiyası keçirdi. Elə həmin ayın 28-də bizə zəng edərək dedilər narahat olmayın, sizin kəndi 2022-ci ilin planına saldıq. Qaldı ki, indiyə qədər heç bir iş görülməyib. Qarşıdan yağışlı, qarlı günlər gəlir. Görünür yenə də bizi aldadırlar. İndi ümidimiz yalnız ölkə rəhbərinə qalıb. Onun qayğısı bizi soyuq qış aylarında donmaqdan qoruyar. Artıq yalançı səlahiyyət sahiblərinə heç inam yoxdur...
Zəfər ORUCOĞLU Azərbaycan Jurnalistlər Birliyinin üzvü
