Şəhid ailələrinə və veteranlara Mərkəzləşdirilmiş Reyestr dəstəyi - geniş sosial paketlərdən sonra bu da gəldi…

Fatimə Hacıbəyli: “Reyestrin yaradılması süründürməçiliyin, narazılığın qarşısını alacaq”

img

Azərbaycan Respublikası Nazirlər Kabinetinin Qərarları ilə “Şəhid və şəhid ailəsi statusu almış şəxslərin reyestrinin aparılması Qaydası” və “Müharibə veteranlarının reyestrinin aparılması Qaydası” təsdiq edilib. Qərarlar Azərbaycan Prezidentinin 2021-ci il 17 iyun tarixli Fərmanlarının icrasının təmin edilməsi məqsədilə qəbul edilib.

Yeni qaydalara əsasən, Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sistemində müharibə veteranlarının, şəhid və şəhid ailəsi statusu almış şəxslərin reyestrləri elektron formada aparılacaq.

Reyestrin əsas təyinatı şəhidlər, şəhid ailəsi üzvləri, müharibə əlilləri və veteranları barədə vahid informasiya bazasının yaradılması, onlarla əlaqədar müvafiq məlumatların toplanılması, işlənməsi, saxlanılması və axtarışının avtomatlaşdırılmasıdır.

Maraqlıdır, mərkəzləşdirilmiş reyestrin yaradılması bu sahədə yaşanan problemlərə necə təsir edəcək?

  • “…vətəndaşların müraciətlərində bir çox problemlərin həll edilməsi və prosesin nizamlanmasına səbəb olacaq”

“Vəfa” Sosial İctimai Birliyinin sədri Fatimə Hacıbəyli qeyd etdi ki, şəhid ailələrinin, müharibə əlillərinin problemlərinin həlli, onların mənzil-məişət şəraitinin yaxşılaşdırılması Azərbaycanda dövlət siyasətinin mühüm tərkib hissəsidir. Bu qəbildən olan vətəndaşlarımızın sosial müdafiəsinin möhkəmləndirilməsi, o cümlədən mənzil, fərdi ev və avtomobillərlə təmin edilməsi istiqamətində həyata keçirilən kompleks tədbirlər bunun bariz nümunəsidir: “Reyestrin tərtib olunması vətəndaşların müraciətlərində bir çox problemlərin həll edilməsi və prosesin nizamlanması üçün təqdirəlayiq haldır. Məlumdur ki, əvvəllər sosial müavinətlə bağlı müxtəlif qurumlara müraciət edilirdi, vətəndaşlar əziyyət çəkirdi. Ancaq indi  operativ şəkildə bütün müraciətlər bir yerdə cəmlənir və hər bir şəxs özü haqqında və yaxud şəhid, şəhid ailəsinin üzvləri, veteranlar və döyüşlərdə yaralanan şəxslər haqqında məlumatlar əldə etmək mümkün olacaq. Bu, prosedurların sadələşdirməsi deməkdir. Ümumiyyətlə, reyestrin yaradılması süründürməçiliyin, narazılığın qarşısını alacaq”.

Günel CƏLİLOVA

Peşə etikası

Son xəbərlər