Kolleclərdən universitetlərə asan qəbul fəsadlar verməyə başlayıb...

Elçin Əfəndi: “Müsabiqədən keçmədən universitetə qəbul üçün asan yol tapıblar”

img

Nazirlər Kabinetinin 2019-cu ildə Təhsil Haqqında Qanuna etdiyi dəyişikliyə əsasən kollec məzunları və ya subbakalavrlar bundan sonra hər il bitirdikləri ixtisaslara uyğun imtahansız ali təhsil almaq üçün sənəd verə bilərlər.

Orta ixtisas təhsili müəssisələrinin məzunları əgər diplomlarında subbakalavr sözü varsa, ixtisasları üzrə müsabiqədən kənar, yəni imtahan vermədən ali təhsil müəssisələrinə qəbul ola bilərlər. Lakin bütün kollec məzunları deyil, daha çox 2010-ci ildən sonra kolleci bitirmiş və diplomunda subbakalavr sözü olanlar bu qərardan yaralana bilərlər.

Qeyd edək ki, son zamanlar kolleclərə üz tutanların sayında artım müşahidə olunur. Həqiqətən də, müşahidələrdən görürük ki, subbakalavrların universitetlərə axını güclənib. Kolleci bitirənlər imtahan vermədən universitetə qəbul olurlar. Bəziləri sırf universitetlərə rahat yol almaq üçün bunu edir.

  • “Ayrılan plan yerini nəzərə alsaq görərik ki, 31 mindən çox şəxs kənarda qalacaq, müsabiqədən keçməyəcək”

Təhsil eksperti Elçin Əfəndi bildirdi ki, bəziləri müvafiq ödəniş qarşılığında ümumi orta qiymətlərini yüksək yazdırırlar: “Nazirlər Kabinetinin müvafiq qərarına görə, orta ixtisas müəssisəsini bitirənlər subbakalavr kimi ali məktəbə qəbul ola bilərlər. Bunun nəticəsində də subbakalavr dərəcəsində olan şəxslər artıq bir-iki ildir ki, imtahan vermədən asanlıqla ali təhsil müəssisələrinə qəbul ola bilirlər. Bəzi şəxslər təhsil aldıqları dövrdə akademik göstəriciləri yüksək olmadıqda müvafiq ödəniş qarşılığında ümumi orta qiymətləri yüksək yazdırırlar. Sırf ali məktəbə qəbul üçün bunu edirlər”.

Ekspert hesab edir ki, gələcəkdə ixtisaslı kadr çatışmazlığı yaşana bilər: “Qaydalarda dəyişiklik etmək vacib və zəruridir. Biz həm 9, həm də 11 illik səviyyədə kolleclərə qəbul olmaq istəyənlərin say çoxluğunu görürük. Bu il 41 mindən çox şagird orta ixtisas təhsili müəssisəsində təhsil almaq üçün elektron qeydiyyatdan keçib. Ayrılan plan yerini nəzərə alsaq görərik ki, 31 mindən çox şəxs kənarda qalacaq. Müsabiqədən keçməyəcək. Universitetə qəbul üçün asan yol tapıblar”.

Günel CƏLİLOVA

Peşə etikası

Son xəbərlər