Bakıda skuterlər avtomobil kimi çoxalır, təhlükə də artır - çıxış yolları…

Elxan Əliyev: “Bəziləri şou göstərmək üçün istifadə edir, skuterləri düzgün istifadə etməmələri narahatlıq doğurur”

img

Paytaxt ərazisində elektroskuter sürənlərin sayı artıb. Hətta skuterlər şəhəri cənginə alıb desək, yanılmarıq. Sürətlə parkda, yollarda hərəkət edən bu nəqliyyat vasitəsi təhlükə yaradır. Bu günlərdə bulvarda skuterlə "avtoşluq" edən bir şəxs balaca uşağı vurdu, nəticədə həmin uşağın ayağı qırıldı. Qeyd edək ki, skuterlərin iştirakı ilə bu tip qəzaların sayı günü-gündən artır.

Onu da bildirək ki, bu cihazdan istifadə edərkən təhlükəsizlik qaydalarına riayət edilmir.

Maraqlıdır, skuterlərin hərəkəti necə tənzimlənir? Skuterlərin harda hərəkət etməsi ilə bağlı müəyyən məhdudiyyətlər varmı?

  • “Paytaxtda skuterlərə görə infrastruktur qurulmayıb, onlar üçün parklarda xüsusi zolaqlar ayrılmalıdır ki…”

Sosial sahə üzrə ekspert Elxan Əliyev qeyd etdi ki, elektroskuterlərin fəaliyyəti ilə bağlı narahatlıq doğuran hallar var. Son vaxtlar vətəndaşların daha çox maraq göstərdiyi ekoloji təmiz nəqliyyat növlərindən biri olsa da, çox təəssüf ki, insanlar onu düzgün istifadə etmək əvəzinə sanki bir təhlükə mənbəyinə çeviriblər: “Ümumiyyətlə, hər bir nəqliyyat vasitəsi öz təyinatına uyğun istifadə olunmalıdır. Skuterlərin də təyinatı sadəcə insanları rahat şəkildə bir nöqtədən digərinə çatdrımaq üçün nəzərdə tutulub. Təəssüflər olsun ki, bəziləri bunu şou göstərmək üçün istifadə edir. Skuterlərin düzgün istifadə etməmələri narahatlıq doğurur. Sanki ölümə gedərcəsinə avtomobillərin arasına girirlər. Onların əksəriyyəti də gənclərdir və adrenalin çıxarmağa çalışırlar. Bu istiqamətdə ciddi işlər görülməli və onların da normal hərəkəti üçün şərait yaradılmalıdır. Məsələn, velosiped yolları üçün xüsusi yollar ayrılır və gələcəkdə onları yönləndirməliyik ki, bu yollardan istifadə edə bilsinlər. Rahat və təhlükəsiz imkanlar yaratmaq olar”.

Həmsöhbətimiz onu da əlavə etdi ki, insanlar daha çox bu nəqliyyat növünə meyllənirlər. Təəssüf ki, paytaxtda skuterlərə görə infrastruktur qurulmayıb. Onlar üçün parklarda xüsusi zolaqlar ayrılmalıdır ki, xüsusi velosiped zolaqlarında hərəkət etsinlər. Hazırda paytaxtda velosiped sürənlər üçün ayrılmış zolaqların şəbəkələrinin artırılması davam edir. Həmin ərazidə moped, skuter istifadəçilərinin hərəkət etmələri üçün də şərait yaradılmalıdır: “Qanunvericilikdə hələ də skuter istifadəçiləri piyada kimi göstərilirlər.  Dəyişiklik etməyə ehtiyac var. Bu, həm də hərəkət iştirakçılarının prioritetinə təsir edəcək bir məsələ olacaq. Bəzi sürücülər avtomobildən imtina edib, bu nəqliyyat vasitəsindən istifadə edəcəklər. Bu da yollardakı tıxacların azalmasına təsir edəcək”.

Günel CƏLİLOVA

Peşə etikası

Son xəbərlər