Azərbaycanda vətəndaş cəmiyyətinin davamlı inkişafı, QHT-lərin fəaliyyətinin genişlənməsi məqsədilə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən ilk dəfə olaraq Mingəçevir şəhərində “QHT-lərin 1-ci İnkişaf və Mübadilə proqramı” təşkil edildi. Bu proqram çərçivəsində QHT nümayəndələrinə “Qərar qəbul etmək üçün məlumatların toplanması və təhlili”, “Layihənin icra strategiyası hazırlanması”, “Dataların yığılması və təhlili, “Logframe - Məntiqi çərçivənin hazırlanması və dizaynı” və digər mövzularda təlimlər keçirildi, beynəlxalq təcrübə ilə tanış olmaq imkanları yaradıldı, nəzəri biliklər haqqında geniş məlumatlar verildi. Bu təlim ölkəmizdə QHT sektorunun inkişafına böyük dəstək oldu. Bunu yaxın gələcəkdə daha aydın görə biləcəyik. Eyni zamanda bu təlimdə QHT-lərə beynəlxalq əməkdaşlığın istiqamətləri də öyrədildi.
Xatırladım ki, Azərbaycanda müasir qeyri-hökumət təşkilatı (QHT) sektorunun yaradılması 1980-ci illərin sonlarında başlamışdır. Sovet İmperiyasının təqibindən ehtiyat edən insanlar gizlicə bu fəaliyyətə qoşulur, daha sonra ətraflarındakı eyni düşüncəli insanları cəlb etməyə başlayırdılar. Yəni illər öncə bu fəaliyyətlə insanlar gizli məşğul olurdusa, bu gün QHT-lərin fəaliyyətinə, bilik və bacarığının artırılmasına həm maddi həm mənəvi olaraq dövlət özü birbaşa dəstək verir. Dövlət QHT-lərin inkişafı üçün kifayət qədər diqqət ayırır. Bu təlim də QHT-lərin inkişafına böyük dəstək verən bir proqram idi. Bu gün əminliklə deyə bilərik ki, bütün istiqamətlərdə vətəndaş cəmiyyəti üzərində tam mənada dövlət qayğısı mövcuddur. Qeyri-Hökümət Təşkilatlarına Dövlət Dəstəyi Agentliyinin QHT-lərlə qarşılıqlı əməkdaşlığı bu sektora tam rahat və səmərli fəaliyyət göstərmək üçün münbit şərait yaratmışdır. QHT Agentliyi az müddətdə böyük işlərə, böyük uğurlara imza atıb. Mingəçevirdə təşkil olunan “QHT-lərin 1-ci İnkişaf və Mübadilə proqramı” bunun bariz nümunəsidir. Daha professional layihə yazılışı metodlarını öyrənmələri və müasir metodlarla tanış olmaları məqsədilə üç gün müddətində 100 nəfərdən artıq QHT nümayəndəsi üçün Mingəçevir şəhərində təlim təşkil edən, QHT-ləri ən yüksək səviyyədə həmin şəhərdə qonaq edən bir quruma ayaq üstə alqış düşür. Ölkəmizdə ikinci belə bir qurum yoxdur ki, əməkdaşlıq etdiyi şəxslərə bu cür diqqət, qayğı, həssaslıqla yanaşsın. QHT Agentliyi vətəndaş cəmiyyətinin heyran olduğu bir qurumdur.
Hazırda QHT-lər ölkədə həyata keçirilən böyük layihələrə töhfələr verməklə ölkənin siyasi və sosial-iqtisadi həyatında fəal rol oynayırlar. Bu gün QHT-lər Azərbaycanın hüquqi və sosial-iqtisadi inkişafına cəlb olunur. Əsasən ölkədə vətəndaş cəmiyyətinin formalaşdırılması, demokratik və hüquqi dövlətin qurulması, Azərbaycanın qlobal məsələlərə inteqrasiyası, insan hüquqlarının, sosial-iqtisadi və milli-mənəvi dəyərlərin qorunması və digər məsələlərin həllinə kömək edir. QHT-lər həmçinin Azərbaycanın dünya birliyinə inteqrasiyası və Azərbaycanın ərazi bütövlüyünün bərpasını və suverenliyini dəstəkləyirlər. Dövlətimiz, eləcə də QHT Agentliyi QHT-lərin bu fəaliyyətini yüksək qiymətləndirir və onların inkişafına lazımı dəstəyi verir. QHT Agentliyinin dövlət və cəmiyyət həyatında qeyri-hökumət təşkilatlarının rolunun artırılması, fəaliyyətinin yeni dövrün çağırışlarına uyğun təşkili, bu sahədə həyata keçirilən dövlət dəstəyinin təşkilati-hüquqi əsaslarının və mexanizmlərinin təkmilləşdirilməsi istiqamətində gördüyü bütün işlər təqdirəlayiqdir. Agentlik yarandığı 1 il müddətində vətəndaş cəmiyyətinin həyatında yeni mərhələnin başlanğıcı olub və bir çox ilklərə imza atmaqda davam edir. Bu gün əminliklə deyə bilərik ki, QHT Agentliyi QHT sektorunun inkişafına mühüm töhfələr verir, vətəndaş cəmiyyətinin inkişafını birmənalı dəstəkləyir. Ölkəmizdə ictimai əhəmiyyət kəsb edən bütün məsələlərdə QHT-lərin əsas tərəfdaş olması dövlət siyasətimizin təntənəsidir. Vətəndaş cəmiyyətinin inkişaf etdirilməsi üçün prezident İlham Əliyevin səyləri, sərəncamları artıq öz səmərəsini verməkdədir və bu gün QHT-ləri dövlətin əsas partnyoru hesab etmək olar.
Lamiyə İsazadə,
“Kimsəsiz Uşaqların Sosial Müdafiəsi” İctimai Birliyinin sədri
