Bəlkə də “köhnəlmiş mövzudur” deyəcəksiniz və bu məsələyə toxunduğumuza görə hardasa bizi qınamaq da keçəcək içinizdən. Olsun. Amma unutmayaq ki, Hacıkənddə keçirilən II Yaylaq Festivalının hələ də söz-söhbəti davam edir, giley-güzar, narazılıq, ittihamlar səngimək bilmir. Baxmayaraq ki, təşkilatçılar da məsələyə aydınlıq gətirib, Mədəniyyət Nazirliyinin aidiyyəti şöbəsi də məlumat yayıb insanlardan üzr istəyib, mədəniyyət nazirinin müavini də fikir bildirib, amma yenə də mövzu davam edir.
Mətbuat Hacıkənddə keçirilən və bir neçə gündür müzakirələr yaradan Yaylaq Festivalı ilə bağlı maraqlı məqamlar ortaya çıxarıb. Festivalda nə qədər insan iştirak edib və tədbirə ayrılan vəsait nə qədərdir? Əvvəllər festivalda rəsmilər 70 min nəfərin iştirak edəcəyini proqnozlaşdırdıqlarını bildirib, tədbirdən sonra isə 120 min rəqəmi hallanıb. Mədəniyyət nazirinin müavini açıqlamasında festuvalda 120 min nəfərin iştirak etdiyini deyib. Burada ən çox müzakirə edilən məsələ festival üçün ayrılan vəsaitin həcmi də təşkilatçılıqdakı çatışmazlıqların obyektiv, yoxsa subyektiv səbəbdən baş verməsi ilə bağlı məsələdir. Suallar da bu yöndədir.
Mədəniyyət Nazirliyindən mətbuatın ünvanladığı sorğuya cavab olaraq bildirilib ki, qonaqların dəvətini “Cavad Xan” Tarix və Mədəniyyət Fondu həyata keçirib, ona görə də qonaqların sayı ilə bağlı konkret statistikanı Mədəniyyət Nazirliyi bilmir. “Digər sorğunuzla (festival ayrılan vəsaitin həcmi) bağlı hələ ki, rəhbərliklə razılaşdırılib bizə bir mövqe təqdim olunmayıb. Mövqe təqdim olunarsa, xəbər edərik”. Bu, Mədəniyyət Nazirliyinin cavabında bildirilib.
Maraqlıdır ki, qonaqlarının sayını hələ indi də bilməyən, tədbirdən sonra araşdırma aparmayan, detalları, yanlışları öyrənməyən və ayrılan vəsaitin həcmi haqda təsəvvürü olmayan, bu məsələdə “rəhbərliklə razılaşdırma” gözləyən qurumun qeyri-şəffaf fəaliyyətinin nəticəsi təsadüfən tənqid edilmir. Bu fikirlər də medaiada gedib.
“Bu qurum indiyə qədər bu barədə statistik rəqəmə malik deyilsə, bunun özü işin təşkilinin zəif olduğunun, deyilən iradların təsdiqidir”
Qəribədir ki, bu qədər müzakirədən, bu qədər tənqiddən sonra hələ də nazirlik ictimaiyyətə doğru-dürüst məlumat verməyib. Festivalın keçirilməsindən başa çatmasına qədər hər bir detal barədə hesabat verilməli olduğunu deyən İSBAM sədri Samir Adıgözəlli hesab edir ki, festival ətrafında yaranan qalmaqllar boşuna olmayıb və buna kifayət qədər əsaslar olub: “Mən İkinci Yaylaq Festivalı ilə bağlı geniş danışmaq istəmirəm. Çünki bu məsələ ilə bağlı geniş danışılıb, mediada, sosial şəbəkələrdə müzakirələr aparılıb. Çox arzu edərdik ki, Yaylaq Festivalı adına, mahiyyətinə, mötəbərliyinə uyğun olaraq möhtəşəm keçiriləydi. Bizdə bəziləri bir sıra məsələlərdə daha çox feodal düşüncəsi ilə davranırlar. Halbuki, feodal təfəkkürü ilə hərəkət edilməməlidir. Bəziləri hesab edir ki, bu ölkədə yalnız onlar var, onlar yaşayır, onlar bir neçə yüz min manat qiyməti olan maşın sürürlərsə və yüksək vəzifədə otururlarsa “ağadırlar”, əli qələmli adamlar isə bunların “nökərləridir”.
Nazirliyin açıqlamasını gördüm, birinci dəfə deyil bu cür açıqlamalar verilir. Festivalda nə qədər insanın iştirak etdiyinə dair nazirlikdə necə ola bilər ki, statistika olmasın? Nazirlik dəqiq rəqəm söyləmir, nə xərclənən vəsaitin həcmini açıqlayır, nə də insanların sayını, təşkilatçının “Cavad Xan” Fondu olduğunu deyir. Bu da doğru deyir. Çünki Mədəniyyət Nazirliyi dövlətin mədəniyyət siyasətini həyata keçirən dövlət qurumudur və bu tədbirin də əsas aparıcı qüvvəsi, məsuliyyət daşıyır. Bu qurum indiyə qədər bu barədə statistik rəqəmə malik deyilsə, bunun özü işin təşkilinin zəif olduğunun, deyilən iradların təsdiqidir. Ümumiyyətlə, bu cür tədbirlərin Tədbirlər Planı, büdcəsi, iştirakçı sayı barədə məlumat dövlət qurumlarında olmalıdır. Amma təəssüflər olsun ki, Azərbaycanda belə deyil”.
S.Adıgözəlli hesab edir ki, festivalla bağlı verilən açıqlama yetərli deyil. O hesab edir ki, hazırda nazir özü də çıxılmaz vəziyyətdədir: “Nazirliyin festivalla bağlı açıqlaması yetərli deyil. Nazirin özü də çıxılmaz vəziyyətdədir ki, Yaylaq Festivalını keçirən, təşkil edən, bu işə məsul olan şəxslər səriştəsiz olublar. Baş verənlər də bu səriştəsizliklərlə bağlıdır. Bizdə belə bir tendensiya var, bir adam vəzifəyə gələndə az qala süpürgəçiyə qədər dəyişir və nəticədə də peşəkar kadrlar işdən çıxarılır, onların yerinə isə qeyri-peşəkarlar gəlir. Hesab edirəm ki, nazirlik bu söz-söhbətə son qoymaq üçün əsl səbəblər, ayrılan büdcə və digər məsələlər barədə ictimaiyyətə daha aydın cavab verməlidir”.
Leyla QARAXANLI
