İlkin tibbi yardım dərmanları apteklərdən yoxa çıxıb - depolardan reaksiya...

img

Tarif Şurasının dərman vasitələrinin qiymətlərilə bağlı qərarından sonra paytaxt apteklərindən bir sıra dərmanlar, demək olar ki, qəhətə çıxıb. Son bir neçə həftədir ki, ilkin tibbi yardım üçün lazım olan pereparatlar apteklərdə tapılmır.

Qrip, zökəm, angina, badamcıq iltihabı və xroniki yorğunluqla bağlı problemlərdə geniş istifadə olunan Luqol və sinir sisteminin müalicəsində effektli olan Dimedrol apteklərdə yoxa çıxıb. Həmçinin, apteklərdə Lüqol məhlulu qəhətə çıxıb. Dimedrol isə reseptsiz heç kimə verilmir. Əczaçılar deyir ki, hazırda bəzi apteklərdə tapılmayan dərmanlarla bağlı müraciət edən alıcıların sayı kifayət qədərdir “Əksər dərmanlar müəyyən məhdudiyyət və limit çərçivəsində depodan alınır. Ümumiyyətlə, hər dəfə ölkədə koronavirusa yoluxma artanda apteklərdə dərman çatışmazlığı yaranır”.

Alıcılar qeyd edir ki, qiyməti Avropa istehsalı olan dərmanlardan xeyli ucuz Rusiyanın istehsalı olan dərmanların satışı bir çox aptekdən yığışdırılıb.

Vətəndaşların sözlərinə görə, indiyədək almağa öyrəşdikləri dərmanlar ucuz olsa da, bu dərmanlar soyuqdəymə, qrip və ürək ağrıları kimi səhhətdə yaranan ənənəvi problemləri aradan qaldırmağa imkan verirdi.

  • Səhiyyə Nazirliyi: “Dərman vasitələrinin idxalı özəl şirkətlər tərəfindən həyata keçirildiyi üçün apteklərdə dərman təminatı AEM-in səlahiyyətləri xaricindədir”

Səhiyyə Nazirliyinin Analitik Ekspertiza Mərkəzindən (AEM) bildirildi ki, dərman vasitələrinin idxalı özəl şirkətlər tərəfindən həyata keçirildiyi üçün apteklərdə dərman təminatı AEM-in səlahiyyətləri xaricindədir: “Həkimlər Luqol dərman vasitəsi ilə eyni tərkibli digər dərman vasitələrini pasiyentə təyin edə bilərlər. Dimedrola gəlincə,  bu pereparatın idxalında heç bir problem yoxdur.  Dərman vasitələrinin idxal bazasına əsaslanaraq qeyd edək ki, sonuncu dəfə Dimedrol 09.07.2022 tarixində ölkəyə idxal olunub. Reseptlə buraxılan dərman vasitəsidir”.

  • Pərvanə Mustafayeva: “Dərman idxalında monopoliya olmamalıdır”

Həkim ekspert Pərvanə Mustafayeva bildirdi ki, bu gün virus, immun sisteminin zəifləməsi və bununla əlaqədar müxtəlif xəstəliklərin çoxalması ilə dünyada, o cümlədən ölkəmizdə xəstəliklərin aktuallaşmaşı nəticəsində dərman sənayesi qazanıb. Dərman bazarında isə istədikləri qiyməti diqtə edirlər. Digər tərəfdən, ölkəmizdə müharibədən əvvəl hökumətin dərman zavodunun açılması ilə bağlı qərarı var idi. Bu gün dünyada dərman sənayesi silah satışından sonra ikinci yerdə gəlir: “Dərman idxalında monopoliya olmamalıdır. Çünki o dərmanları almağa pul lazımdır. İmmun sistemi də zəifdir, ərzağın da çoxu xaricdən idxal edilir və əksəriyyət də keyfiyyətsizdir. Nəticədə insanlar həkimlərə müraciət edirlər. Əhalinin vəziyyətini nəzərə almaq lazımdır”.

Günel CƏLİLOVA

Peşə etikası

Son xəbərlər