Birdəfəlik sosial yardım müalicədən tam sağalmış Qarabağ əlillərinə də şamil edildi - görünməmiş təcrübə...

Elçin Bayramlı: “Bu çox təqdirəlayiq təcrübədir, hesab edirəm ki, bu addımlar fasiləsiz olacaq”

img

Bildiyimiz kimi, Prezident İlham Əliyevin müharibə əlillərinə xüsusi qayğısını əks etdirən növbəti sosial dəstək proqramına start verilib və Əmək və Əhalinin Sosial Müdafiəsi Nazirliyi tərəfindən Birinci Qarabağ müharibəsi əlillərinə birdəfəlik ödəmələrin verilməsinə başlanılıb.

Rəsmi məlumata görə, birdəfəlik ödəmə təkcə hazırda müharibə əlili statusunda olanlara deyil, həm də vaxtilə Birinci Qarabağ müharibəsi ilə bağlı əlilliyi olmuş, lakin sonradan sağalmış, yəni reabilitasiya olunduğundan əlillik dərəcəsi hazırda olmayan şəxslərə də verilir.

  • “Azərbaycan dövləti vətənimiz, xalqımız uğurunda döyüşən, xidmət göstərən insanları 30 il keçsə də unutmur və onlara müxtəlif formada yardımlar edir”

Mövzuya şərh verən sosial sahə üzrə ekspert Elçin Bayramlı “Bakı-Xəbər”ə şərhində Prezidentin bu sahədə atdığı addımların, verdiyi göstərişlərin böyük əhəmiyyətini vurğuladı. “Prezidentinin bu sahədə göstərişi bir daha onu göstərdi ki, Azərbaycan dövləti dövlətimiz, vətənimiz xalqımız uğurunda döyüşən, xidmət göstərən insanları 30 il keçsə də unutmur və onlara müxtəlif formada yardımlar edir. Bu o deməkdir ki, vətən qarşısında xidmətləri olan şəxslər 100 il keçsə də yaddan çıxarılmayacaq. Bu atılan addım həm də onların sosial vəziyyətinin yaxşılaşmasına müsbət təsir göstərir. Çünki Birinci Qarabağ müharibəsi əlillərinin əksəriyyəti sosial cəhətdən yaxşı vəziyyətdə yaşamır, onların dövlət yardımlarına ehtiyacları var. Real əlilliyi qalanlar onsuz da müxtəlif dövlət proqramları çərçivəsində yardımlar alır, pensiya ilə təmin olunur.  Amma əlilliyi olan və sonra sağalan insanlar da həyatda çox şey itirib. Uzun illər öz karyerasını, işini itirib, çətinlik çəkib, həyatını qurmaq üçün ən enerjili vaxtında gəlir əldə edə bilməyib. Bu səbəbdən dövlət bu qəbildən olan insanların da xidmətlərini nəzərə alıb onlara birdəfəlik yadımlar ödəyir. Bu çox müsbət haldır. Çünki gənc nəsil görürür ki, illər keçsə də Vətən, torpaq, xalq uğrunda döyüşənlər heç vaxt unudulmur, dövlət onları qiymətləndirir. Bu insanlar unudulmur. Bu mənəvi-psixoloji cəhətdən real vətənpərvərliyin təbliği faktıdır. Bəzən sözdə təbliğ üsullarına rast gəlirik, amma real işdə vətənpərvərliyi göstərmək daha effektlidir. Ona görə də bu tip insanlara dövlətimiz yardımları davam etdirməlidir. Hazırda evi olmayan bu cür şəxsləri dövlət mərhələli şəkildə evlə, normal bir işlə təmin etməlidir”.

E.Bayramlı hesab edir ki, birdəfəlik ödənişlərin verilməsi Vətən qarşısında xidmətləri olan insanlara dövlətin göstərdiyi ən böyk qayğıdır: “Bu çox təqdirəlayiq təcrübədir, hesab edirəm ki, bu addımlar fasiləsiz olacaq”.

İradə SARIYEVA

Peşə etikası

Son xəbərlər