MİQ imtahanlarından kütləvi narazılıq - müəllimlər Prezidentə yazdılar...

Müəllimlərin İşə Qəbulu (MİQ) imtahanlarında ilk günlərdən indiyə qədər böyük narazılıqlar baş verir. Əvvəllər müəllimlər Təhsil Nazirliyinin (Elm və Təhsil Nazirliyi) təşkil etdiyi MİQ imtahanların ədalətli  olacağına və savadlı müəllimlərə daimi iş yeri bəxş edəcəyinə inanırdılar. 

Lakin gözləntilərin özünü doğrultmadığını müşahidə edirik. Hər dəfə ölkəmizdə MİQ imtahanları keçirilərkən böyük narazılıqların, ittihamların şahidi oluruq. Çox təəssüflər olsun ki, MİQ-dən narazı qalanların çoxu savadı, biliyi olan müəllimlər olur. Gah həmin müəllimlər daimi işlə təmin olunmurlar, gah vakant yerlər onlardan gizlədilir, gah da başqa əngəllər ortaya çıxarılır. Nazirlik həmişə bəyan edir ki, savadlı, bilikli müəllimlər axtarışındadır. Amma böyük müəllim ordusunun narazılığı başqa şey deyir.

• “Cənab Prezident, ümidimiz yalnız Sizədir”

Son MİQ imtahandan narazı qalan 500-dən artıq müəllimi təmsil edən müəllimlər “Bakı-Xəbər”ə bildirdilər ki, nazirliyin hər il müəllimlərin işə qəbul prosesi bir neçə turdan ibarət olub və müəllimlər də bu turlarda iştirak ediblər, bəziləri daimi, bəziləri isə müvəqqəti iş yerləri qazanıblar. Amma bu ildən nazirlik MİQ imtahanları ilə bağlı yeni qərar qəbul edib və qərara əsasən də müəllimlərin daimi işə qəbulu yalnız bir turdan ibarətdir. Bu da o deməkdir ki, birinci turdan keçənlər daimi iş yeri əldə edəcək, o biri turlarda isə müəllimlər vakant yerlərə də olsa  işə müvəqqəti qəbul ediləcək və növbəti ildə bir də MİQ imtahanlarında iştirak edəcəklər. Bu da o deməkdir ki, öz zəhməti ilə 70+, 80+ ballarla kənarda qalacaq, daimi iş əldə edə bilməyəcək, daimiləşməyəcək “Bizim problemimiz bundan ibarətdir ki, bu ildən etibarən müəllimlərin daimi işə qəbulu cəmi 1 turdan ibarət olub. Yəni birinci turda müəllimlərin işə qəbulu daimiləşəcək. O biri turlarda isə boş olan yerlərə müəllimləri zənglə çağıracaqlar ki, gəl filan məktəbdə müvəqqəti müqavilə ilə işlə. Eyni zamanda daimləşmə olmayacaq. Buna isə biz imtahan verən müəllimlər razı deyilik. Daimləşmə ilə bağlı imtahanın cəmi 1 turdan ibarət olması 70+, 80+ bal yığan müəllimlərə haqsızlıqdır. Keçid balını 40 bal qoyublar. 80 bal yığan müəllim nece işsiz qalsın? Cənab nazir öz çıxışında dedi ki, 70+, 80+ bal yığan müəllimlərlə işləmək istəyərik. Bu söz xatirinə deyilməməlidir, bu deyilənə əməl olunmalıdır. Heç vaxt işdəməyən müəllimlərə işləmək üçün şərait yaradılmır. Onu da deyək ki, əvvəlki illərdə müəllimlər işə çağırılırdı və əsasən daimləşirdi, amma indi elə olmayacaq”.

500-dən artıq müəllimin təmsil olunduğu sosial şəbəkə qrupları da yaradılıb və hər kəs fikirlərini orada qeyd edir. Müəllimlər deyirlər ki, bu gün qəribə bir hal yaranıb. Vaxtilə az bal toplayaraq ucqar rayonlara, kəndlərə düşən müəllimlər var ki, onlar indi Bakıda işləmək istəyirlər, həmin müəllimlərə əmsal balı tətbiq edirlər, onlar daimi işlə təmin olunurlar. Yəni rayonlarda işləmiş müəllimlərə güzəştlər verilir. Şikayətçilər deyir ki, halbuki həmin məllimlər işləməyə getdiyi rayonlarda hər cür şəraitlə, üstün maaşla təmin olunublar, işlədikləri dövrdə haqlarını alıblar. 

Müəllimlər qeyd edirlər ki, çıxılmaz vəziyyətə düşüblər və dərdlərinə çarəni yalnız Prezident İlham Əliyevə müraciət etməkdə görürlər. Həmin müraciətlərdən ikisi də redaksiyamıza təqdim edilib. Müraciətdə deyilir:

“Hörmətli cənab Prezident!

Əvvəla, Sizi Müzəffər Ordunun Ali Baş Komandanı kimi təbrik edirik, Azərbaycan xalqına tarixi qələbə bəxş etdiyiniz üçün sizə öz təşəkkürümüzü  bildiririk! Ölkəmizdə gedən iqtisadi inkişaf bizi qürurlandırır. Gördüyünüz böyük işlər Azərbaycan xalqının gözü önündədir. Sizin rəhbərliyinizlə inkişaf edən sahələrdən biri də təhsil sahəsidir. Hörmətli cənab Prezident!

Biz müəllim ordusunun təmsilçiləri olaraq Elm və Təhsil Nazirliyinin keçirdiyi MİQ müsabiqəsi ilə bağlı şikayətimizi nəzərinizə çatdırmaq istəyirik. Müəllimlərin İşə Qəbulu üzrə keçirilən imtahanlarda  hər il ən azı 2-3 tur daimi iş təminatı ilə bağlı olurdu. Bu il isə cəmi 1-ci turu daimi ediblər. Digər turlar isə ancaq müddətli müqavilə ilə olacaqdır (yəni 1 il işləyib çıxmalıyıq). Nazir öz çıxışında da 70+, 80+ müəllimlərin yetəri qədər savadlı olduğunu və öz sahələrinin peşəkarı olduğunu vurğuladı. Eyni zamanda 3,5 il təcrübəsi olan müəllimlərin balına əmsalın tətbiq edilməsindən də narazıyıq. Dövlət onların əməyini yetərincə qiymətləndirdiyini düşünürük. Bəs  universiteti yeni bitirmiş şəxs necə etsin? Halbuki, imtahanda onlardan çox bal toplamış ola bilər. Bəs nəyə görə hazır boş vakant yerlərə biz müəllimlər müddətli müqavilə ilə qəbul olmalıyıq?! Min-bir əziyyətlə universitet oxumuşuq, imtahanlar vermişik, amma  bu gün isə işsiz qalırıq. Daimi iş yerindən məhrum oluruq. İstəyimiz odur ki, bütün turlar bizə daimi iş yeri bəxş etsin, bütün turlar daimi olsun. Çağırıldığımız iş yerlərində daimləşmək istəyirik.

Böyük müəllim ordusu adından sizdən rica edirik ki, bizim problemimizi nəzarətə götürəsiniz. Xahiş edirik ki, bu məsələyə yenidən baxılması və növbəti turlara da daimi iş yerlərinin daxil etməsi, eyni zamanda 3, 5 təcrübəsi olan müəllimlərin balına əmsalının tətbiq edilməsinin ləğv olunması üçün Elm və Təhsil Nazirliyinə göstəriş verəsiniz! Bu işin sizin nəzarətinizə götürməyinizə ciddi ehtiyac var. Cənab Prezident, ümidimiz yalnız Sizədir”.

İradə SARIYEVA