Məlum olduğu kimi, iyulun 25-dən etibarən tələbələrin köçürülməsi prosesinə başlanılıb. Tələbələrin ölkədaxili və xaricdə yerləşən ali təhsil müəssisələrindən köçürülməsi, yaxud bir ixtisasdan digərinə dəyişdirilməsi, eləcə də ölkəmizdə və xaricdə yerləşən orta ixtisas təhsili müəssisələri tələbələrinin köçürülməsi üzrə elektron sənəd qəbulu transfer.edu.az portalı vasitəsilə həyata keçirilir.
Portala müraciət edən şəxslər köçürülmək istədiyi təhsil müəssisəsini və ya ixtisası seçmək imkanına malikdir. Bunun üçün təhsilalanlar tələb olunan məlumatları elektron müraciətlərinə daxil etməklə, köçürülmə qaydalarına uyğun gəlib-gəlmədiyini müəyyən edə bilərlər.
Qeyd edək ki, tələbələrin köçürülməsi 2016-cı ildən transfer.edu.az portalı vasitəsi ilə həyata keçirilir.
Portal Təhsil Nazirliyi və Dövlət İmtahan Mərkəzi ilə birgə fəaliyyət çərçivəsində tələbələrin köçürülməsi prosesinin sadələşdirilməsi və şəffaflığın təmin olunması məqsədilə yaradılıb. Ancaq təəssüf ki, bəzi işbazlar bu imkandan öz məqsədləri üçün istifadə edib gəlir əldə edirlər. Belə ki, bəzi kodlaşdırma mərkəzləri, işbazlar hər il köçürülmə zamanı tələbələrə öz “xidmətlərini” təklif edirlər. Bu şəxslər vətəndaşları aldadaraq onlardan pul alır, ancaq köçürülmə baş vermir.
“Bəzi insanlar prosesin şəffaflığına inanmadıqları üçün “adam tapım uşağımı köçürtdürüm” deyib vasitəçi axtarmağa çalışır”
Təhsil eksperti Elşən Qafarov bildirdi ki, son illər təhsil sahəsində həyata keçirilən mühüm islahatlardan biri tələbələrin ölkə daxilində və xaricdə yerləşən ali təhsil müəssisələrindən köçürülməsi, yaxud bir ixtisasdan digərinə dəyişdirilməsinin elektron qaydada təşkilidir. Bugünədək yüzlərlə tələbə transfer.edu.az portalı vasitəsilə köçürülmə edib. Proses doğrudan da şəffaf şəkildə həyata keçirilir: “Bəzi insanlar prosesin şəffaflığına inanmadıqları üçün “adam tapım uşağımı köçürtdürüm” deyib vasitəçi axtarmağa çalışırlar. Nəticədə də işbazların qurbanına çevrilirlər. Həmin şəxslər il boyu bu prosesin başlanmasını gözləyirlər. Özlərini bu işin bilicisi kimi təqdim edir, valideynləri inandırmağa çalışırlar ki, köçürülməni yalnız onlar edə bilərlər. Sanki portalın idarəçiləri bunlardır. Əslində, asan olan bu prosesin çətin olduğunu qabardaraq gördükləri “işin” qiymətini qaldırırlar”.
Günel CƏLİLOVA
