Torpaqlarımızın azadlığı uğrunda canını fəda etmiş şəhidlərin ailələrinə, əlillərə və müharibə veteranlarına yüksək diqqət və qayğı hər zaman dövlətimizin əsas prioriteti olub. Məlumdur ki, 90-cı illərdən üzübəri torpaqlarımızın işğaldan azad olunması uğrunda aparılan müharibələrdə on minlərlə insan iştirak edib.
Onların bir çoxu həyatını itirib, digərləri yaralanaraq əlil olub. Azərbaycan dövləti Ermənistanın işğalçılıq siyasətinə qarşı aparılan istər birinci, istərsə də ikinci müharibədə iştirak edən vətəndaşlara həssas yanaşmanı təmin etmək üçün yaralanan, sağlamlığına ömürlük zərbə dəyən insanlara, həmçinin şəhid olanların ailələrinə yönəlik çoxsaylı dəstək mexanizmləri həyata keçirir.
2020-ci ildə 44 günlük Vətən müharibəsində tarix yazaraq torpaqlarımızı 28 illik erməni işğalından azad edən igidlərə dövlət qayğısı elə müharibə gedən günlərdən təmin edilib. Ölkə Prezidenti İlham Əliyev dəfələrlə yaralı qazilərimizə baş çəkib, onların vəziyyəti ilə maraqlanıb. Eyni zamanda Azərbaycanın ərazi bütövlüyü uğrunda gedən döyüşlərdə əlil olan şəxslərə verilən Prezident təqaüdü artırılıb, belə şəxslərin və şəhid ailələrinin müraciətləri ilə məşğul olan xüsusi komissiya yaradılıb. Prezidentin təşəbbüsü ilə formalaşdırılan YAŞAT Fondu bilavasitə müharibə iştirakçıları və şəhid ailələrinin problemlərinin həlli ilə məşğul olur. Bu qayğı, diqqət tək ikinci Qarabağ müharibə iştirakçılarına deyil, birinci Qarabağ müharibəsində iştirak edənlərə də şamil edilir.
Avqustun 3-dən etibarən Birinci Qarabağ müharibəsi əlillərinə birdəfəlik ödəmələr verilir. Nazirlər Kabinetinin qərarına əsasən, Birinci Qarabağ müharibəsi əlillərinə I dərəcə əlilliyə görə – 8800 manat, II dərəcə əlilliyə görə – 6600 manat, III dərəcə əlilliyə görə – 4400 manat məbləğində birdəfəlik ödəmə veriləcək.
Qeyd edək ki, Baş nazir Əli Əsədov avqustun 3-də “1997-ci il avqustun 2-dək olan xidmət dövründə Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar hərbi xidmət vəzifələrini (xidməti vəzifələrini) yerinə yetirərkən və ya həqiqi hərbi xidmət dövründə xəsarət (yaralanma, travma, kontuziya) alması və ya xəstələnməsi nəticəsində əlilliyi müəyyən edilmiş hərbi qulluqçulara, daxili işlər orqanlarının əməkdaşlarına və ya onların vərəsələrinə birdəfəlik ödəmənin verilməsi Qaydası”nın təsdiq edilməsi haqqında qərar imzalayıb.
Birdəfəlik ödəmə almaq hüququ olan şəxslər aşağıdakılardır:
- 1997-ci il avqustun 2-dək olan xidmət dövründə aldığı xəsarət nəticəsində əlilliyi müəyyən edilmiş şəxslər;
- Hərbi xidmət vəzifələrini yerinə yetirərkən xəsarət və ya xəstələnməsi nəticəsində əlilliyi müəyyən edilmiş şəxslər;
- Xidmətlə əlaqədar əlilliyi müəyyən edilmiş, lakin sonradan reabilitasiya olunmuş şəxslər;
- Müəyyən edilmiş məbləğdən az məbləğdə sığorta ödənişi almış şəxslər;
- Yuxarıda göstərilən kateqoriyadan olan şəxslər vəfat etdikdə onların vərəsələri.
Maraqlıdır, Birinci Qarabağ müharibəsində iştirak etmiş təxminən neçə nəfər yardım paketindən yararlana biləcək?
“İlk olaraq sənədləri e-sistemdə olan 11 minədək müharibə əlilinə proaktiv qaydada ödəmə təyin olunaraq bank hesablarına köçürülüb”
Əmək və Əhalinin Sosial Müdafiəsi Nazirliyinin Sosial sığorta və pensiya siyasəti şöbəsinin müdiri Elnur Abbasov “Bakı-Xəbər”ə açıqlamasında qeyd etdi ki, Azərbaycan dövləti şəhid ailələrinə, müharibə veteranlarına və qazilərə yüksək diqqət və qayğı göstərir. Onların sağlamlıqları, qayğıları və problemləri həmişə dövləti narahat edən məsələlər sırasındadır. Məlum olduğu kimi, həmin kateqoriyaya aid olanlara ödənilən Prezident təqaüdü, sosial ödənişlər və pensiyalar, sağlamlıqları üçün həyata keçirilən reabilitasiya proqramları, protezlərin verilməsi, onların mənzil və avtomobillərlə təminatı, məşğulluq məsələləri sahəsində atılan addımlar bütün bunlara sübutdur.
E.Abbasov onu da vurğuladı ki, Nazirlər Kabinetinin yeni təsdiq etdiyi Qaydaya uyğun olaraq, Əmək və Əhalinin Sosial Müdafiəsi Nazirliyi tərəfindən Birinci Qarabağ müharibəsi əlillərinə birdəfəlik ödəmələrin verilməsinə başlanılıb. İlk olaraq sənədləri e-sistemdə olan 11 minədək müharibə əlilinə proaktiv qaydada ödəmə təyin olunaraq bank hesablarına köçürülüb: “Onu da deyim ki, müharibə iştirakçılarına birdəfəlik ödəmələrin verilməsi prosesi davam edir. Məlumdur ki, 1991-1997-ci illərdə müharibədə iştirak etmiş şəxslərə birdəfəlik yardım edilir. Bu illər ərzində müharibədə iştirak etmiş şəxslərin bəzilərinin sənədləri bizim sistemdə mövcud deyil, Sənədlər həmin şəxslərin özündə və ya arxivdədir. Bu səbəbdən də prosesin araşdırılması davam edir. İşlər davam edir. Cari ayın sonunda və ya növbəti ayın əvvəlində müharibə iştirakçılarına birdəfəlik ödəmənin verilməsi həyata keçiriləcək. Onu da deyim ki, Birinci Qarabağ müharibəsində iştirak edən hər bir kəsə birdəfəlik ödəmə veriləcək”.
Günel CƏLİLOVA
