Azərbaycan dövlətinin sosial siyasəti ölkə vətəndaşlarının rifah halının yüksəldilməsinə xidmət edir. Xüsusən də həssas təbəqələrin nümayəndələrinə göstərilən diqqət və qayğının əhatəsi çox genişdir. Bildiyimiz kimi, dövlətimiz vətən uğrunda sağlamlığını itirən şəxslərə hərtərəfli qayğı göstərir. Vətən müharibəsi əlilləri, qazilər, şəhid ailələri öz yerində, dövlət tərəfindən Birinci Qarabağ müharibəsi əlillərinə də birdəfəlik ödəmələrin verilməsi həyata keçirilir.
Beləliklə, Prezident İlham Əliyevin müharibə əlillərinə xüsusi qayğısını əks etdirən növbəti sosial dəstək proqramına start verilib. Əmək və Əhalinin Sosial Müdafiəsi Nazirliyi tərəfindən Birinci Qarabağ müharibəsi əlillərinə birdəfəlik ödəmələrin verilməsinə başlanılıb. Ekspertlər deyir ki, bu addım yalnız 44 günlük Vətən müharibəsi deyil, Birinci Qarabağ müharibəsinin iştirakçılarına da dövlət qayğısının göstəricidir və bu o deməkdir ki, heç kəs yaddan çıxmır, hər kəsin xidməti dövlət tərəfindən qiymətləndirilir.
Birinci Qarabağ müharibəsi əlillərinə birdəfəlik ödəmələrin verilməsinin əhəmiyyəti nədir?
Şəmistan Əlizamanlı: “Birinci Qarabağ müharibəsi əlillərinə birdəfəlik ödənişlərin veriməsi də dövlətin qayğı siyasətinin bir hissəsidir”
“Vətənpərvərliyin Təbliğinə Dəstək” İctimai Birliyinin sədri Şəmistan Əlizamanlı “Bakı-Xəbər”ə açıqlamasında bildirdi ki, Birinci Qarabağ müharibəsi əlilləri bunu çoxdan gözləyirdi və birdəfəlik ödəmələrin verilməsi çox müsbət hal oldu: “Əlbəttə, Birinci Qarabağ müharibəsi əlillərinə birdəfəlik ödənişlərin verilməsini alqışalyıram. Bu çox müsbət haldır, dövlətin bu addımını dəstəkləyirəm. Bizim qazilərimiz bunu illərlə gözləyiblər. Bu onların haqqıdır, dövlət onların haqqını verdi. Bu onların ailələri, yaxınları üçün çox xoş bir xəbər oldu. Sevindirici bir xəbərdir. Mən də bu addımı alıqışlayıram və dəstəkləyirəm. Bu onu göstərir ki, dövlət Birinci Qarabağ müharibəsi qazilərini, əlillərini unutmur, onlara hər cür qayğı göstərilir, onların sosial problemləri həll olunur və həll olunmaqdadır. Birinci Qarabağ müharibəsi əlillərinə birdəfəlik ödənişlərin veriməsi də dövlətin qayğı siyasətinin bir hissəsidir. Onlar bunu gözləyirdilər və bu da gerçəkləşdi”.
Asəf Əliyev: “Biz bunu yüksək qiymətləndiririk”
“Qarabağ qaziləri” İctimai Birliyinin sədri Asəf Əliyev də bizimlə söhbətində birdəfəlik ödəmələrinin böyük əhəmiyyətə malik olduğunu dedi: “Bildiyiniz kimi, “Hərbi qulluqçuların dövlət icbari şəxsi sığortası haqqında” Qanunun qüvvəyə mindiyi 1997-ci il avqustun 2-dək hərbi xidmətdə olarkən aldığı xəsarət nəticəsində əlilliyi müəyyən edilmiş hərbi qulluqçuları və daxili işlər orqanları əməkdaşlarına sığorta pullarının verilməsi problem olaraq qalırdı. Məsələ ilə bağlı bir neçə il əvvəl, hələ Baş qazimiz Etimad Əsədovun sağlığında təşkilatımız "Şəhid Ailələri" birliyi ilə birgə bu məsələni qaldırmışdı. Qanunvericiliyin yaratdığı problemi Prezident İlham Əliyev həm şəhid ailələri, həm də Qarabağ əlilləri üçün “Birdəfəlik ödəmə” ilə həll etdi. Əslində bu, cənab Prezidentimizin şəhid ailələrinə və qazilərə növbəti humanitar yanaşması idi. Biz bunu yüksək qiymətləndiririk. Prezidentin şəhid ailələrinə, qazilərə humanist yanaşması birinci dəfə deyil. O həmişə müharibə insanlarına diqqət və qayğı göstərmişdir.
“Hərbi qulluqçuların dövlət icbari şəxsi sığortası haqqında” qanunun yaratdığı problemi yaxından bilən təşkilat olaraq, “Qarabağ qaziləri” İctimai Birliyi adından bu humanitar addıma görə cənab Prezidentimizə minnətdarlığımızı bildiririk! Biz - Qarabağ qaziləri, həmişə olduğu kimi, yenə də Prezidentimiz, Ali Baş Komandanımız İlham Əliyevin yanındayıq. Onun Azərbaycanımızın çiçəklənməsi, dövlətçiliyimizin qorunması, ərazi bütövlüyümüzün təmin edilməsi istiqamətində gördüyü bütün işləri dəstəkləyirik”.
A.Əliyev, eyni zamanda, bu işin başa gəlməsində əməyi keçən hər kəsə təşəkkür edib: “Ümid edirik ki, bu işin icrasını həyata keçirəcək Əmək və Əhalinin Sosial Müdafiəsi Nazirliyi prosesi uğurla başa çatdıracaq”.
Emin Həsənli: “1991-1997-ci illərdə yaralanan şəxslərə I, II,III qrup üzrə birdəfəlik ödəmələr verilir”
"Tərxis Olunmuş Hərbçilərin Gəncləri Maarifləndirmə" İctimai Birliyinin sədri Emin Həsənli də dövlətin bu addımını dəstəkləyir və hesab edir ki, Birinci Qarabağ müharibəsi əlillərinə birdəfəlik ödmələrin verilməsinə başlanılması çox müsbət hadisədir: “Azərbaycan Prezidenti, Silahlı Qüvvələrin Ali Baş Komandanı İlham Əliyev hər zaman şəhid ailələrinə, müharibə iştirakçılarına xüsusi diqqət və qayğı göstərib. Ən yaxşı cəhət də ondan ibarətdir ki, istər İkinci Dünya Müharibəsi iştirakçıları, istər Çernobıl iştirakçıları, 20 yanvar şəhidlərinin ailələri, əlilləri, Birinci və İkinci Qarabağ müharibəsi iştirakçıları, qaziləri, əlilləri, şəhid ailələrinin statusu eynidir. Ölkə prezidentinin təqaüdlərini alırlar, şəhid ailələri, müharibə əlilləri mənzillə təmin olunur. Onların övladları özəl ali məktəbə qəbul olduqda belə təhsil haqları dövlət tərəfindən ödənilir”.
E.Həsənli qeyd etdi ki, 2018-ci ildə yenidən Prezident seçilən İlham Əliyevin ilk fərmanı şəhid ailələrinə, 1991-1997-ci ildə şəhid olmuş şəxslərin ailələrinə kompensasiya ödənilməsi ilə bağlı oldu, birdəfəlik ödəmə təmin edildi: “İndi də Birinci Qarabağ müharibəsi iştirakçılarına, 1991-1997-ci illərdə yaralanan şəxslərə I, II,III qrup üzrə birdəfəlik ödəmələr verilir. Bu onu göstərir ki, Azərbaycan dövlətinin şəhid ailələrinə, müharibə iştirakçılarına dəstəyi davamlıdır, sistemlidir. Hər il Azərbaycan dövləti mənzillərin, avtomobillərin verilməsində, müalicənin təmin edilməsində, protezlərin verilməsində, onların sanatoriya-kurortlara, uşaqlarının yay düşərgələrinə cəlb edilməsi istiqamətində, müalicələrinin təşkili sahəsində sistemli, ardıcıl işlər görülür. Əvvəlki dövrlərdə olan borclar da bu fərmanla bütövlükdə aradan qaldırıldı. Şəhid ailələrinə ödəmələr verildi, indi isə Birinci Qarabağ müharibəsi əlillərinə ödmələr verilir. Azərbaycan dövləti sosialyönümlü dövlətdir. Xüsusən müharibə iştirakçılarına xüsusi diqqət və qayğı göstərilir. Son illər aparılan siyasətin nəticəsində Azərbaycanda çox vətənpərvər bir gənclik yetişib. Bu, Vətən müharibəsində də özünü sübüt etdi. Bu gəncliyin qəhrəmanlıq salnaməsi bütün xalq üçün örnəkdir. Bayraq, torpaq qədər şəhidlərimiz, qazilərimiz də bizim üçün əzizdir...”
İradə SARIYEVA
