İkinci Qarabağ müharibəsində Azərbaycanın bütövlüyü uğrunda canından keçən bir qalıb şəhidimiz də Lənkəran rayonunun İstisu qəsəbəsində boya-başa çatan Zaur İsmayılzadədir. Lənkəran elinin qəhrəman oğlu yetkinlik yaşına çatanda Vətənini hər şeydən üstün bilir. Əsir Qarabağın yağı tapdağında qalması ilə heç cür barışa bilmir. Odur ki, Vətən müharibəsi başlayanı döyüşlərə qatılır. Doğma torpağının hər qarışının azadlığı uğrunda ölüm-dirim savaşında hünər göstərir. Döyüşün şiddətli vaxtında, oktyabrın 6-da Füzulidə şəhidlik zirvəsinə ucalır. Müharibə meydanında Zaur İsmayılzadənin şücaəti ölümündən sonra “Vətən uğrunda”, “Cəsur döyüşçü” və digər medallara layiq görülüb.
İstisu qəsəbəsinin Zaurla bərabər Birinci və İkinci Qarabağ müharibələrində Vətən üçün canından keçən 12 qəhrəman oğlu var. Burada qəlblərdə yaşayan Vətən sevdalıların şərəfinə bulaq kompleksi inşa edilibdir. İnsanların and yerinə dönən bu möhtəşəm kompleksin açılış mərasimi Zaurun ad gününə düşdü. Ətrafına minlərlə ziyarətçinin toplaşdığı bu şəhid yadigarının açılış lentini Lənkəran Şəhər İcra Hakimiyyətin başçısı Taleh Qaraşov Vətən müharibəsi şəhidi Zaur İsmayılzadənin anası Sevil Hüseynova ilə birgə kəsdilər. Dövlət himini oxundu, canını doğma Azərbaycanın bütövlüyünə qurban verən qəhrəman Vətən övladların xatirələri bir dəqiqəlik sükutla anıldı və Lənkəran Şəhər İcra Hakimiyyətinin başçısı Taleh Qaraşov çıxışa başladı: - Bulaq kompleksinin açılışının şəhidimiz Zaur İsmayılzadənin doğum günündə baş tutması böyük önəm daşıyır. Vətən üçün yaşayıb, onun üçün əbədiyyətə qovuşan, milyonların qəlbində taxt quran, qanları ilə haqsızlığa son qoyan, ədaləti bərpa edən, xalqın qürur və vüqarını özünə qaytaran, milyonların içindən seçilən, ölümsüzlüyə ucalan, silinməz və unudulmaz tarixə çevrilən ilahi varlıdır şəhidlər. Qəhrəmanların müqəddəs qanı axıdılan Qarabağ artıq öz əzəmətinə cənab Prezident İlham Əliyevin və Birinci vitse-prezident Mehriban xanım Əliyevanın məqsədyönlü fəaliyyəti nəticəsində qovuşur, insanların doğma yurd-yuvalarına qayıtması Ağalı kəndinin timsalında artıq təmin olunub.
Şəhid anası Sevil Hüseynova çıxışında el-obasının insanlarına dərdinə, acısına şərik olduğuna görə minnətdarlığını ifadə edib bildirdi ki, oğlum Vətən yolunda ölməzliyə qovuşub. İndi bütün xalq onun adını əziz tutur. Bütün şəhid ailələrinə dövlətin qayğı və diqqəti ən ali səviyyədədir. Xalqına ürəkdən bağlı olan cənab Prezident İlham Əliyev və Birinci vitse-prezident Mehriban xanım Əliyeva həmişə bizimlə maraqlanır.
Çıxışlardan sonra məktəblilərin ifasında Vətənin müqəddəsliyini yaşadan şəhidlərə həsr olunan şerlər səsləndi, musiqi ifa edildi. Axırda ziyarətçilər şəhidin məzarına baş çəkdilər, ehtiram əlaməti olaraq üstünə gül dəstələri düzdülər.
Zəfər ORUCOĞLU Azərbaycan Jurnalistlər Birliyinin üzvü
