Azərbaycanda standartlara uyğun olmayan, Çin istehsalı saxta şprislərin satışa buraxılması barədə xəbərlər yayılıb. Bu barədə sosial şəbəkə istifadəçiləri məlumat paylaşırlar. Qeyd olunur ki, adıçəkilən şprislərin ucları standartlara uyğun olmadığından istifadə zamanı insanlarda, xüsusən uşaqlarda sinirlərin zədələnməsinə səbəb olur.
Bu da müəyyən müddətdən sonra insanlarda sinir xəstəliklərinə yol açır. Qeyd etdiyimiz kimi, bazarda daha çox Çin istehsalı olan şprislər üstünlük təşkil edir. Ancaq ölkəmizdə şpris istehsalı var. Yeni qurulmuş Şpris fabriki fəaliyyətdədir. Hətta istehsalı beynəlxalq standarlara cavab verən bu fabrik yaxın günlərdə Rusiya bazarına çıxmağa da hazırlaşır.
Eyyub Hüseynov: “Hazırda bazarın 80%-dən çoxunda standartlara uyğun olmayan şprislər satılır”
Azərbaycan bazarında olan təhlükəli şprislər haqqında danışan Azad İstehlakçılar Birliyinin (AİB) sədri Eyyub Hüseynov qeyd etdi ki, Azərbaycanda şprislərin standartı mövcuddur: “Adətən şprislər 2 və 3 hissəli olur. 3 hissəli şprislərdə porşenin ucunda qara rezin hissə olur, 2 hissəli şprislərdə isə bu olmur. Artıq dünyanın ən qabaqcıl ölkələrində 3 hissəli şprislərdən imtina ediblər. Çünki 3 hissəli şprislərin istehsalı zamanı istifadə olunan qara rezin hissə təhlükə mənbəyidir. Həmin qara rezin hissə müəyyən dərman vasitələri ilə reaksiyaya girə bilir və nəticədə rezin hissədən qopan hissəciklər inyeksiya zamanı ciddi fəsadlar yaradır. Azərbaycanda qəbul olunmuş AZS 877 standartı yalnız 2 hissəli şrpislər üçün nəzərdə tutulub. 3 hissəli şprislərin bizdə standartı yoxdur. Bəs onda bazarımıza bu şprislər hansı yolla çıxarılır? Hazırda bazarın 80%-dən çoxunda standartlara uyğun olmayan şprislər satılır. Bu şprislərin silindirinin üzərindəki bölgü şkalasına əllə toxunanda pozulur. Silindiri çox bulanıq və qara rəngdə olan porşenin sonluğunda yağa bənzər maddə çox ciddi təhlükə mənbəyidir. Çox qaldıqda burda pas yaranır. Bundan əlavə həmin şprislərin üzərindəki məlumatlara diqqət yetirdikdə məlum olur ki, şprisin qablaşdırmasında qeyd olunan adda istehsalçı ümumiyyətlə mövcud deyil”.
Adil Qeybulla: “Bazarda keyfiyyətsiz şprislərin satılması barədə məlumatlar ciddi şəkildə araşdırılmalıdır”
Tibb elmləri doktoru, professor Adil Qeybulla da hesab edir ki, bazarda keyfiyyətsiz şprislərin satılması barədə məlumatlar ciddi şəkildə araşdırılmalıdır: “Bu problem mövcuddur. Xeyli vaxtdır ki, biz də öz təcrübəmizdə şahidi oluruq. Məsələn, şprisdən ya vurulan məhlul axır, ya da şpris çat verir. Təbii ki, bu, məhsulun keyfiyyətsiz olmasının göstəricisidir. Mən xarici ölkələrdə şprislərdən istifadə etmişəm. Onların keyfiyyəti bizdə satılanlardan çox-çox fərqlənir. Hesab edirəm ki, digər bəzi məhsullar kimi bu məhsulun da ölkəmizə ən keyfiyyətsizi idxal olunur. Əslində şprisin hazırlandığı materiallar insan orqanizmi üçun zərərsiz olmalıdır. O baxımdan keyfiyyətsiz şprislər orqanizm üçün real təhlükə mənbəyidir. Həmin məhsullar əlavə problemlər yarada bilər. Tutaq ki, bəzi dərman maddələri ilə reaksiyaya girə bilər və s. Digər tərəfdən, şprislər adətən qamma şüalanma ilə sterilizə olunur. Amma belə bir keyfiyyətdə hazırlanan şprislərin adekvat sterilizasiyası da, təbii ki, şübhə doğurur”.
Günel CƏLİLOVA
