Birinci sinfə şagird qəbulu üzrə məktəb seçimi zamanı yerlərin dərhal dolması bəzi valideynlərin narazılığına səbəb olub. Sosial platformada da çoxlu sayda belə narazılıqlara rast gəlmək mümkündür. Bu hal daha çox rus bölməsi üzrə yaşanır. Bakının Sabunçu rayonu, Zabrat qəsəbəsində rus bölməsi üzrə I sinfə qəbul olan şagirdlərə məktəbdə yer tapılmır.
Valideynlər qeyd edir ki, iyirmi uşaq rus sektoru üzrə təhsil almaq üçün imtahanlardan keçsə də, məktəbdə sinif yoxdur: “Təhsil ocağında əlavə sinif açılmır. Məktəbdən deyirlər ki, uşağınızın təhsil alması üçün ya başqa ərazidəki məktəbə müraciət edin, ya da növbəti tədris ilində təhsil alsınlar. Biz Zabratda evimizin yaxınlığında məktəb ola-ola necə başqa əraziyə müraciət edək? Məktəbdən təhsil ocağında sinif olmadığı üçün uşaqlarımızın bir il dərsə gec başlamalarını təklif etmələri nə dərəcədə düzdür?”
Bakı Şəhəri üzrə Təhsil İdarəsi: “Sistemdə həmin siniflər üzrə dərs aparılacaq otaqların maksimum tutumuna uyğun olaraq şagird yerləri açılıb…”
Məsələ ilə bağlı Bakı Şəhəri üzrə Təhsil İdarəsindən bildirildi ki, tədrisi digər dildə aparılan bölmələr üzrə 81 nömrəli tam orta məktəb üçün https://mektebeqebul.edu.az/ sistemində 2022-2023-cü tədris ili üzrə iki sinif açılıb: “Həmin siniflərdən birində müəllim olmadığı üçün vakant kimi qeyd edilib. Sistemdə həmin siniflər üzrə dərs aparılacaq otaqların maksimum tutumuna uyğun olaraq şagird yerləri açılıb və hazırda həmin yerlər tutulub. Eyni zamanda, məlumat üçün bildiririk ki, 81 nömrəli tam orta məktəbdə şagird sıxlığı səbəbindən sinif otaqlarında çatışmazlıq yarandığı üçün həmin məktəbdə modul tipli sinif otaqları təşkil edilib. Valideynlərə həmin ərazidə yerləşən digər ümumi təhsil məktəbinin Azərbaycan bölməsinə sorğu yerləşdirmək tövsiyə edilir”.
Aytəkin Kamranqızı: “Valideynlər çalışır ki, uşağı hansı məktəb yaxşıdırsa, ora qəbul etdirsin, bu zaman istədiyi məktəbdə yerlər dolanda narazı qalır”
Sosioloq Aytəkin Kamranqızı bildirdi ki, birinci sinfə qəbulun mərkəzləşmiş şəkildə aparılmasından sonra qəbul qaydaları dəyişib. Onun sözlərinə görə, əvvəllər müəllimlər keçmiş JEK işçiləri ilə birgə qapı-qapı düşüb birinci sinfə gedəcək şagirləri qeydiyyata alırdılarsa, hazırda mərkəzləşmiş sistem vasitəsilə qəbul elektron formada aparılır: "Keçmiş təhsil nazirlərindən birinin dövründə əmr verildi ki, məktəb və müəllim seçməkdə valideyn müstəqildir. Həmin vaxt əksər valideynlər uşağının ən yaxşı məktəbdə oxuması üçün onu yaşadığı ərazidən kənardakı təhsil müəssisələrinə göndərdi. Bu gün Bakı məktəblərinin bəzilərində buna görə süni sıxlıq yaranıb. Hamı istəyir ki, uşağı elit məktəblərdə təhsil alsın. Amma hazırki sistemlə bu mümkün deyil. Çünki birinci sinfə şagird qəbulu əsasən ərazi üzrə aparılır. Valideynlər isə çalışır ki, uşağı hansı məktəb yaxşıdırsa, ora qəbul etdirsin. Bu zaman istədiyi məktəbdə yerlər dolanda narazı qalır”.
Günel CƏLİLOVA
