Bu günlərdə Ailə, Qadın və Uşaq Problemləri üzrə Dövlət Komitəsinin təşkilatşılığı ilə "İnsan alverinə qarşı mübarizə: fəaliyyət və perspektivlər" mövzusunda tədbir keçirilib. Tədbirdə uşaqlarla bağlı bir sıra mövzulara toxunulub. Ilk olaraq qeyd edilib ki, il ərzində qərəzli şəkildə təhsildən yayındırılan 13 uşaq müəyyən edilib: “Dövlət Komitəsi həmin məsələləri araşdırıb. Belə hallar aşkarlananda dərhal hərəkətə keçilir və müvafiq tədbirlər görülür”.
Həmçinin, o da bildirilib ki, elə uşaqlar da var, əxlaqsız həyat tərzi yaşayır, bəziləri cinsi zorakılığa məruz qalır. Sığınacaqlar belə uşaqları qəbul etmək istəmir. Bu ciddi problemdir.
Qaldırılan hər iki problem olduqca aktualdır. Qeyd edək ki, uşaqların icbari ümumi orta təhsildən yayındırılması qadağandır.
Nizami Hüseynov: “Dərsdən yayınmanın səbəbləri hərtərəfli araşdırılmalı, geniş müzakirə olunmalıdır”
Uşaqların təhsildən yayınması ilə bağlı fikir bildirən təhsil eksperti Nizami Hüseynov qeyd etdi ki, ümumi orta təhsilin icbariliyi fonunda təhsildən yayınma hallarının mövcud olması ciddi problem olaraq qalmaqdadır: “Bir çox dövlətlərdə uşaqların təhsilə vaxtında cəlb olunmamasına və təhsildən yayınmaya görə cəzalar nəzərdə tutulur. Bu cəzalar həm inzibati, bəzi ölkələrdə isə hətta cinayət məcəlləsinin müvafiq maddələrinin pozuntusu hesab edilir. Təhsilin dəyəri olmalı və ölkəmizin hər bir övladının, vətəndaşının təhsil hüququnun müqəddəs konstutision hüququnun olması, onun gələcəyi üçün təhsilin çox mühüm amil olmasını nəzərə almalıyıq. Bu işi istənilən bir məmurun, dövlət qurumunun işi kimi deyil, ümümmilli iş kimi qəbul etməyimiz daha düzgün olardı. Hər halda, "şüurun üzərində çalışmaq” öz yerində qalsa belə, bu müddət ərzində repetitorluğun meydanını daraldıb, məktəb rəhbərləri ilə bəzi valideynlərin alış-verişini məhdudlaşdırmaq yolu ilə şagirdlərin fərdi hazırlığa kütləvi cəlb olunmasının qarşısını almaq, məktəb mühitinin müəyyən qədər də olsa dirçəldilməsinə nail olmaq olar. Hər şeydən əvvəl dərsdən yayınmanın səbəbləri hərtərəfli araşdırılmalı, geniş müzakirə olunmalı, yaranan vəziyyətdən çıxış yolu kimi ilk növbədə daxili nizam-intizam qaydalarının gücləndirilməsi üzrə məktəbin məsuliyyətinin artırılması istiqamətində ciddi addımlar atılmalıdır. Ən başlıcası isə, məktəblərdə tədrisin səviyyəsi qaldırılmalı, nizam-intizam möhkəmləndirilməlidir”.
Fatimə Hacıbəyli: “Əxlaqsız həyat tərzi yaşayan, cinsi zorakılığa məruz qalan uşaqların sığınacağa qəbul edilməməsi məsələsi araşdırılmalıdır”
“Vəfa” Sosial İctimai Birliyinin sədri Fatimə Hacıbəyli qeyd etdi ki, zorakılığa məruz qalan, yaşayış yeri olmayan bütün uşaqlar sığınacağa qəbul edilməlidir. Ümumiyyətlə, kimliyindən asılı olmayaraq, zorakılıqla üzləşən bütün uşaqlar sığınacağa yerləşdirilməlidir: “Sığınacağa yerləşdirilən uşaqlara zəruri tibbi, psixoloji, hüquqi, sosial yardımlar göstərilir, onlara təhsillərini davam etdirmək imkanı yaradılır. Sığınacaqda uşaqların şəxsiyyətinin anonimliyi təmin edilməlidir”.
Həmsöhbətimiz onu da əlavə etdi ki, əxlaqsız həyat tərzi yaşayan, cinsi zorakılığa məruz qalan uşaqların sığınacağa qəbul edilməməsi məsələsi araşdırılmalıdır.
Günel CƏLİLOVA
