Məlum olduğu kimi, Prezident İlham Əliyev elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında fərman imzalayıb.
Fərmana əsasən, Təhsil Nazirliyi Elm və Təhsil Nazirliyi adlandırılıb və AMEA-nın 36 elmi müəssisə və təşkilatı Elm və Təhsil Nazirliyinin tabeliyinə verilib.
Prezident İlham Əliyevin məlum sərəncamından sonra elm və təhsilin inteqrasiyası bu sahənin inkişafına müsbət təsir edəcək.
Kamran Əsədov: “Elm və Təhsil Nazirliyinin yaradılması Azərbaycanda həm elmin, həm də təhsilin inkişafına səbəb olacaq”
Təhsil eksperti Kamran Əsədov qeyd etdi ki, Elm və Təhsil Nazirliyinin yaradılması Azərbaycanda həm elmin, həm də təhsilin inkişafına səbəb olacaq: “Cənab Prezident İlham Əliyevin fərmanına əsasən Nazirliyin tabeliyində 2 agentlik yaradıldı. Elm və Ali Təhsil üzrə Dövlət Agentliyi və Məktəbəqədər və Ümumi Təhsil üzrə Dövlət Agentliyi yaradılıb. Məlumat üçün qeyd edim ki, 2021-ci ilin dekabr ayında İlham Əliyevin sərəncamına əsasən bağçalar icra hakimiyyətlərindən alınaraq Təhsil Nazirliyinin tabeliyinə verilib. Beləliklə, 1693 bağça icra hakimiyyətlərindən alınaraq Nazirliyə verilib. Bu sərəncam icra olunmağa başladıqdan sonra artıq məktəbəqədər təhsil sahəsində müsbət dəyişikliklər görünür”.
Ekspertin sözlərinə görə, Prezidentin yeni fərmanından sonra Elm və Təhsil Nazirliyinin qarşısında böyük öhdəliklər olacaq. Bu həm elmin, həm də təhsilin inkişafına səbəb olacaq. Yaxın illər ərzində Azərbaycan ali təhsil müəssisələrinin dünya reytinq cədvəllərində olmasının şahidi olacağıq. Eyni zamanda, orta məktəb şagirdlərinin olimpiada göstəricilərinin sayı artacaq”.
Isa Həbibbəyli: “Prezidentin məlum fərmanı Elm və təhsilin müasir tələblərə uyğun inkişafına zəmin yaradır”
AMEA-nın vitse-prezidenti, akademik İsa Həbibbəyli bildirdi ki, elmin qiymətləndirilməsi Akademiyanın funksiyalarından biridir. Prezidentin məlum fərmanı Elm və təhsilin müasir tələblərə uyğun inkişafına zəmin yaradır: “İndiyədək AMEA-nın tərkibində fəaliyyət göstərmiş bir sıra elmi-tədqiqat müəsisələri bundan sonra Elm və Təhsil Nazirliyinin nəzdində işinə davam edəcək. Dünyada belə təcrübəyə çox sıx rastlanır. Hazırda az sayda ölkələrdə təhsil nazirliyi ayrıca fəaliyyət göstərir”.
İ.Həbibbəylinin fikrincə, Elm və Təhsil Nazirliyinin yaranması ölkəmizdə elmin qarşılıqlı inkişafına şərait yaradacaq.
Elşən Qafarov: “AMEA-nın Elm və Təhsil Nazirliyinə birləşdirilməsi nə dərəcədə önəmlidirsə…”
Təhsil eksperti Elşən Qafarov bildirdi ki, Prezident İlham Əliyevin fərmanı ilə Elm və Təhsil Nazirliyinin yaradılması elm və təhsilin inkişafına səbəb olacaq: “Danılmaz faktdır ki, ötən dövr ərzində Azərbaycan Milli Elmlər Akademiyasında fundamental araşdırma aparılmayıb. AMEA və Elm və Təhsil Nazirliyinin nəzdində yaradılan struktur bölmələr elm və təhsilin müxtəlif sahələrində sistemli idarəetmənin yaradılmasına səbəb olacaq. AMEA-nın Təhsil Nazirliyinə birləşdirilməsi nə dərəcədə önəmlidirsə, Elm və Ali Təhsil üzrə Dövlət Agentliyi və Məktəbəqədər və Ümumi Təhsil üzrə Dövlət Agentliyinin yaradılması da o qədər əhəmiyyətlidir. Hesab edirəm ki, bu sahədə görülən işlər təhsilin gələcək inkişafı naminə müsbət sonluqla yekunlaşacaq”.
Həmsöhbətimiz onu da əlavə etdi ki, elm və təhsilin bir struktur altında birləşdirilməsi bu sahənin inkişafına səbəb olacaq.
Günel CƏLİLOVA
