Azərbaycan Milli Elmlər Akademiyasının elmin təkanverici mərkəzi funksiyasını yerinə yetirə bilməməsi, qlobal trendlərdən və inkişaf proseslərindən geridə qalması uzun müddətdir ki, müzakirə mövzusudur.
Son günlər Azərbaycan Milli Elmlər Akademiyasının yarıtmaz fəaliyyəti ciddi tənqidlərə tuş gəlib. AzTV-nin AMEA-nı "vuran" süjetindən sonra ölkənin elm ocağının ləğv olunması, ya da Təhsil Nazirliyinə birləşdirilməsi təklif edilir.
Ancaq maraqlıdır ki, nə AMEA-nın rəhbərliyi, nə də onun tərkibində fəaliyyət göstərən institutların rəhbərləri bu iradlara münasibət bildirir. Belə susqunluğun başlıca səbəbi nədir?
AMEA-nın Nəsimi adına Dilçilik İnstitutunun şöbə müdiri, professor İdris Abbasov “Bakı-Xəbər”ə bildirdi ki, illər uzunu həmin qurumdakı həqiqətləri dilə gətirdiyi üçün akademşəbəkənin sərt mənəvi-psixoloji təzyiqinə, hətta fiziki təzyiq cəhdlərinə məruz qalıb: “İllərdir bu qurumun daxilində baş verənləri deyirəm, yazıram, akademsanksiyalarla üzləşə-üzləşə, maddi-sosial çətinliklərə qatlaşa-qatlaşa ağır durumda vətəndaşlıq borcumu yerinə yetirməyə çalışıram. Şükürlər olsun ki, hələ də ayaqdayam!
Bu gün hansısa Tv-nin, ya xəbər saytının həmin həqiqətlərin izinə düşməsini, həm də daha peşəkar və daha hazırlıqlı bu işə girişməsini yalnız təqdir edə bilərəm.
AMEA rəhbərliyinin susqun qalması olduqca maraqlıdır. Məntiqlə, susmaq həm də razılıq əlaməti sayıla bilər. Bunları hətta cinayətdə belə ittiham edirlər, ancaq AMEA rəhbərliyindən səs çıxmır. Çünki yazılanların 99 faizi düzdür. Ölkədə bir çox qurumlarda vəziyyət ürəkaçan deyil. Yəni faydasız akademiyadansa, funksional təhsil müəssisələri təsis etmək daha yaxşı olar. Bunun ölkəmizə daha çox iqtisadi faydası dəyə bilər. Akademiyada vəziyyət yalnız orada kök salan şəbəkə təmizlənəndən sonra düzələ bilər. Bəla burasındasır ki, yeni gələn kadrları da öz qəliblərinə salmağı bacarıblar. 5 il orada işləyən dönüb olur oradakı köhnə adam. Necə olur ki, AMEA-da 600 manat əmək haqqı alan alim gedib özünə bahalı həyat tərzi qura bilir? Hətta villa da tikdirəni var. Haradadır akademiyanı tar-mar edib yağmalayanlar? Haradadır o "dövlətçilik", "azərbaycançılıq", “dövlətə sədaqətlə xidmət” şüarları səsləndirməyin fonunda səlahiyyətlər əldə edib çalanlar, çapanlar, ölkəni viran qoyanlar, xalqın haqqını yeməklə nəvə-nəticə və kötücələrinə yem yığanlar, özləri az imiş kimi övladlarını “yağlı” vəzifələrə dürtüb sökənlər, dağıdanlar, xalqın övladlarını dərbədər edib düşmənə çevirənlər? Haradadır onlar? Haradadır elm-irfanla məşğul olanlar, cild-cild kitablar ifr-istehsal edib mənasız “şedevrlər”lə milyonları silənlər, haqqı əzib, nahaqqı mükafatlandıran namöhtərəm akademiklər? Haradadır onlarla saxta alim yetişdirən məsuliyyətsiz alimlər? Bu prosesi idarə edib "uğurla" başa çatdıranlar Azərbaycan üçün ən qorxulu düşmənlə müqayisə edilə bilərlər.
Varlığa qarnı ilə bağlanmış, milli-mənəvi dəyərləri peşəkarlıqla satmış zatlar cəzasız qalacaqlarsa, qurumun ləğv olunub-olunmamasının xalqa və dövlətə heç bir faydası olmayacaq”.
Məhəmmədəli QƏRİBLİ
