İyulun 26-da Tarif (qiymət) Şurasının növbəti iclasında bir sıra məsələlərə baxılıb. Qərara əsasən, orta ixtisas təhsili müəssisələrinə, ali təhsil müəssisələrinin bakalavriat səviyyəsinə, ali təhsil müəssisələrinin və Azərbaycan Milli Elmlər Akademiyasının magistratura səviyyəsinə və tibb təhsili üzrə rezidenturaya qəbul imtahanları, buraxılış imtahanları, həmçinin abituriyentlərin buraxılış imtahanı çərçivəsində əlavə verdikləri Azərbaycan dili (dövlət dili kimi), rus dili və coğrafiya fənləri üzrə fərq imtahanlarına dair, habelə ali və orta ixtisas təhsili müəssisələrinin xüsusi qabiliyyət tələb edən ixtisasları üzrə qabiliyyət imtahanları üzrə tarif tənzimlənməsi həyata keçirilib və yeni tarifləri müəyyənləşdirilib.
Tarif Şurasının orta ixtisas təhsili müəssisələrinə, ali təhsil müəssisələrinin bakalavriat səviyyəsinə, ali təhsil müəssisələri və digər sahələr üzrə qəbul üzrə tarifin qiymətinin qalxması narazılığa səbəb olub.
Natiq Cəfərli: “İmtahanların qiymət dəyişiklikləri ilə bağlı qərar çox müəmmalıdır”
İqtisadçı Natiq Cəfərli bildirdi ki, xidmət haqlarının qiyməti dəyişirsə, bu, qiymətlərə təsir göstərəcək.
Ümumiyyətlə, imtahanların qiymət dəyişiklikləri ilə bağlı qərar çox müəmmalıdır: “Belə qərarlar veriləndə heç vaxt əsaslandırma verilmir ki, qiymətlər niyə qalxır. Nə dəyişir ki, qiymətlər də dəyişir? Əsaslandırma mütləq olmalıdır, amma biz onu görmürük”.
Elçin Əfəndi: “Yeni müəyyən olunmuş qiymətlər ona əsaslanır ki, artıq ölkəyə 6-7 aydır kağızlar baha qiymətə gəlir”
Təhsil eksperti Elçin Əfəndi bildirdi ki, yeni müəyyən olunmuş qiymətlər ona əsaslanır ki, artıq ölkəyə 6-7 aydır kağızlar baha qiymətə gəlir: “Ümumi qiymət artımı kağızlarda həddən artıq çoxdur. Dövlət İmtahan Mərkəzi imtahanları kağız daşıyıcıları ilə etdiyi üçün müəyyən qiymət artımı mütləq gözlənilirdi. Bununla paralel olaraq imtahanlarda açıq yazılı suallar var ki, onlar müvafiq olaraq şagirdlər tərəfindən yazılır, müəllimlər tərəfindən yoxlanır. Dövlət İmtahan Mərkəzi tərəfindən həmin müəllimlərə müvafiq ödənişlər edilir. Təbii ki, bunlar da imtahan gəliri əsasında formalaşır. Qeyd edim ki, Dövlət İmtahan Mərkəzi publik hüquqi şəxsdir və özü-özünü maliyyələşdirir. Nəticə etibarilə də burada əldə olunan gəlir hesabına orada çalışan əməkdaşlara əmək haqqı ödənilir, imtahanlar keçirilir və ümumi yeni texniki vasitələrin əldə olunmasına xərclənir. Təbii ki, Dövlət İmtahan Mərkəzi tərəfindən bir sıra imtahanlar keçirilir və təbii ki, bunların hər birinin keçirilməsi müəyyən qədər xərc hesabına başa gəlir. Bu amillər nəzərə alınaraq, Dövlət İmtahan Mərkəzi və Tarif Şurasının razılığı əsasında qiymətlər artdı”.
Həmsöhbətimiz onu da əlavə etdi ki, yalnız təkrar imtahana girən şəxslər ödəniş ödəyəcəklər: “Düşünürəm ki, hazırda mövcud qiymətlər keçirilən imtahanlara və ümumi prosesə, demək olar ki, uyğun qiymətlərdir”.
Günel CƏLİLOVA
