İkinci Qarabağ müharibəsində öz qəhrəmanlığı ilə dastan yazan Vətən sevdalısı Ayxan Fariz oğlu Qurbanzadə Lənkəran rayonunun Şağlaküçə kəndində boya-başa çatmışdır. 22 yaşında Azərbaycanın bütövlüyü uğrunda canından keçən Ayxanın adı heç zaman milyonların yaddaşından silinməz. Çünki bu ad özündə şanlı hərb tariximizin ayrılmaz hissəsi olmaqla bütöv bir xalqın qəhrəmanlıq simvolunu yaşadır. Onu da bildirək ki, Lənkəranın elinin igid oğlu dövlət tərəfindən döyüşlər zamanı göstərdiyi rəşadətə görə "Vətən uğrunda", "Füzulinin azad olunmasına görə", "Cəsur döyüşçü” və "Şuşanın azad olunmasına görə medalları ilə təltif edilib. Daşına, torpağına bağlandığı doğma kəndində isə qalib şəhidin xatirəsinə bulaq kompleksi ucaldılıb. Onun açılış mərasimi də Ayxanın adına layiq təşkil olunmuşdu.
Bulağın açılış lentini Lənkəran Şəhər İcra Hakimiyyətinin başçısı Taleh Qaraşov şəhidin atası Fariz Qurbanovla birgə kəsdilər və önünə gül dəstələri düzüldü.
Çıxışlara Dövlət Himninin oxuması və Azərbaycanın bütövlüyü uğrunda canından keçən Vətən övladlarının xatirəsinin bir dəqiqəlik sükutla anılmaqla başlandı. Birinci söz alan icra başçısı T. Qaraşov oldu:- Şəhidlərin xatirəsinin əbədi olması üçün görülən işlər və irəli sürülən təşəbbüslər gənc nəslin vətənpərvər ruhda tərbiyə almasında misilsiz əhəmiyyətə malikdir. 44 günlük Vətən müharibəsində qazandığımız zəfər haqq mübarizəmizdə canını fəda edən, düşmənlə üz-üzə qorxmadan dayanan və daima irəli getmək əzmində olan gənc nəslinin hesabına əldə edildi. Qəhrəman övladlar yetişdirən bütün valideynlərə yalnız xalqın təşəkkürü düşür. İndi ölkədə cənab Prezident İlham Əliyevin və Birinci vitse- - FOTOprezident Mehriban xanım Əliyevanın şəhid ailələrinə, müharibə veteranlarına xüsusi diqqət və qayğısı vardır. Onların xüsusi tapşırıqları əsasında şəhidlərin adları ilə bağlı dəyərli işlər görülür və xatirələrinin yad edilməsi istiqamətində də mütəmadi şəkildə tədbirlər həyata keçirilir.
Digər çıxışçılar qalib şəhidin qısa, lakin şərəfli həyat yolundan, Vətən müharibəsində göstərdiyi şücaətdən söhbət açdılar, onunla qurur duyduğunu dedilər. Şəhidin atası Fariz Qurbanov dövlət başçısına, xalqına minnətdarlıq etməklə bərabər, bildirdi ki, Ayxan Vətən uğrunda şəhid olub. O, təkcə mənim yox, bütün Azərbaycanın fəxridir.
Çıxışlardan sonra məktəblilərin ifasında Vətəni, şəhidləri vəsf edən şerlər səsləndi və musiqi ifa olundu.
Zəfər ORUCOĞLU Azərbaycan Jurnalistlər Birliyinin üzvü
