İmzası ilə mediamızda fərqlənən, məzmunlu siyasi şərhləri, analitik yazıları ilə oxucuların rəğbətini qazanan əməkdaşımız, jurnalist, İkinci Qarabağ müharibəsi veteranı Nahid Salayev qələmini süngüyə çevirən həmkarlarımızdandır. 36 yaşı tamam olmasına və səfərbərlik yaşını adlamasına baxmayaraq, o könüllü olaraq səfərbərliyə alınmasını, müharibənin getdiyi ən qaynar nöqtəyə, ön cəbhəyə aparılmasını istədi.
Necə deyərlər, mülki geyimini əsgər formasına, qələmini isə avtomata, digər atıcı silahlara dəyişdi, Füzulidən Şuşaya qədər döyüş yolu keçdi, hər zaman ön cəbhədə vuruşdu. N.Salayev 44 günlük Vətən müharibəsinə könüllü getdi və bu gün başı uca, alnı açıq, üzü ağ vətən oğullarından biri kimi gəncliyə, böyüyən nəslə bir örnəkdir.
N.Salayev bildirdi ki, III qrup əlil olmasına və yaşının səfərbərlik üçün keçməsinə baxmayaraq, bu gün də Vətən çağırarsa, Ali Baş Komandan əmr verərsə yenə də döyüşməyə hazırdır. “10 ildən artıqdır ki, milli jurnalistikamızın məcazi mənada böyük adının bir kiçicik hərfi olmaq üçün çalışıram. Nə qədər bacardığımı oxucular bilər yəqin. Müqəddəs gün - bizə qisas almağa, itirdiklərimizi qaytarmağa cənab Ali Baş Komandanımız tərəfindən fürsət verildiyi gün mən də qələmimi yerə qoyub, 36 yaşımın olmasına baxmayaraq (səfərbərlik həmin günə qədər 35 yaşı tamam olmamış şəxslərə şamil olunur-zabitlər istisna olmaqla), könüllü olaraq ordu sıralarına qoşulmuşam. 2 dəfə yaralanmağıma baxmayaraq dekabrın 1-nə, yəni Laçın azad olunan günə qədər ayaq üstə durmağı bacarıb, elə həmin gün tibb xərəyində (aldığım xəsarətdən dolayı artıq yeriyə bilmədiyimə görə) hospitala ağır vəziyyətdə təxliyyə olunmuşam. Füzulidən Şuşaya qədər bir döyüş yolu keçmişəm”.
Hospitaldan müalicədən təxliyə olunduqdan sonra səhhətində ağırlaşmaların olduğunu qeyd edən N.Salayev bildirir ki, ağrılar getdikcə şiddətlənməyə başlayıb. Müharibədən sonra bir neçə dəfə müalicə kursu keçdiyini bildirən əməkdaşımız deyir ki, bu dövr ərzində səhhətində hər hansı bir irəliləyiş olmayıb: “Böyük müalicə kursları keçdim, amma faydasını görmədim. Onu da deyim ki, müharibədən keçən 2 ilə yaxın müddət ərzində butün müalicə xərclərimi özüm qarşıladım, heç kəsin qapısını döymədim. 2022-ci ilin iyul ayında mənə III qrup əlillik dərəcəsi təyin olundu. Buna görə Əmək və Əhalinin Sosial Müdafiəsi Nazirliyinə xüsusi təşəkkürümü bildirirəm. Bu qurumun tərəfindən obyektiv qiymətləndirmə aparıldı və mənə III qrup əlillik dərəcəsi təyin edildi. Əlillik təyinatı aparılana qədər çox ciddi müalicə kursları keçdim, bu gün də müalicəm dayanmayıb, davam edir. Bu müalicəni də öz şəxsi büdcəm hesabına aldığımı xüsusi vurğulamaq istəyirəm. Ümumiyyətlə, mən heç vaxt kimlərisə narahat etmək fikrində olmamışam ki, müalicəmə kömək edin. Bir neçə dəfə “YAŞAT” Fondu mənimlə maraqlansa da, müalicəmə dəstək göstərmək istəsə də, köməkdən imtina etmişəm, özüm öz müalicəmlə məşğul olmuşam. Lakin dediyim kimi, səhhətimdə sonradan ağırlaşmalar baş verdiyindən, əlillik təyinatı üçün sənədlərim Əmək və Əhalinin Sosial Müdafiəsi Nazirliyinə göndərildi. Bundan sonra mənə III qrup əlillik təyin olunub, III qrup müharibə əliliyəm. III qrup əlil olmağıma və səhhətimin qaydasında olmamasına baxmayaraq, Ali Baş Komandan əmr verərsə, yenə də silaha sarılmağa hazıram”.
İradə SARIYEVA
