Bu günlərdə Zəngilanın Ağalı kəndinə "Böyük Qayıdış" baş tutdu. İlkin mərhələdə 58 nəfərdən ibarət 10 ailə Zəngilan rayonunun Ağalı kəndinə köçürülüb. Sakinlərin köçürülməsi növbəti günlərdə də davam edəcək.
Prezident İlham Əliyev torpaqların işğaldan azad olunmasından sonra artıq keçmiş məcburi köçkünlər üçün mənzillərin Bakı, Sumqayıt və digər şəhərlərdə deyil, işğaldan azad olunmuş ərazilərdə inşa ediləcəyini vurğulayıb. Bu köç məcburi köçkünlərin məskunlaşdığı binaların gələcək taleyi ilə bağlı müəyyən suallara yol açıb.
DOST Rəqəmsal İnnovasiyalar Mərkəzinin direktoru Kənan Əkpərov media nümayəndələrinə açıqlamasında qeyd edib ki, məcburi köçkünlər üçün tikilmiş mənzillərin satışına dair portal yaradılacaq: “Qaçqın və Məcburi Köçkünlərin İşləri üzrə Dövlət Komitəsinin balansında olan mənzillər Əmək və Əhalinin Sosial Müdafiəsi Nazirliyinin balansına verilib və həmin mənzillərin satışından əldə edilən vəsait hesabında regionlarda mənzilə ehtiyacı olan şəxslər üçün evlər tikiləcək”.
“Hazırda evə ehtiyacı olanlar daha çoxdur, 100 minlərlə insan var ki…”
Mövzu ilə bağlı fikir bildirən daşınmaz əmlak məsələləri üzrə ekspert Elnur Fərzəliyev qeyd etdi ki, torpaqlarımız işğaldan azad edildikdən sonra məcburi köçkünlər üçün tikilib təhvil verilməyən evlər vardı, 5 min civarında mənzil idi: “Onlar həm şəhid ailələrinə və Qarabağ əlillərinə veriləcəkdi. Qalanları isə satıldıqdan sonra əldə edilən gəlirlə bölgələdəki şəhid və qazi ailələrinə binalar tikilib veriləcəkdi. Yəni ilk olaraq proses bu cür olacaqdı. Bölgələrə gəldikdə, vəziyyət belədir ki, bəzilərində böyük bir hissə boşluqdur. Rayon, kənd və qəsəbələrdə daşınmaz əmlakın qiymətləri həm ucuzdur, həm də bəzi yerlərdə tələbat yoxdur. Ancaq bəzi yerlər turistik zonalardır və tələbat var, qiymət də yüksəkdir. Bu ərazilər isə çox deyil, barmaqla sayılacaq qədərdir. Hazırda Azərbaycan əhalisinin böyük hissəsi Bakıdadır. Təhsil ocaqları, nazirliklər, iş yerləri paytaxtda yerləşdiyinə, burada tikinti və iqtisadi vəziyyət bölgələrdən daha yaxşı olduğuna görə bölgələrə elə də axın yoxdur. Ancaq bölgələrdə də mənzilə ehtiyacı olanlar, müəllimlərimiz, dövlət qulluqçuları var ki, illərdir orada çalışırlar, evləri yoxdur. Bununla yanaşı, Bakıda hazırda evə ehtiyacı olanlar daha çoxdur. Belə ki, 100 minlərlə insan var ki, nağd ala bilmir, rəsmi gəliri yoxdursa, bank kreditindən yararlanmaq imkanı yoxdur. Həmçinin gənclərimiz var ki, evsizliklə bağlı ailə qura bilmir. Bölgələrdə çalışan, məsələn, müəllimlər var. MİDA-nın ev ala bilən kateqoriyalardan biri də müəllimlərdir. Bu cür layihələr bölgələrdə aparılmalıdır. Evi olmayan və rəsmi gəliri olan vətəndaşlar ondan yararlana bilər. Ümumilikdə isə evsizlik problemi böyük şəhərlərdə, əsasən Bakıdadır. Mənzillərin bölgələrdə hansı formada, hansı kateqoriyadan olan insanlara veriləcəyi ilə bağlı hələ ki, qərar açıqlanmadığına görə fikir söyləmək çətindir”.
Günel CƏLİLOVA
