İstənilən dövlət təşkilatının keçirdiyi qrant müsabiqələri söz-söhbətsiz, qalmaqalsız ötüşmür. Ən böyük müzakirələr isə əsasən müsabiqələrin nəticələri elan olunduqdan sonra başlayır. Zaman-zaman Təhsil Nazirliyinin keçirdiyi qrant müsabiqələrinin də nəticələri müzakirələrə səbəb olub, hətta təniqdə məruz qalıb.
Məlum olduğu kimi, təhsildə inkişaf və innovasiyalar üzrə IV qrant müsabiqəsinin nəticələri elan olunub. Bu barədə məlumatlar yayılar-yayılmaz, dərhal fikirlər, rəylər meydana çıxdı. Müsabiqənin nəticələri sosial şəbəkələrdə tənqid olunmağa başladı. Bəzi mütəxəssislər deyir ki, Təhsil Nazirliyi qrant layihələri elan etməklə dövlət büdcəsini dağıdır. Qeyd edilir ki, bu vəsait uçuq-sökük məktəblərin təmirinə və digər məktəblə bağlı zəruri şeylərə ayrılsaydı daha düzgün olardı, amma başqa sahəyə yönəldilir. Sosial mediada belə iddialar da var.
Nə baş verir, doğrudanmı bu vəsait boşuna yönəldilir, uçuq məktəblərin təmirinə və başqa bu tipli məsələlərin həllinə yönəldilmir? Qrant müsabiqələrinə ayrılan vəsait məqsədyönlü xərclənirmi?
“...Qrant layihələrinə bu qədər vəsait ayırıb büdcənin pulunu yeyib dağıtmaqdansa...”
Nazirliyin keçirdiyi qrant münasibəti ilə bağlı öz fikri olan tanınmış təhsil eksperti Elçin Əfəndi “Bakı-Xəbər”ə bildirdi ki, təhsildə inkişaf və innovasiyalar üzrə IV qrant müsabiqəsinin nəticələri elan olunub və burada müvafiq olaraq müəllimlərin layihələrinə qrant ayrıldı: “Halbuki, o müəllimlərin bəlkə də 30-40 faizinin bu prosesdən xəbəri yoxdur. Bu qrant layihələrini kimlər yazıb, kimlər təqdim edib, bundan həmin müəllimlər xəbərsizdir. Bundan da görünən ondan ibarətdir ki, kimlərsə dövlət büdcəsindən “qrant layihələri” adı altında pulları yeyir, silir. Yaxud da ora layihə verən həqiqətən də iş görmək istəyən müəllimlərdirsə, onlar layihə ilə məşğul olacaqlarsa bəs onların dərslərini kim keçəcək? Təbii ki, bunlar hamısı ciddi suallar doğuran məqamlardır. Nəzərinizə çatdırım ki, mən bu barədə iyulun 26-da fikrimi bildirdim. İndi də sizin qəzetinizin vasitəsilə demək istəyirəm ki, qrant layihələrinə bu qədər vəsait ayırıb büdcənin pulunu yeyib dağıtmaqdansa müvafiq olaraq rayon məktəblərində, hətta Bakı şəhərinin özündə xaraba günündə olan, dağılıb-sökülən, uçan məktəblər var, onları əsaslı şəkildə təmir etmək min dəfə yaxşıdır. Eyni zamanda məktəblərə ağıllı lövhələr alıb vermək, məktəblərin maddi-texniki təminatını düzəltmək lazımdır. Bunun əvəzinə qrant müsabiqəsinə bu qədər pul ayrılıb. Bu böyük vəsaitdir və bunun hesabına nə qədər tələbənin təhsil haqqını ödəyə bilərdik. Sadəcə, bəlli məqam odur ki, el dili ilə desək, bu kimlərinsə konkert olaraq pulu büdcədən çıxarıb “başına daş salmaq” məqsədinə xidmət edir”.
Qrant müsabiqəsinə ayrılan pulun məqsədyönlü xərclənməsinə hər hansı bir ehtimal olub-olmadığına gəlincə, E.Əfəndinin sözlərinə görə, qaliblərin arasında tanıdığı şəxslər də var və onların bu vəsaitdən müəyyən qədər məqsədyönlü şəkildə istifadə edəcəyinə şübhə etmir. “Amma burada maraqlı məqam odur ki, o şəxslər onlara ayrılan o pulu tam olaraq ala biləcəklərmi? Yaxud da orada elə layihələr var ki, o layihələri adi insanlar müvafiq olaraq özləri də tətbiq edə, ya da haradasa köçürə bilərlər. Çox primitiv layihələr var ki, onları qalib elan edib onlara vəsait ödəyirlər. Buradan da bəllidir ki, məqsəd tamamilə fərqlidir” - deyə E.Əfəndi bildirdi.
Mövzu ilə bağlı Təhsil Nazirliyinin mövqeyini öyrənə bilmədik, ümid edirik ki, nazirlik bu məsələ ilə bağlı mətbuata və ictimaiyyətə açıqlama verəcək, qaliblərin adlarını açıqlayacaq.
İradə SARIYEVA
