“Bakı, Sumqayıt və Abşeron rayonlarında şəhid ailələrinin evlə təminatı məsələləri artıq yekunlaşmaq üzrədir”. Bunu Prezident İlham Əliyev Masallı, Lerik və Göygöl rayonlarına təyin edilən yeni başçılarını qəbul edərkən deyib.
Ölkə başçısı qeyd edib ki, digər rayonlarda da evlər tikiləcək: “Şəhid ailələrinə xüsusi diqqət göstərilməlidir. Dövlət tərəfindən bu diqqət daim göstərilir. İkinci Qarabağ müharibəsindən əvvəl və İkinci Qarabağ müharibəsindən sonra şəhid ailələri daim diqqət mərkəzindədir. Bilirsiniz ki, mənim şəhid ailələri, müharibə əlilləri ilə çoxsaylı görüşlərim olub. Onların məişət problemləri dövlət xətti ilə həll olunur, 12 min 500-dən çox şəhid ailəsinə dövlət tərəfindən mənzillər, fərdi evlər verilmişdir, minlərlə minik maşınları verilmişdir. Bu proses davam etdirilir. Bakı, Sumqayıt və Abşeron rayonlarında şəhid ailələrinin evlə təminatı məsələləri artıq yekunlaşmaq üzrədir. Digər rayonlarda da dövlət xətti ilə bu iş görüləcək. Yəni dövlət öz üzərinə düşən vəzifəni icra edir”.
Həqiqətən də son illər Birinci və İkinci Qarabağ müharibəsi əlillərinin, şəhid ailələrinin mənzil təminatı ilə bağlı xeyli işlər görülüb. Görünən odur ki, Bakı, Abşeron və Sumqayıtda bu işlər yekunlaşmaq üzrədir. Qalır rayonlar.
Maraqlıdır, regionlarda müharibə əlilləri və şəhid ailələrinin mənzillə təmin edilməsinə başlanması və həyata keçirilməsi təxminən neçə müddədə mümkündür? Azərbaycan dövlətinin bununla bağlı imkanları nə qədərdir?
“Tikinti şirkətlərini səfərbər etməklə bu işi başa çatdırmaq olar”
Sözügedən məsələyə aydınlıq gətirən iqtisad üzrə fəlsəfə doktoru Firdovsi Şahbazov hesab edir ki, maksimum 3 ilə bütün rayonlarda şəhid ailələri və müharibə əlillərini mənzillə təmin etmək mümkündür: “Onsuz da neçə illərdir rayonlarda bu işlər görülür. Rayon məkkəzlərində bu kateqoriyadan olan şəxslər üçün binalar tikilir. O cümlədən, respublika tabeliyində olan şəhərlərdə - Gəncə, Mingəçevir, Şirvan şəhərlərində binalar tikilir. Kəndlərdə isə fərdi evlər tikilir. Azərbaycan hökuməti bütün şəhid ailələrini və qaziləri mənzillə təmin etmək imkanına malikdir. Tikinti işlərini sürətləndirmək üçün fiziki imkanlar da var. Maksimum 3 il ərzində bölgələrdə bütün şəhid ailələri və qaziləri evlə təmin etmək mümkündür. Tikinti şirkətlərini səfərbər etməklə bu işi başa çatdırmaq olar. Bu minvalla birdəfəlik sözügedən problem həll ediləcək. Onsuz da rayonlarda nə qədər şəhid ailəsinin mənzilə ehtiyacı olması ilə bağlı icra hakimiyyətlərində məlumat var. Sadəcə, bununla bağlı işləri sürətləndirmək lazımdır”.
Ekspert onu da əlavə etdi ki, bu istiqamətdə səyləri artırmaq lazımdır.
Vidadi ORDAHALLI
