Buzovnada dəniz sahilini zəbt edən hasarların və mülklərin sökülməsinə birbaşa Prezident İlham Əliyev göstəriş veribmiş. Bu barədə Prezident İlham Əliyevin Araz Əhmədovu Masallı Rayon İcra Hakimiyyətinin başçısı, Əkbər Abbasovu Lerik Rayon İcra Hakimiyyətinin başçısı və Elvin Paşayevi Göygöl Rayon İcra Hakimiyyətinin başçısı vəzifələrinə təyin olunmaları ilə əlaqədar qəbul edərkən etdiyi çıxışdan aydın olub.
Prezident bildirib ki, bu yaxınlarda ictimaiyyətin bir qrup nümayəndəsi ona müraciət edib ki, böyük tarixə malik olan Buzovna qayaları bəzi insanlar tərəfindən zəbt edilib: “Mən Bakı Şəhər İcra Hakimiyyətinin başçısına dərhal göstəriş verdim ki, bu məsələ araşdırılsın, mənə məruzə edilsin və mənə məruzə edildi. Çox böyük pozuntular aşkarlandı, çox böyük pozuntular. Bu qanunsuz əməllərə kimlər əl atıb? Dövlət məmurları və bəzi dırnaqarası sahibkarlar! Onların da siyahısı var. Bu, tarixə qarşı, bizim təbiətimizə qarşı cinayətdir. Bu qayalar Bakının rəmzidir, bu qayalar əsrlər boyu sahilimizin gözəlliyini əks etdirirdi. Bu qayalara insanlar yaxınlaşırdı, orada filmlər çəkilirdi. Kimsə bunu zəbt edir, onları sındırır, özləri üçün villa tikir”.
Prezident İlham Əliyev qeyd edib ki, bu işlərə rəvac verən və bəzi dövlət məmurlarını, yerli icra orqanlarını bu qanunsuz işlərə təhrik edən insanlar hakimiyyətdən uzaqlaşdırıldı: “Hakimiyyət təmizlənir və insanlar da bunu görürlər”. Bu qanunsuz əməllərə son qoyulmasını tapşıran İlham Əliyev belə şəxslərin cəzalandırılacağını vurğulayıb.
Belə çıxır ki, Prezidentin müdaxiləsi olmasaydı Azərbaycan tarixinə aid olan qiymətli tarixi nümunələr məsuliyyətsiz məmur və iş adamlarının sövdələşməsi nəticəsində məhv ediləcəkdi? Bəs bu məmurların və iş adamlarının vicdanı harda qalıb?
Hüquqşunas Mehman Muradlı “Bakı-Xəbər”ə açıqlamasında bildirdi ki, Prezidentin son çıxışından bir daha məlum oldu ki, ölkənin bütün əraziləri boyu qanunsuz tikintilər aparılıb: “Hətta şəhərsalma ilə bağlı ciddi problemlərin olduğu bildirildi. Uzun illər ərzində davam edən bu prosesi birdən-birə nizamlamaq olmaz. Fərdləri tapıb cəzalandırmaq mümkündür, ancaq həmin çoxmətəbəli binaları və ya yaşayış massivlərini sökmək mümkün deyil. Buna həm külli miqdarda vəsait lazımdır, həm də bunun kütləvi narazılıq doğura biləcəyini nəzərə almalıyıq. Dənizlə bağlı vəziyyət daha acınacaqlıdır. Əksər ərazilərdə əhalinin dənizə girişini bağlayıblar. İndi üzə çıxır ki, həm də tarixi abidələri məhv edib, özlərinə istirahət mərkəzi və villalar tikiblər. Bunu etmək üçün həm iş adamında, həm də ona icazə verən məmurda vicdan hissi olmalıdır. Bu addım Vətənə çox ağır zərbə anlamına gəlir. Tarixi abidələrimizi göz bəbəyi kimi qorumalıyıq. Bizim məmurlar isə onun məhvinə imza atır. Bax, bu səhvləri bağışlamaq olmaz. Prezident dedi ki, onların siyahısı var. Yəqin ki, barələrində hüquqa müvafiq tədbirlər görüləcək. Ancaq bundan istifadə edib, prosesi qanuni istirahət mərkəzlərinə qarşı kampaniyaçılığa da çevirmək lazım deyil. Dəniz kənarında qanunauyğun fəaliyyət göstərən yerlərə toxunmaq olmaz.
Xəzər dənizinin (gölünün) Azərbaycan Respublikasına mənsub olan bölməsinin sahilboyu 20-50 metrlik zolağına aid olan torpaq sahələri ilə bağlı tələblərin pozulmasına görə fiziki, vəzifəli və hüquqi şəxslər müvafiq olaraq 4 min manat, 8 min manat və 40 min manat cərimələnir. Həmçinin Cinayət Məcəlləsində Xəzər dənizinin sahilboyu 20-50 metrlik zolağının altında olan torpaqlara münasibətdə vəzifəli şəxslər üçün 7 ildən 10 ilədək müddətə azadlıqdan məhrum etmə nəzərdə tutulub.
Bu hallar torpaq qanunvericiliyinin ciddi şəkildə pozulmasına səbəb olmaqla yanaşı, vətəndaşların Xəzər sahilində istirahət hüququnu da məhdudlaşdırır, bəzən tamamilə mümkünsüz edir. Eyni zamanda sahilboyu ərazilərin qanunsuz olaraq hasarlanması həmin yerin panoramik görünüşünü pozur. Bu isə turizm baxımından mənfi fəsadlara gətirib çıxarır. Göründüyü kimi, qanunvericiliyimizdə də bununla bağlı sərt cəzalar var”.
Məhəmmədəli QƏRİBLİ
