“Bəzi dövlət məmurları və bəzi sahibkarlar tərəfindən böyük torpaq sahələri hasarlanmışdır, qanunsuz zəbt edilmişdir”. Bunu Prezident İlham Əliyev Araz Əhmədovu Masallı Rayon İcra Hakimiyyətinin başçısı, Əkbər Abbasovu Lerik Rayon İcra Hakimiyyətinin başçısı və Elvin Paşayevi Göygöl Rayon İcra Hakimiyyətinin başçısı vəzifələrinə təyin olunmaları ilə əlaqədar qəbul edərkən deyib.
Dövlət başçısı bildirib: “Eyni zamanda, hər üç rayonda kənd təsərrüfatının inkişafı üçün də çox gözəl imkanlar var. Burada da müasir tələblərə uyğun kənd təsərrüfatı yaradılmalıdır. Müasir aqrotexniki tədbirlərin görülməsi, tətbiq edilməsi şərtilə heyvandarlıq, bitkiçilik rayonların xüsusiyyətlərinə görə inkişaf etməlidir. Bununla bağlı olan çox ciddi məsələ torpaqlardan səmərəli istifadə edilməsidir. Əfsuslar olsun ki, əvvəlki illərdə bəzi dövlət məmurları və bəzi sahibkarlar tərəfindən böyük torpaq sahələri hasarlanmışdır, qanunsuz zəbt edilmişdir. Kənd təsərrüfatı üçün nəzərdə tutulan torpaqlarda ya evlər tikilmişdir, ya da ki, sadəcə olaraq, o sahələr hasarlanıb kiminsə mülkiyyətinə çevrilmişdir. Biz bu məsələni bu yaxınlarda ciddi araşdırmağa başladıq və gördük ki, burada çox böyük pozuntular var. Vəzifəli şəxslər yerli icra orqanlarının nümayəndələrinə göstəriş verirdilər ki, o torpağı mənə ver, bu torpağı mənə ver. Beləliklə də torpaq fondu azalırdı və torpaqların qanunsuz zəbt edilməsi prosesi, əfsuslar olsun ki, geniş vüsət almışdır. Bu təkcə regionlara aid olan məsələ deyil, Bakı şəhərində, Abşeron yarımadasında da belə hallar var...”
Prezident ölkə ərazisində torpaq fondunun hansı şəkildə və kimlərin əli ilə talandığını dəqiq və aydın şəkildə göstərdi, bildirdi ki, bu qanunsuzluqlar icra başçılarının əli ilə baş verib.
“Azərbaycanda torpaq fondunun icra başçılarının əli ilə talan edilməsi, onların qanunsuz zəbt edilməsinə imkan verilməsi təəssüf doğurur”
Siyasi ekspert Rövşən Rəsulov “Bakı-Xəbər”ə şərhində bildirdi ki, icra başçılarının torpaqların qanunsuz zəbt edilməsinə “xeyir-dua” verməsi məsələsinin şəxsən ölkə başçısı tərəfindən dəqiqliklə ifadə olunması onların nə qədər böyük qanunsuluğa yol verdiyinin əyani sübutudur. İllərdir kəndlərdə, rayonlarda, Bakı ətrafı qəsəbələrdə icra başçıları ilə sahibkarların, varlı şəxslərin sövdələşməsi nəticəsində qanunsuz olaraq torpaqların zəbt edildiyini vurğulayan R.Rəsulovun bildirdiyinə görə, bunların qanunsuz əməlləri sərhədləri o qədər aşıb ki, baş verənlərə ölkə başçısı bu qədər sərt reaksiya verib. “Azərbaycanda torpaq fondunun icra başçılarının əli ilə talan edilməsi, onların qanunsuz zəbt edilməsinə imkan verilməsi təəssüf doğurur. Müxtəlif rayonlarda əkinə yararlı torpaq sahələrinin satılması, qanunsuz olaraq zəbt edilməsi kimi hallar cəmiyyətdə hər zaman ciddi narazılıq yaradıb. Xüsusən də dəniz sahilindəki ərazilərin zəbt edilməsi, orada müxtəlif iaşə obyektlərinin tikilməsi və sair buna sübutdur. Əgər belə olmasaydı, əlbəttə, cənab Prezident yeni təyin etdiyi icra başçılarını qəbul edərkən bu məsələni qabartmazdı. Prezident icra başçılarının və bəzi dırnaqarası sahibkarların torpaq sövdələşməsini, alverini çox detallı şəkildə açdı və onları ifşa etdi. Prezidentin reaksiyası cəmiyyətin ürəyindən olub.
Bu gün heç də düşünmək olmaz ki, cənab Prezidentin bu kimi məsələlədən xəbəri yoxdur. Xeyr. Cənab Prezidentin hər şeydən xəbəri var, hansı icra başçısının hansı əməllər törətdiyini bilir və lazım olan anda da öz qəti qərarını verir. Ölkəmizin rayonlarında torpaq fondunun zəbt edilməsi, talanması, dağıdılması kimi neqativ hallara yol verən icra başçıları prezident tərəfindən dəfələrlə ifşa edilib”.
R.Rəsulov qeyd etdi ki, bəzi rayonların icra başçılarının dəyişdirilməsi, yeni təyinatlar bu neqativ halların aradan qaldırılmasına və xalqın rifahının yüksəlməsinə xidmət edir: “Məlumdur ki, cənab Prezident bir neçə dəfə ölkədə digər sahələrdə islahatlarla yanaşı kadr islahatları aparılacağını da bəyan edib və bu islahatlar ilk növbədə vətəndaşların xidmətində dayanan müxtəlif dövlət qurumlarına aid olacaq. Bu gün də görürük ki, icra halimiyyətlərində, digər icraedici strukturlarda kadr dəyişiklikləri baş verir. Bu dəyişikliklərin hamısı bilavasitə xalqın rifahının, həyat səviyyəsinin yaxşılaşmasına, xalqa xidmətin yüksək səviyyəyə qaldırılmasına hesablanıb. Digər tərəfdən, əvvəlki məmurlardan fərqli olaraq, indiki icra başçıları müəyyən mənada öz işlərinin öhtəsindən gəlməyə çalışırlar. Ən azı bu da cəhddir, pozitiv çalışmaq, işləmək funksiyasıdır ki, xalq ümid edir ki, həmin bu pozitiv çalışma funksiyaları yaxın gələcəkdə öz müsbət nəticələrinu verəcək. Lakin biz neqativ halları da deməliyik. Məsələn, cənab Prezidentin bir müddət əvvəl təyin etdiyi elə icra başçıları var ki, onlar öz işlərinin öhdəsindən nəinki gələ bilmirlər, ölkə başçısının onlara verdiyi tapşırıqları ya layiqincə icra edə bilmirlər, yaxud kreslolarına bağlılıq buna imkan vermir. Təəssüf ki, belə icra başçıları da var. Belə hallarda, təbii ki, xalqın da narazılığı yaranır”.
R.Rəsulov hesab edir ki, Prezidentin böyük etimad göstərib icra başçısı təyin etdiyi şəxslər işə başlayan kimi bu kimi hallarla ciddi məşğul olacaq, rəhbərlik etdikləri rayonların sosial-iqtisadi inkişafı üçün əllərindən gələni edəcəklər, ölkə başçısının etimadını və xalqın ümidlərini doğruldacaqlar. “Əks halda, dövlət başçısının vurğuladığı kimi, hər hansı qanunsuz əməllərə yol verəcəklərsə mütləq mənada cəzalandırılacaqlar. Cənab Prezident bununla bir daha bəyan etdi ki, ölkədə qanun da var, qanunu pozanlara qarşı cəza da var. Bu baxımdan, müxtəlif vəzifələrdə, yerli qurumlarda çalışan yüksək çinli məmurlar artıq bu reallığı dərk etməli və qollarını çırmayıb birbaşa xalqa xidmət etməlidirlər”- deyə R.Rəsulov vurğuladı.
İradə SARIYEVA
