Saatlı rayonunun bir neçə kəndində suya ən çox ehtiyacın olduğu vaxtda su tapılmır. Problem Mircəlal, Soltanabad və Nəsimi kəndlərində daha qabarıq şəkildə özünü büruzə verir. Həmin kəndlərin sakinləri iddia edir ki, su olmadığı üçün pambıq tarlalarını suvara bilmirlər.
Nəticədə sahələr məhv olmaq üzrədir: “Bu dövrdə pambıq tarlaları ikinci dəfə suvarılmalıdır. Mövcud problem səbəbindən sahələr heç bir dəfə də suvarılmayıb”.
Saatlı Suvarma Sistemləri İdarəsi: “Hazırda çətinliyin aradan qaldırılması üçün mümkün işlər görülür”
Məsələ ilə bağlı Saatlı Suvarma Sistemləri İdarəsinin Mircəlal kənd ərazisi üzrə Sudan İstifadə Birliyindən bildirildi ki, adıçəkilən kəndlər rayon üzrə istifadə olunan suvarma kanallarının mənsəbində yerləşdiyi üçün su çatıçmazlığı yaşanır. Hazırda çətinliyin aradan qaldırılması üçün mümkün işlər görülür.
Elxan Əliyev: “Aran bölgəsində yerləşən su kanallarının çoxu müasir tələblərə cavab vermir, su ötürülən vaxt itkiyə məruz qalır”
Sosial sahə üzrə ekspert Elxan Əliyev qeyd etdi ki, əkinçiliklə məşğul olan kənd sakinlərini taleyin ümidinə buraxmaq doğru deyil: “Nəzərə almaq lazımdır ki, Azərbaycanın su ehtiyatlarının 70 faizi ölkə xaricində formalaşır. Bu o deməkdir ki, su mənbələri xarici dövlətlərin ərazisində yerləşir. Bu zaman həmin sulardan istifadə edildiyi üçün Kür və Arazın suyu azalır. Söhbət ondan gedir ki, Türkiyə, Gürcüstan, Ermənistan və İran ərazisindən bu çaylar keçdiyi üçün suyun həcmi azalır. Üstəlik, son illər müşahidə olunan qlobal iqlim dəyişiklikləri səbəbindən yaşanan quraqlıq su ehtiyatlarının azalmasına təsir edir. Ona görə də su ehtiyatlarından maksimum səmərəli istifadə olunmalıdır. Aran bölgəsində yerləşən su kanallarının çoxu müasir tələblərə cavab vermir. Su ötürülən vaxt itkiyə məruz qalır. Ona görə də su kanalları yenidən qurulmalı, su itkisinin qarşısı alınmalıdır. Sudan əziyyət çəkən kəndlərin uçotu aparılmalı və su təchizatını yaxşılaşdırmaq üçün proqram hazırlanmalıdır. Bütün bu kompleks tədbirlər nəticəsində problem həllini tapa bilər”.
Həmsöhbətimiz onu da əlavə etdi ki, fermerlər çıxılmaz durumdadır. Çünki su yoxdur. Bilmir dərdini kimə desin. Dərd orasındadır ki, regionlarda məmurlar vəzifəsini yerinə yetirmir. Əslində bu çətin bir iş deyil: “Bu gün elmi-texniki tərəqqinin imkanları genişdir. Süni peyklə müəyyən etmək olar ki, Saatlının hansı ərazilərində problem var. Hektarlarla pampıq sahəsi suvarılmırsa, deməli ortada ciddi məmur səhlənkarlığı var”.
Günel CƏLİLOVA
