30 il yağıya əsir düşən əzəli yurd yerimiz Qarabağın azadlığı uğrunda şücaət göstərərək şəhidlik zirvəsinə ucalan igidlərdən biri də Orxan Mübariz oğlu Dənziyevdir. Lerik rayonunun Laman kəndində dünyaya göz açan bu dağlar qartalının ömür yolu cəmi 18 il oldu. Lakin o, Vətəninə, xalqına ilahi bir Qələbə hissi yaşatmaqla əbədi olaraq milyonların yaddaşına yazıldı. İndi doğma Laman kəndində böyük də, kiçik də Orxanı özlərinə iftixar mənbəyi bilir, həmişə onun adını uca tuturlar. Burada şəhidin xatirəsinə bulaq kompleksi də inşa edilibdir. Kəndin ən yaraşıqlı guşəsində yerləşən bu saf sulu çeşmə insanların ən çox olduğu yerdir. Bulaq kompleksin açılış mərasımi çox möhtəşəm keçdi. Əvvəlcə Dövlət Himni oxundu, buraya toplaşan yüzlərlə ziyarətçi Vətən naminə canından keçən şəhidlərin əziz xatirəsini bir dəqiqəlik sükutla yad etdilər. Şəhidə ehtiram əlaməti olaraq bulaq kompleksin önünə düzülən əkil və gül-çiçək dəstələrin sayı bilinmirdi...
Tədbirdə rayon İcra Hakimiyyəti başçısının səlahiyyətlərini icra edən Cəlil Baxşıyev çıxışında dedi: - Vətən müharibəsində Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi altında müzəffər Azərbaycan Ordusu işğal altında olan Qarabağımızı 44 günə azad etdi. Bu möhtəşəm qələbə şəhid övladlarımızın qanı, canı bahasına qazanıldı. İndi ölkəmizin ərazi bütövlüyü uğrunda gedən döyüşlərdə canından keçmiş qəhrəman oğlanların xatirəsini xalqımız həmişə ehtiramla yad edir. Həm Birinci, həm İkinci Qarabağ müharibəsində lerikli igidlər də hərbi əməliyyatlarda misilsiz rəşadət göstəriblər. Cənab Prezidentin müvafiq sərəncamları əsasında “Vətən Müharibəsi Qəhrəmanı” adı verilmiş, müxtəlif orden və medallarla təltif olunmuş hərbi qulluqçuların arasında leriklilərin adları çoxdur. O, cümlədən bu kəndin qəhrəman oğlu, Vətən müharibəsi şəhidi Orxan “Vətən uğrunda”, Suqovuşanın və Ağdamın azad olmasına görə medallar layiq görülübdür. Dağlar qartalımız Vətən uğrunda şəhid olduğu üçün keçdiyi qısa həyat yolu qəhrəmanlıq məktəbi kimi tarixə yazıldı.
Kənd ağsaqqalı, şəhidin müəllimi Babalı Quliyev, Nəbi Mirzəyev, Əkrəm Abdullayev öz çıxışlarında şəhid haqqında xatirələrini bölüşdülər və Orxanın əbədi ürəklərdə yurd-yuva qurduğunu dedilər. Şəhidin atası Mübariz və əmisi Nağdəli Dənziyevlər də qürurlu danışdılar. Axırda ölkədə şəhid ailələrinə göstərilən diqqət və qayğıya görə Prezident İlham Əliyevə, Birinci vitse-prezident Mehriban xanım Əliyevaya, eləcə tədbir iştirakçılarına minnətdarlığını bildirdilər.
Açılışında Lerik Rayon İcra Hakimiyyəti başçısının səlahiyyətlərini icra edən Cəlil Baxşıyevin, rayonun hüquq mühafizə orqanlarının, idarə müəssisə və təşkilatların rəhbərlərin, şəhid ailələrinin üzvləri və kənd ictimaiyyətinin nümayəndələrin iştirak etdi mərasım məktəblilərin ifasında şəhidə həsr olunmuş şerlər və mahnılarla tamamlandı.
Zəfər ORUCOĞLU Azərbaycan Jurnalistlər Birliyinin üzvü
