Boşanan qadınların həyatında dəyişən amillər kişilərdən fərqlidir. Boşanan hər qadının fərqli problemləri olur. Yaxşı sosial dəstək və mübarizə bacarıqları üstün olanlar bu vəziyyəti daha yaxşı idarə edir. Lakin onlar yenə də əziyyət çəkirlər. Bəlkə də bu əziyyət qadınların həyatdakı bir çox problemlərə bundan sonra təkbaşına sinə gərməsi ilə əlaqəlidir. Günümüzdə boşanan qadının ən böyük problemi cəmiyyətin ona olan baxışı və işlə təmin olunmasındakı çətinliklərdir.
Bu günlərdə təhsil eksperti Kamran Əsədov “boşanmış qadınlar bağçaya işə götürülməməlidir” fikrini səsləndirdi. Onun fikrincə, bağça müdirlərinin təyin edilməsi üçün tək bilik və bacarıq yetərli deyil. Bağça rəhbərləri, orada çalışan təlim-tərbiyəçilərin mütləq şəkildə xarici görünüşü də yoxlanılmalı, xarici görünüşləri vahiməli olmamalıdır: “Habelə, boşanmış, övladı vəfat etmiş şəxsləri bu vəzifəyə, ümumiyyətlə işə cəlb etmək olmaz. Uşaq bağçalarında bəzən aqressiv halların da şahidi oluruq. Onlar feyskontroldan keçirilməlidirlər. Uşaq bağçalarına müəllimləri yalnız bu prosesdən sonra cəlb etməliyik”.
Təhsil ekspertinin “boşanmış qadınların bağçada işə götürülməməsi” fikri cəmiyyətdə narazılığa səbəb olub. Ekspertlərin bir qismi bu fikirlə razı olsa da, bəzisi düzgün olmadığını düşünür.
“Həyatında travmaları olan, xoşbəxt olmayan, özü şiddət görən bir insan bağçada təlim-tərbiyə işləri ilə məşğul olmağa başlayır, nəticədə isə…”
“Vəfa” Sosial İctimai Birliyinin sədri Fatimə Hacıbəyli qeyd etdi ki, bağça müəllimlərinin işə götürülməsi prosesinə xüsusi həssaslıqla yanaşılmalıdır: “Nəzərə almaq lazımdır ki, bağçada çalışanlar körpələrlə ünsiyyətdə olur. Bu səbəbdən də məktəbəqədər təhsil müəssisəsində çalışan şəxslər mütəmadi olaraq psixoloji müayindədən keçməlidir. Bağça müəlliməsi olmaq üçün diplom və 4 illik bakalavr təhsili kifayət etmir. Bir bağça müəlliminin özəlliyi, onun davranışı, onun uşağa qarşı olan diqqəti qayğısı və öz həyatında olan travmalar nəzərə alınmalıdır. Bəzən həyatında travmaları olan, həyatında xoşbəxt olmayan, özü şiddət görən bir insan bağçada təlim-tərbiyə işləri ilə məşğul olmağa başlayır. Buna görə də işə götürülməzdən əvvəl müyainələrdən keçmək vacibdir. Sırf boşandığı üçün həmin xanımın işə götürülməməsi düzgün deyil. Həmin şəxs psixoloji testdən keçməlidir. Müayinə zamanı bağçada çalışmaq istəyən şəxsin durumunda xoşagəlməz hal qeydə alınarsa həmin şəxs işə götürülməməlidir. Yox əgər heç bir problem yoxdursa, əsəb sistemi sakitdirsə, uşaqlarla normal davranırsa həmin qadın işlə təmin oluna bilər. Sırf boşandığı üçün qadını işə götürməmək düzgün deyil. Bu hal cəmiyyətdə böyük narazılığa səbəb ola bilər. Nəzərə almaq lazımdır ki, bu gün bosanmaların sayı günü-gündən artır”.
Günel CƏLİLOVA
