Sosial şəbəkələrdə Müəllimlərin İşə Qəbulu (MİQ) imtahanında (Riyaziyyat fənni üzrə) istifadə olunmuş sualların imtahandan öncə bəzi iştirakçılara göndərilməsi ilə bağlı məlumat yayılıb. Bu barədə təhsil eksperti Kamran Əsədov facebook hesabında yazıb.
K.Əsədov qeyd edir ki, Təhsil Nazirliyinin keçirdiyi Müəllimlərin İşə Qəbulu imtahanında Riyaziyyat fənni üzrə olan imtahanda istifadə olunmuş sualların imtahandan öncə bəzi iştirakçılara müəllif-ekspert tərəfindən göndərilməsi barədə çoxsaylı müraciətlər var: “Əgər həqiqətən də bu fakt təsdiqini taparsa, böyük tərbiyəsizlik, səriştəsizlik, bacarıqsızlıq nümunəsi olacaqdır. Həqiqətən də, bir sual belə, öncədən göndərilibsə, sizə söz verirəm, bütün təşkilatçıların, o özü özünü yoxlamağa gələn də daxil olmaqla, istefasını təmin edəcəyəm. Kiminsə taleyi ilə oynamaq hüquqları yoxdur. Əgər bir kurs müəllimlərin işə qəbulu imtahanından 1 gün əvvəl canlı yayımda 20 test tapşırığı izah edirsə və cəmi bir gün sonra keçirilən imtahanda həmin 20 izah olunan test tapşırığından 3 sual eyni, yəni oxşar yox, nöqtə-vergülünə qədər eyni düşürsə, icazə verin sizin şəffaflığınıza şübhə edək. Elə əvvəlki illərdə olduğu kimi, yenə də hansısa kurslardan asılınız. Bu da sizin qeyri-peşəkar olduğunuzu göstərir".
Azərbaycan Respublika Təhsil İnstitutu: “Müəlliflərdən Siracəddin Quluzadə onunla bağlanmış məxfilik müqaviləsinin şərtlərini pozaraq …”
Məsələ ilə bağlı Azərbaycan Respublika Təhsil İnstitutundan “Bakı-Xəbər”-ə bildirildi ki, (ARTİ) Müəllimlərin İşə Qəbulu müsabiqəsinin imtahan mərhələsində riyaziyyat fənni üzrə test tapşırıqlarına dair sosial mediada yayılan iddialarla bağlı araşdırma aparıb: “Həmin iddialarda iyulun 14-də keçirilən riyaziyyat fənni üzrə imtahanda istifadə edilən 3 sualın bundan əvvəl bəzi namizədlərə videoformatda izah edilməsi əks olunur. ARTİ beynəlxalq təcrübəyə uyğun olaraq test bankına daxil edilməsi üçün fənn mütəxəssislərinə orijinal sualların hazırlanması sifarişini verir. Sualların (və ya onların analoqlarının) məxfiliyinin qorunmasına, üçüncü tərəflə paylaşılmamasına və müəlliflər tərəfindən təlim mərkəzlərində bu istiqamətdə hazırlıq aparılmamasına dair sual müəllifləri ilə məxfilik müqaviləsi bağlanılır.
Araşdırma nəticəsində məlum olub ki, cəlb edilən müəlliflərdən Siracəddin Quluzadə onunla bağlanmış məxfilik müqaviləsinin şərtlərini pozaraq ARTİ-yə təhvil verdiyi orijinal test tapşırıqlarını müəllim hazırlıq mərkəzlərindən birinin test bankına da təqdim edib. Bu suallar həmin hazırlıq mərkəzi tərəfindən imtahandan əvvəl yayımlanan videodərs zamanı çoxsaylı suallar arasında müzakirə üçün istifadə olunub. İyulun 14-də keçirilən riyaziyyat fənni üzrə imtahanda istifadə edilən 3 sualın (S.Quluzadə tərəfindən MİQ sual bankına təqdim edilmiş) imtahandan əvvəl bəzi namizədlərə videoformatda izah olunması iddiası öz təsdiqini tapıb.Bağlanmış xidməti müqavilənin şərtlərini kobud surətdə pozduğuna görə, S.Quluzadə ilə bağlı qanunvericilikdə nəzərdə tutulmuş müvafiq hüquqi addımlar atılacaq. Hazırda ARTİ bu hadisənin imtahan nəticələrinə olan təsirləri ilə bağlı elmi-statistik təhlil aparır. Yekun nəticələrə dair qərar barədə ictimaiyyətə ətraflı məlumat veriləcək".
Kamran Əsədov: “Test imtahanı mərhələsində 3 sualı özəl kurslardan birinin əvvəlcədən videoformatda ictimailəşdirməsi faktı qarşısında rəsmilər məcbur olub bunu etiraf etdilər”
Təhsil eksperti Kamran Əsədov məlum hadisə ilə bağlı bildirdi ki, uzun illər mərkəzləşmiş müsabiqələrin test imtahanı mərhələsinin suallarındakı səhvlər, imtahan seanslardakı sualların çətinlik səviyyələrinin fərqliliyi və imtahan suallarının əvvəlcədən müdavimlərə ötürülməsi halları mövcud olub: “Müəllimlərin bilik və bacarıqlarının diaqnostik qiymətləndirilməsi zamanı müxtəlif illərdəki imtahanlarda suallar arasında kəskin çətinlik fərqi sonda onun əsasında ədalətsiz dərs bölgüsü formasında özünü göstərdi. Sonrakı illərdə müəllimlərin işə qəbul müsabiqəsində səhv tərtib edilən 100-dən artıq sualın 30-a yaxınının rəsmən etiraf edilməsi halı yalnız müsabiqə iştirakçılarının kəskin etirazı nəticəsində mümkün oldu. Keçən illərdə imtahan seansları arasında sualların çətinlik səviyyəsinin pik həddə yüksəlməsi və imtahan iştirakçılarının az qala üsyan etməsindən sonra yalnız bir halda nazirlik bunu etiraf etməyə özündə cürət tapa bildi. Lakin uzun illər imtahan suallarının onu tərtib edənlər səviyyəsində təlimçilərə və kurslara ötürülməsi onların səs yazısı ilə təsdiq edilsə də nazirlik bu hala münasibət bildirmədi. Çünki bu halda imtahan verənlərin hansı sosial qrupuna bu halın təsiri məlum olmadığı üçün, onlar buna kütləvi etiraz bildirə bilmədilər və nazirlik də buna göz yummağı daha üstün tutdu. Nəhayət bu il, bir fənn üzrə keçirilən test imtahanı mərhələsində 3 sualı özəl kursların birinin əvvəlcədən videoformatda ictimailəşdirməsi faktı qarşısında rəsmilər məcbur olub bunu etiraf etdilər”.
Günel CƏLİLOVA
