Məlum olduğu kimi, Daxili işlər naziri, general-polkovnik Vilayət Eyvazov respublikanın şəhər, rayon polis orqanlarında sıravi və kiçik rəis heyəti vəzifələrində xidmət etmək arzusunda olan gənclərin növbəti sıra baxışını keçirib.
Sıra baxışında kütləvi informasiya vasitələrində əvvəlcədən verilmiş elana uyğun olaraq nazirliyə onlayn qaydada müraciət etmiş gənclərdən daha hazırlıqlı olan 234 nəfər seçim turunun növbəti mərhələsinə buraxılıb ki, onlardan da 68 nəfəri Vətən müharibəsinin iştirakçısı olub.
Qeyd edək ki, Daxili İşlər Nazirliyi Vətən müharibəsi iştirakçıları, qaziləri və əlilləri xüsusi diqqətdə saxlayır. Bu qurum müharibə iştirakçılarını öz himayəsinə alır, onlara xüsusi münasibət göstərir. DİN qeyd etdiyimiz təsnifatdan olan şəxsləri işə qəbul edir, onların problemlərini həll edir. Daxili İşlər Nazirliyinin qazi, əlil, bir sözlə, müharibə iştirakçılarına göstərdiyi münasibət və diqqəti bütün dövlət qurumları edərsə onların problemi xeyli dərəcədə həll olunmuş olar.
Vətən müharibəsi iştirakçılarının işə götürülməsi həmin şəxslərə göstərilmiş ən böyük dəstəklərdən biri sayılır.
“Daxili İşlər Nazirliyinin Vətən müharibəsi iştirakçılarını işə götürməsi digər qurumlar üçün yaxşı örnək olmalıdır”
Konstitusiya Araşdırmaları Fondunun prezidenti Əliməmməd Nuriyev “Bakı-Xəbər”ə açıqlamasında qeyd etdi ki, Daxili İşlər Nazirliyi şəhid övladları və qazilərin işə götürülməsi ilə bağlı nümunələr göstərir: “Vətən uğrunda gedən döyüşlərdə iştirak edən, xəsarət alan, şəhid olan şəxslərin ailəsi hər zaman dövlətin diqqət və qayğısı altında olmalıdır. Bu şəxslərin işlə təmin olunmasında Daxili İşlər Nazirliyinin xüsusi səy göstərməsi təqdirəlayiqdir. Onu da qeyd edim ki, polis orqanının özü belə Vətən müharibəsində çoxlu sayda şəhid verib. Daxili İşlər Nazirliyinin çoxlu sayda nümayəndəsi vətənin müdafiəsində iştirak edib və iştirak etməkdə davam edir. Xatırladım ki, illər əvvəl Azərbaycanda ordu olmayanda əsas yük polis orqanının üzərinə düşmüşdü. Sonradan Azərbaycanın möhtəşəm və peşəkar ordusu yarandı. Bununla yanaşı, daxili qoşunlar və polis orqanında çalışan şəxslər Vətənin müdafiəsində çox böyük qəhrəmanlıq və fədakarlıq göstəriblər. Bu danılmaz faktdır”.
Həmsöhbətimiz onu da əlavə etdi ki, qazi və şəhid övladlarının polis orqanına işə düzəlməsinə, onların problemlərinin həll olunmasına cənab nazir Vilayət Eyvazov xüsusi diqqət yetirir: “Cənab nazir rayonlara səfər edərkən ilk olaraq bu qəbildən olan şəxsləri qəbul edir. Onların sıxıntıları ilə maraqlanır və dərdlərinə dərman olur. Onu da deyim ki, polis orqanına bu kateqoriyadan olan şəxslərin işə götürülməsi davamlı xarekter daşıyır. Əvvəllər də olub və olacaq”.
Hüquq müdafiəçisi hesab edir ki, adıçəkilən qurumun Vətən müharibəsi iştirakçılarını işə götürməsi digər qurumlar üçün yaxşı örnək olmalıdır: “Dövlət qurumları bu nümunədən istifadə etməlidir. Nəzərə almaq lazımdır ki, qazi və şəhid ailələrinin işlə təmin olunması onların sosial probleminin həll olunması deməkdir. DİN-in bu təcrübəsu bütün dövlət qurumları arasında yayılmalıdır. Vətən müharibəsi iştirakçıları, qazi və şəhid ailələrinin qarşısında borcumuz böyükdür. Bu qəbildən olan şəxslərə xüsusi diqqətlə yanaşmaq lazımdır. Onların ən xırda probleminə belə xüsusi həssaslıqla yanaşmaq lazımdır. Qurumlar şəhid ailələri və qazilərə olan dövlət qayğısının prioritet olduğunu nəzərə almalıdır. Bu sahədə Daxili İşlər Nazirliyinin gördüyü işlər xüsusi olaraq qeyd olunmalıdır”.
Günel CƏLİLOVA
