Məhəmməd Əsədullazadə: “Ermənistan tərəfi yaxın perspektivdə substantiv danışıqlar istiqamətində həll prosesində səmimi olarsa, müharibə ehtimalı aradan qalxa bilər”
Oktyabr ayının əvvəlindən bu günə qədər cəbhə xəttində atəşkəs rejiminin pozulması halları azalıb. Belə ki, bundan əvvəl atəşkəs gün ərzində minimum 90-100 dəfə pozulurdusa, hazırda bu rəqəm 20-30 arasında dəyişir.
O da məlumdur ki, həmişə atəşkəsin pozulmasının səbəbkarı qarşı tərəf olub. Qarşı tərəf müxtəlif atıcı silahlarla gün ərzində bir neçə dəfə atəşkəsi pozub. Bütün hallarda, ordumuz cavab atəşi açmaqla düşməni susdurub. Paşinyan bu ilin mayında baş nazir olandan sonra da ermənilər eyni qaydada atəşkəsi pozublar. Sadəcə, son aylar atəşkəsin pozulması halları azalıb.
Bəzi iddialara görə, atəşkəsin pozulması hallarının azalması siyasi səbəblərlə bağlıdır. Azərbaycan və Ermənistan xarici işlər nazirlərinin görüşü oldu. Bundan əvvəl Ermənistanın baş naziri Nikol Paşinyanın təxribatçı bəyanatları var idi. Prezident İlham Əliyev isə çıxışlarında Ermənistana faciə gətirəcək bəyanatlara son qoyulmasına çağırış edirdi. Dövlət başçısı xəbərdarlıq etmişdi ki, cəbhə bölgəsində yaranmış hər hansı vəziyyətə görə cavabdehlik Ermənistan tərəfində olacaq. Bundan sonra beynəlxalq qurumlar fəallaşdı. Paşinyan məcbur oldu ki, masa arxasına otursun. Bütün hallarda, Azərbaycanın işğal edilmiş torpaqları azad edilmiyənədək cəbhə bölgəsində gərginlik azalıb-artacaq. Bunun birdəfəlik başa çatması üçün Ermənistan işğala son qoymalıdır.
Maraqlıdır, bəs ekspertlər atəşkəsin pozulması hallarının azalmasını hansı səbəblərlə əlaqələndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, hazırda nisbi sakitlik Ermənistanın daxilində baş verən siyasi proseslərlə bağlıdır: “MDB dövlət başçılarının Düşənbə sammiti çərçivəsində Ermənistanın baş naziri Nikol Paşinyanın dövlət başçısı İlham Əliyevlə qısa görüşündən sonra atəşkəs pozuntularının cəbhədə azalması bir daha göstərir ki, atəşkəsi mütəmadi pozan məhz işğalıçı ölkədir. Nikol Paşinyanın Ermənistana qayıtdıqdan sonra Qarabağdakı işğalçı ordu qüvvələrinə tapşırıq verərək, maksimum atəşkəsə əməl edilməsini tələb etməsi bunun göstəricisidir. Demək, Ermənistan tərəfi atəşkəsi mütəmadi pozmaqla bu günə kimi danışıqları sabotaj etməyə çalışıb. Göründüyü kimi, hazırda nisbi sakitlik Ermənistanın daxilində baş verən siyasi hadisələrlə bağlıdır. Nikol Paşinyan cəbhədə nisbi sakitlikdən istifadə edərək daxildə “Qarabağ klanı”nı zərərsizləşdirməyə çalışır. Həmçinin, ölkə başçısı İlham Əliyevlə bir neçə məsələdə şifahi razılıq əldə edilməsi atəşkəsin qorunaraq, real və substantiv danışıqlara gedəcəyinin göstəricisi ola bilər. Azərbaycan daim atəşkəsin qorunmasnda maraqlıdır. Bu şərtlə ki, işğalıçı ölkə real və substantiv danışıqlarda maraqlı olsun. Hesab edirəm ki, Ermənistanda dekabrda növbədənkənar parlament seçkilərindən sonra Qarabağ danışıqları bərpa oluna bilər. Baş nazir Nikol Paşinyanla Prezident İlham Əliyev arasında danışıqların bərpası mümkündür. Hesab edirəm ki, Ermənistan tərəfi yaxın perspektivdə substantiv danışıqlar istiqamətində həll prosesində səmimi olarsa, müharibə ehtimalı aradan qalxa bilər. Bu gün Ermənistan tərəfi Azərbaycandan vaxt istəyərək, Ermənistanda daxili problemlərin qaydasına salınmasına çalışır”.
Vidadi ORDAHALLI
