Məhəmməd Əsədullazadə: “Bu, Putinə qarşı yönəlmiş siyasətdir”
Bu günlərdə Ermənistanın baş naziri Nikol Paşinyanın arvadı Anna Hakopyan “Qadınlar sülh naminə” təşəbbüsü çərçivəsində Rusiyadan bir qrup qadının Azərbaycanın Ermənistan silahlı qüvvələri tərəfindən işğal olunmuş Dağlıq Qarabağ bölgəsinə səfərini təşkil edərək, “sülhpərvər” imic yaratmağa çalışıb.
Rusiyalı qadınları təmas xəttinə aparan Hakopyan onları hətta Qarabağ separatçılarının lideri Bako Saakyanla da görüşdürüb. O özünün necə bir “sülh çarçısı” olduğunu nümayiş etdirmək üçün isə Rusiyadan gətirdiyi qonaqlara simvolik olaraq əzilmiş güllələrdən hazırlanmış bəzək əşyaları hədiyyə edib.
Hakopyanın səhnələşdirdiyi bu tragikomik tamaşaya baxmaq üçün gələn rusiyalı qadınların sırası isə olduqca təəccüblü və "rəngarəng" olub. Onların içərisində Rusiya Dövlət Dumasının beynəlxalq məsələlər komitəsi sədrinin birinci müavini Svetlana Jurova, yazıçı Lyudmila Uliçkaya, Rusiya Federasiyasının III dərəcəli dövlət müşaviri, “Qadın dialoqu” partiyasının lideri Yelena Semerikova, həmçinin, bir neçə jurnalist, xeyriyyə fondu rəhbərləri və ictimai xadimlər olub. Ən maraqlısı odur ki, həmin qadınların böyük əksəriyyəti Putinə qarşı müxalif mövqedə olan şəxslərdir.
Yeri gəlmişkən onu da qeyd edək ki, bir qrup qadının Qarabağa qanunsuz səfər etməsi rusların özü tərəfindən də birmənalı qarşılanmayıb.
“Moskva-Bakı” portalına müsahibə verən rusiyalı politoloq Aleksey Fenenkonun fikrincə, bu, Paşinyan tərəfindən incəliklə planlaşdırılan təxribatdır: “Qarabağa səfər edən rusiyalı qadınlardan birinin yazıçı Uliçkaya olması faktının özü artıq onların bu təşəbbüsünün Rusiya hakimiyyətinin rəsmi xətti ilə uyğunsuzluğunu göstərir. Çünki Uliçkaya daha çox Rusiya müxalifətinin nümayəndəsi kimi tanınır. Və Paşinyan da bu aksiya vasitəsilə hər şeydən əvvəl Rusiya ilə Azərbaycan arasında nifaq salmaq, həmçinin, Dağlıq Qarabağ üzrə nizamlanma prosesinin pozulmasında guya Rusiyanın da əlinin olduğunu nümayiş etdirmək qərarına gəlib”.
Maraqlıdır, sözügedən qadınların əksəriyyətinin Putinə qarşı müxalif olması nüansı nə deməkdir?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Ermənistanın davam etdirdiyi işğalçı siyasət fonunda bu ölkənin sülh təşəbbüsləri absurddur və dünya ictimaiyyətini aldatmaqdır: “Bu ölkənin yeni rəhbərliyinin Qarabağ siyasətində hələ ki, dəyişikliklər hiss edilmir. Baxmayaraq ki, Düşənbədə MDB dövlət başçılarının sammiti çərçivəsində Ermənistanın baş naziri Nikol Paşinyan Prezident İlham Əliyəvə yaxınlaşıb, bir neçə məsələdə razılaşaraq faktiki öz sərt ritorikasından əl çəkdi. Amma bu anlaşma status-kvonun qorunmasına hesablanmamalı kimi rəsmi Bakının İrəvana xəbərdarlıqları artıq öz aktuallığını saxlayır. Erməni baş nazirinin xanımı A.Akopyanın Rusiyanın müxalif qüvvvələrindən olan xanımları işğal olunmuş ərazilərə gətirib sülh çağırışı etməsinin heç bir humanitar xarakteri yoxdur. İlk növbədə işğalçı ordu bu ərazilərdən çəkilməli, ondan sonra sülh çağırışları olmalıdır. Rusiya Prezidentinə müxalif olan qadınlarla Paşinyanın reverans etməsi anti-Kreml siyasəti ilə bağlıdır. Bu, Putinə qarşı yönəlmiş siyasətdir. Həmçinin, İrəvanın Moskva siyasətində qeyri-obyektivliyi göstərir. Müxalif rus qadınların burada iştirakı hesab edirəm ki, Kremlin Paşinyana qarşı daha da etimadsızlığına gətirəcək”.
Vidadi ORDAHALLI
