"Bunu Ermənistan hakimiyyətinin növbəti yalanı və həyasızlığı kimi qəbul etməliyik"
Ermənistanın panorama.am saytı xəbər verir ki, həmin ölkənin ombudsmanı qoşunların təmas xəttindəki vəziyyətlə bağlı hesabat yayıb. Həmin məlumatda bildirilir ki, guya ötən ilin 29 dekabrında Azərbaycan Ordusunun bəzi hissələri Tavuş rayonunun Çinari kəndi istiqamətində diversiya törətmək istəyib.
Ombudsman bildirib ki, bu monitorinq 29-30 dekabr və yeni ilin ilk bayram günlərini əhatə edib. Məlumatda həmçinin bildirilir ki, hücum nəticəsində hər iki tərəf itki verib. Erməni tərəfi ölən hərbçilərin adlarını açıqlayıb.
Yanvarın 18-də ötən ilin sonu ilə bağlı belə bir xəbərin dövriyyəyə buraxılmasında məqsəd nədir?
Hərbi ekspert Üzeyir Cəfərov qəzetimizə açıqlamasında bildirdi ki, bu, Ermənistanın yaydığı növbəti uydurmadır:
"Belə görünür ki, Ermənistanın ombudsmanı öz vəzifə səlahiyyətlərini belə bilmir. Bu nə vaxtdan onun kompetensiyasına aiddir. Yaxşı olar ki, gedib Ermənistan ordusunda hüquqları pozulan, ləyaqəti alçaldılan əsgərlərin şikayətlərini araşdırsın. Bilirsiniz ki, deyilən ərazidə Azərbaycan əsgərinin meyiti qalıb. Bütün dünyada böyük rezonans doğuran bu məsələyə Ermənistan cavab verməyə arqument tapmır. Ona görə də belə dezinformasiyalar buraxır. Ombudsmanın insanlığa varsa, meyitin qaytarılmamasından danışsın. Onun hərbi bilikləri yox səviyyəsindədir. Bilsin ki, diversiya iddiası ortaya atırsa, bunu sübut edəcək dəlillər ortaya qoyulmalıdır. Yalanlarında bildirirlər ki, guya biz 7 əsgər itirmişik. Hanı onların adları? Yəqin ki, belə fakt olsaydı, üzə çıxardı. Bunu Ermənistan hakimiyyətinin növbəti yalanı və həyasızlığı kimi qəbul etməliyik".
Məhəmmədəli QƏRİBLİ
