Vüqar Qədirov: "Belə araşdırmanın neytral bir qəzet tərəfindən aparılması və faktların təsbiti..."
Ermənistanın Suriyadan qaçan erməni ailələrinin bir hissəsini Azərbaycanın işğal altında olan ərazilərində yerləşdirdiyi məlumdur. Əslində, Suriyadakı müharibənin alovları ermənilərin sıx yaşadığı şəhər və qəsəbələri bürüyəndə dünya erməni mafiyası bunu Azərbaycanın işğal altındakı ərazilərində məskunlaşdırmanı genişləndirmək üçün fürsət kimi görürdü və planlaşdırılırdı ki, on minlərlə erməni bu ərazilərdə məskunlaşdırılsın.
Bununla belə, bir neçə yüz erməni ailəsinin Qarabağda yerləşdirilməsi baş tutub və erməni diasporunun ianələri hesabına onlara evlər tikilib. Xüsusilə də Qubadlı və Zəngilan rayonları ərazisində belə məskunlaşmanın çox olduğu bildirilir. Məsələn, işğal altında olan Qubadlı rayonunun Xanlıq kəndinin adını "İşxanadzor" qoyan ermənilər bu kənddə bir neçə Suriya erməni ailəsini məskunlaşdırıb.
Almaniyanın "Deutschlandfunk" qəzetinin müxbiri Naomi Konrad həmin ərazilərdə olaraq Suriya ermənilərinin Azərbaycana məxsus bu ərazilərdə necə yaşadığını araşdırıb. Jurnalist yazır ki, kəndin xarabalıqları arasında 100-ə qədər yeni tikilmiş ev gözə dəyir. Qışda bəzən günlərlə ətraf aləmdən təcrid olan kənddə Suriya erməniləri də məskunlaşdırılıb. Onlardan biri Ayk Xaçaturyan deyir ki, Suriyada həkim işləyirdi və yaraqlılar onu tutanda müsəlmanlığı qəbul etməyi tələb edib, əks halda başını kəsəcəklərini deyiblər. Bununla belə, Xaçaturyanı bir neçə saat sonra buraxıblar və o dərhal ailəsini də götürüb Qarabağa köçüb. İndi Xaçaturyan Azərbaycan kəndində tikilmiş xəstəxanada işləyir.
Kənddə Suriyadan və Livandan olan 20 erməni ailəsi yaşayır. Qarabağda məskunlaşdırılan suriyalı erməni ailələrinin sayı isə cəmi 100-ə yaxındır. Qəzet yazır ki, bu ilin aprelində Qarabağda döyüşlər başlayanda Suriya ermənisi Xaçaturyan da könüllülərin dəstəsində ön xəttə yollanıb. Xaçaturyan və digər Suriya erməniləri, başqa suriyalılar kimi, ona görə Avropaya deyil, Qarabağa qaçıblar ki, onun dediyinə görə, burada "hökumət" onlara hər cür dəstək verir, ev tikir.
Avropanın tanınmış nəşrinin belə bir faktı ortaya qoyması ermənilər üçün nə vəd edə bilər və Azərbaycan tərəfi bununla bağlı hansı addımları atmalıdır?
Qaçqın və Məcburi Köçkün Gənclər Təşkilatının rəhbəri Vüqar Qədirov qəzetimizə açıqlamasında bildirdi ki, Suriya və digər münaqişə gedən ərəb ölkələrindən erməni ailələrinin Dağlıq Qarabağ və işğal altında olan digər ərazilərə köçürülməsi faktının hələ də davam etməsi beynəlxalq aləmi saymamaqdan irəli gəlir: "Dəfələrlə belə faktların olması ilə bağlı əlaqədar qurumlara müraciət etmişik, lakin beynəlxalq aləm tərəfindən buna heç bir reaksiya verilmir və məsələyə hüquqi müstəvidə yanaşılmır. Dağlıq Qarabağ münaqişəsinin nizamlanmasında vasitəçi olan qurumlar, beynəlxalq təşkilatlar başqa ölkələrdən erməni ailələrinin Dağlıq Qarabağa və ətraf ərazilərə köçürülməsi məsələsini araşdırsa da, bu vaxtadək heç bir tədbir görülməyib. Bu isə Azərbaycan dövlətini düşündürməyə bilməz. ATƏT-in faktaraşdırıcı missiyası tərəfindən aparılan araşdırmalar zamanı sübut olunub ki, son illər ərzində Dağlıq Qarabağ və ətraf ərazilərə dünyanın ayrı-ayrı yerlərindən 20 min nəfərdən çox erməni köçürülüb.
Azərbaycan tərəfi həmsədrlərdən dəfələrlə bu məsələni nəzarətdə saxlamağı xahiş etsə də, ortada konkret nəticə yoxdur. Artıq belə faktların Dağlıq Qarabağın hüdudlarından kənara da sirayət etməsi məsələnin ciddiliyindən xəbər verir. Xüsusilə də belə araşdırmanın neytral bir qəzet tərəfindən aparılması və faktların təsbiti bizə bir daha beynəlxalq instansiyalara müraciət etmək üçün əsas verir".
Məhəmmədəli QƏRİBLİ
