Azərbaycanın hərbi müstəvidə daim xüsusi diqqətdə saxladığı məsələlərdən biri də ordunun müasir hərbi texnika ilə təchiz olunmasıdır. Bu istiqamətdə indiyə qədər xeyli addım atılıb və indi ordunun ixtiyarında çoxsaylı belə texnikalara rast gəlmək mümkündür. Lakin görülən işlərlə kifayətlənilməyərək, yeni texnika alışı da diqqət mərkəzində saxlanır.
Belaruslu hərbi ekspert Aleksandr Alesin isə bildirir ki, prezidentlər İlham Əliyevlə Aleksandr Lukaşenko arasında Bakıda keçirilmiş danışıqlarda Azərbaycana Belarusda istehsal olunmuş "Polonez" yaylım atəşi raket sistemlərinin satış məsələsinin müzakirə olunması istisna deyil. Düzdür, bu barədə rəsmi açıqlama verilmir. Amma Azərbaycanın bu raketlərə maraq göstərməsi də tamamilə təbiidir.
Aleksandr Alesin də bildirir ki, Ermənistanın "İsgəndər" operativ-taktiki kompleksləri əldə etdiyi dövrdə Azərbaycan "Polonez" yaylım atəşi raket sistemlərinin alınmasında maraqlıdır. Bundan başqa, iddialar səslənir ki, Rusiyanın Ermənistana "İsgəndər" operativ-taktiki raketlərini verməsindən sonra regionda yaranmış yeni hərbi-siyasi situasiyaya adekvat olaraq Azərbaycan həm də Ukrayna və Belarus "İsgəndər" raketlərinin analoqu olan operativ-taktiki raket kompleksinə maraq göstərir. Söhbət 480 kiloqramlıq döyüş başlığına malik, hədəfi dəqiq vuran "Qrom-2" operativ-taktiki raket komplekslərindən gedir. Son dövrlərdə Ukraynada "Qrom-2" operativ-taktiki raketləri üzərində iş intensivləşib. Həmin raketlərin üzərində iş əslində 90-cı illərin sonlarında başlamışdı, ancaq vəsait olmadığından işlər yarımçıq qalıb. İndi isə Ukrayna Pakistan və Səudiyyə Ərəbistanı kimi ölkələrdən aldığı vəsait hesabına bu sahədə işi yeniləyib. Belarus da Ukraynaya texniki yardım göstərir. Çünki Moskva Minskə qabaqcıl texnologiyalara əsaslanan silah sistemlərini, o cümlədən "İsgəndər"ləri verməkdən imtina edir. Belarus isə özü bu raketlərin analoqunu əldə etməyə çalışır. Əslində "İsgəndər" komplekslərinin yerləşdiyi mobil platformanı Belarusun hərbi-sənaye müəssisəsi olan Minsk maşın-traktor zavodu istehsal edir. Bu baxımdan Belarusa təkcə raketin özünü əldə etmək kifayət edir. İndi "Qrom-2" operativ-taktiki raketləri hazır olanda Azərbaycanın onları əldə etməsi tamamilə gözləniləndir. Bundan başqa, Azərbaycan Pakistandan da raket alışında maraqlıdır. Rusiyalı ekspert Mixail Belyayev bildirir ki, Azərbaycan, Ermənistandan fərqli olaraq, ordusunu öz hesabına gücləndirmək istiqamətində mühüm addımlar atır: "Hətta neft qiymətlərinin düşməsinə baxmayaraq, hərbi büdcəyə qənaət edilmir. Hərbi sahədə Azərbaycan-Rusiya əməkdaşlığı fəal şəkildə davam edir, Bakı Pakistan, İsrail və Türkiyədən silahlar alır. Azərbaycan bununla regional balansı öz xeyrinə dəyişmək prinsipində dönməzdir. Hətta Ermənistanın nümayiş etdirdiyi "İsgəndər" raketləri belə Bakının eyninə deyil. Görünən odur ki, son dərəcədə təhlükəli vəziyyət formalaşır. Azərbaycan aprel uğurunu təkrarlayacaqsa, o zaman danışıqlarda polad iradəsini diqtə edəcək və onun dediklərini, ermənilərlə yanaşı, həmsədrlər də qəbul etmək məcburiyyətində qalacaq". O, aprel döyüşlərində Azərbaycan ordusunun əks-hücumla bir neçə strateji yüksəkliyi azad etməsinə diqqət çəkərək qeyd edib ki, münaqişə ətrafında vəziyyət nə müharibə, nə də sülh mərhələsinə keçir: "Bölgədə vəziyyət daha da amansızlaşır. Aprel hadisələrindən səkkiz ay ötüb, lakin danışıqlar prosesi yenidən dalandadır. İndi də məlum deyil ki, Hamburqda ATƏT-in iştirakı ilə İlham Əliyev və Serj Sarkisyanın görüşü olacaq, ya yox. Cəbhə xəttində kəskinləşmənin danışıqların növbəti raunduna hazırlıq dövründə baş verməsi də təsadüfi deyil. Ötən illərin təcrübəsi göstərir ki, həmişə prezidentlərin görüşləri ərəfəsində Qarabağda gərginlik artır". M.Belyayev bildirib ki, Qarabağda tammiqyaslı müharibə versiyası da gündəmdədir: "Bu, hər şeydən öncə, Rusiyanın ziyanınadır. Çünki müharibənin nəticəsinə uyğun olaraq, ya Azərbaycan, ya da Ermənistan Rusiyadan üz döndərəcək. Ona görə də təcili bölgədə gərginliyin azaldılması üçün addımlar atılmalıdır. Bu, ən azından, Qarabağ ətrafında 7 rayonun qaytarılması və Azərbaycan-Ermənistan iqtisadi əlaqələrinin qurulmasıdır". Əks halda müharibə qaçılmazdır və bu zaman ermənilərin güvəndiyi "İsgəndər" raketləri də düşmənin köməyinə çatmayacaq. Hərbi ekspert, ehtiyatda olan polkovnik Xətai Baxışov "AzeriDefence" portalına açıqlamasında bununla bağlı qeyd edir:"İndi ermənilərin özləri etiraf etməyə başlayıblar ki, onlara "İsgəndər"ə baxmağa belə icazə vermirlər, o ki qala düyməsini basmağa. Bu silah birmənalı olaraq Rusiya ordusunun Ermənistandakı bazasına daxildir. Rusiyanın həmin silahı Qarabağda bizə qarşı işlədəcəyinə inanmıram. "İsgəndər"lərə qarşı Azərbaycanın da hava hücumundan müdafiə sistemləri mövcuddur. Bilirsiniz, Sovet texnologiyasından fərqli olaraq, Rusiyanın hərbi sənayesi söyləndiyi kimi güclü deyil. Biz bunu öz müşahidələrimizdə görürük".
Tahir TAĞIYEV
