Son dövrlərdə Azərbaycan və Pakistan arasında hərbi sahədə münasibətlərin daha intensiv xarakter alması müşahidə olunmaqdadır. Bu arada yayılan məlumata görə, Kəraçi şəhərində keçirilən İDEAS-2016 beynəlxalq müdafiə sərgisi çərçivəsində Azərbaycanın müdafiə sənayesi naziri Yavər Camalov ilə Pakistanın müdafiə sənayesi naziri Rana Tanvir Hüseynin görüşü olub.
Məsələ ilə bağlı "AzeriDefence" bildirir ki, görüşdə iki ölkə arasında müdafiə sənayesi sektorunda qarşılıqlı maraq doğuran məsələlər müzakirə edilib. Tanvir Hüseyn Pakistanın baş nazirinin verdiyi tapşırığa əsasən Azərbaycanla müdafiə sənayesi sahəsində əlaqələrin genişləndirilməsi istiqamətində çalışıldığını qeyd edib. Görüşdə Pakistan və Azərbaycan arasında müdafiə sənayesində əməkdaşlığa dair Anlaşma Memorandumunun imzalanması barədə fikir mübadiləsi aparılıb. Hər iki tərəf əməkdaşlığın daha geniş sahələri əhatə etməsi üçün texniki səfərlərə və təcrübə mübadiləsinə ehtiyac olduğunu vurğulayıb.
Hesab olunur ki, artıq yaxın tezlikdə Azərbaycan və Pakistan arasında hərbi müstəvidə yeni razılaşmalar imzalanması tam gözləniləndir. Buna müvafiq olaraq isə Azərbaycanın Pakistandan barəsində çoxdan bəhs edilən hərbi texnika alışını həyata keçirməsi də istisna olunmur. Məhz belə bir vaxtda hərbi aviasiya və Pakistanın Hərbi Hava Qüvvələri üzrə ixtisaslaşmış jurnalist Alan Varnes Azərbaycanın bu ölkədən "JF-17 Thunder" qırıcı təyyarələrini almaq üçün danışıqlar apardığını bildirir. "Quwa.net" portalında o yazır ki, Azərbaycan Hərbi Hava Qüvvələri "JF-17 Thunder" qırıcılarının pilotları üçün əsas trenajor olan "MFİ-393 Super Mushshak"ı da almağa maraq göstərir. Qeyd olunur ki, Azərbaycan və Pakistan hazırda ikitərəfli hərbi əməkdaşlığın gücləndirilməsi üzərində işləyir: "Bu ilin oktyabr ayında Pakistan baş naziri Navaz Şərif Bakıda səfərdə olub və Prezident İlham Əliyevlə danışıqlar aparıb. Tərəflər hərbi-texniki əməkdaşlıq, müasir silahların alınması və birgə istehsalı barədə anlaşma əldə edib. Bu günlərdə isə Azərbaycanın baş nazirinin müavini Yaqub Eyyubov Pakistanda səfərdə olub və beynəlxalq hərbi sənaye sərgisində iştirak edib, habelə ikitərəfli əməkdaşlığa dair danışıqlar aparıb". İndi gözlənir ki, yaxın tezlikdə "JF-17 Thunder" təyyarələri Azərbaycan ordusunun ixtiyarına veriləcək.
Bir daha xatırladaq ki, "JF-17 Thunder" qırıcılarını Pakistanla Çin birgə istehsal edir. "Quwa.net" yazır ki, Azərbaycan bu qırıcıları özünün hərbi hava qüvvələrinin sərəncamında olan MiQ-21, MiQ-25, Su-25 qırıcılarının güclü davamçısı kimi görür. Qeyd olunur ki, "JF-17 Thunder" qırıcıları daha müasir və daha geniş imkanlara malikdir: "Azərbaycan Çin və ya Türkiyədən yüksək dəqiqlikli "hava-yer" raketləri alaraq bu qırıcıları təchiz edə bilər. Digər tərəfdən, Azərbaycan yeni qırıcıları sursatla təchiz etmək üçün Cənubi Afrika ilə olan əlaqələrindən istifadə edib "D"enel Dynamics" şirkətindən raketlər almaq imkanındadır. "JF-17 Thunder" müxtəlif hava missiyalarını yerinə yetirməyə imkan verən çoxfunksiyalı platformadır. Bu qırıcılar hədəfə görünmə məsafəsindən çox aralıda "hava-hava" raketləri ilə zərbə endirə bilir, yüksək manevr qabiliyyətinə malikdir. Müasir radioelektron mübarizə sistemləri ilə təchiz olunub. Azərbaycan bu qırıcıları almağa bir neçə il əvvəldən maraq göstərmişdi, lakin daha sonra danışıqlar dayanmışdı. İndi isə Azərbaycan Pakistandan, ballistik raketlərlə yanaşı, bu müasir qırıcıları da almağa hazırlaşır". Qeyd edək ki, Pakistan rəsmiləri Azərbaycanla, digər sahələrlə yanaşı, hərbi sferada da yüksək səviyyəli münasibətlərin qurulmasında maraqlı tərəf kimi çıxış edirlər. Pakistanın prezidenti Məmnun Hüseyn bildirir ki, Pakistan qardaş Azərbaycanla münasibətlərə böyük önəm verir. M.Hüseyn Cammu və Kəşmir münaqişələrində Pakistanı dəstəklədiyinə görə Azərbaycana minnətdarlığını bildirib. O, Pakistanın Dağlıq Qarabağ münaqişəsində Azərbaycana dəstəyini davam etdirəcəyini bildirib: "Pakistan münaqişənin ədalətli və sülh yolu ilə həllinin tərəfdarıdır". Bundan başqa, prezidentin sözlərinə görə, Pakistan ümumi tarixi, mədəni, dini və digər dəyərlərə malik Azərbaycanla qardaşlıq əlaqələrinə böyük önəm verir. İki ölkə arasında müdafiə sahəsində əlaqələrin möhkəmlənməsindən razılığını bildirən Pakistan prezidenti ticarət əlaqələrinin də genişlənməsinin zəruriliyini vurğulayıb.
Azərbaycan tərəfi də Pakistanla müxtəlif sektorlarda birgə müəssisələr yaratmaq niyyətində olduğunu bəyan edib.
Nahid SALAYEV
