Vüqar Qədirov: "Çünki onların reallığı öz gözlərilə görmək şansı olacaq"
Avropa Şurası Parlament Assambleyasının bəzi komitə iclaslarının Azərbaycanda keçirilməsi barədə razılıq əldə olunub. Bu barədə Assambleyadakı Azərbaycan nümayəndə heyətinin rəhbəri Səməd Seyidov jurnalistlərə müsahibəsində deyib.
O, AŞPA-nın payız sessiyasının ölkəmiz üçün uğurlu olduğunu diqqətə çatdırıb. Bildirib ki, sessiyada Azərbaycanda keçirilən referendumla bağlı müsbət fikirlərin səsləndirilməsi, ölkəmizdən yeni hakimin seçilməsi, Azərbaycanın ərazi bütövlüyünün dəstəklənməsi, gələcəkdə bir sıra komitə iclaslarının Bakıda keçirilməsi barədə razılıq əldə edilməsi və s. məsələlər Azərbaycan Respublikasının Prezidenti İlham Əliyevin bir neçə gün əvvəl çıxışında qeyd etdiyi məqamların birbaşa təsdiqidir.
Xatırladaq ki, dövlət başçısı bildirib ki, beynəlxalq təşkilatlar nəinki ölkəmizlə əməkdaşlıq etməkdə maraqlıdır, onlar bu əməkdaşlığı həyata keçirmək üçün konkret təşəbbüslər irəli sürür.
Qurumun komitə iclaslarının Azərbaycanda keçirilməsinin bizim üçün nə kimi əhəmiyyəti ola bilər?
QHT rəhbəri Vüqar Qədirov hesab edir ki, bu olduqca maraqlı qərardır: "Hesab edirəm ki, bu addımın atılması Azərbaycanla Avropa Şurası arasında münasibətləri daha da normallaşdıracaq. Etiraf etməliyik ki, biz Avropa institutlarından çox ikili yanaşma görmüşük. Ancaq zaman keçdikcə, hər bir məsələ öz yerini tapmış olur. Artıq Avropa Şurası Azərbaycanla daha sıx əməkdaşlığın zəruriliyini hiss edir. Biz bunu referendumun nəticələrinə verilən obyektiv qərarda da hiss etdik. Azərbaycan həmin qurumun bərabərhüquqlu üzvüdür. Bu səbəbdən də bizim ölkəmizdə hansısa toplantıların keçirilməsi normaldır. Çünki Azərbaycan öz tərəfindən daim Avropa Şurasının bütün tövsiyə və qərarlarına hörmətlə yanaşıb. Komitə iclaslarının Azərbaycanda keçirilməsinin başqa maraqlı tərəfi həm də bundan ibarətdir ki, bura çoxlu sayda nümayəndə təşrif buyuracaq. Nəzərə alsaq ki, həmin iclaslara daha çox parlamentari qatılır, onda bunun əhəmiyyəti artır. Çünki onların reallığı öz gözlərilə görmək şansı olacaq. İstənilən baxımdan, bu həm bizim, həm də Avropa üçün önəmlidir".
Məhəmmədəli QƏRİBLİ
