Milli Məclisin deputatı Rizvan Nəbiyev Medianın İnkişafı Agentliyinin təşkilatçılığı ilə keçirilən "Prezident İlham Əliyevin sülh strategiyası sabitliyin qarantıdır" mövzusunda dəyirmi masada çıxışında deyib ki, Prezident İlham Əliyevin rəhbərliyi ilə Azərbaycan həm hərbi gücünü, həm də siyasi-diplomatik imkanlarını effektiv şəkildə nümayiş etdirərək sülhə nail olub. “Azərbaycan təkcə hərbi sahədə deyil, siyasi-diplomatik müstəvidə də sülh diplomatiyasını uğurla həyata keçirərək regionda yeni təhlükəsizlik və əməkdaşlıq mühiti formalaşdırıb. Bu siyasətin memarı isə Prezident İlham Əliyevdir.
“Prezident İlham Əliyev çıxışlarında haqlı olaraq vurğulayır ki, əgər Azərbaycan istəməsəydi, bölgədə sülh mümkün olmazdı. Bu, çox mühüm və strateji məna daşıyan yanaşmadır. Azərbaycan yalnız hərbi gücü ilə deyil, eyni zamanda, siyasi və diplomatik vasitələrlə də öz məqsədlərinə nail olduğunu sübut etdi. Prezident İlham Əliyevin müharibə dövründə irəli sürdüyü siyasi ultimatum nəticəsində Ağdam, Laçın və Kəlbəcər hərbi əməliyyat aparılmadan Azərbaycana qaytarıldı. Bu, tarixi və strateji ultimatum idi. Xüsusilə Ağdamın minalarla çirkləndirilməsini, Laçın və Kəlbəcərin coğrafi baxımdan mürəkkəb relyefə malik olmasını nəzərə alsaq, həmin ərazilərin döyüşsüz geri qaytarılması həm humanitar, həm də strateji baxımdan olduqca mühüm nəticə idi”, – deyə deputat vurğulayıb.
R.Nəbiyev bildirib ki, Azərbaycan torpaqlarını beynəlxalq hüquqa əsaslanaraq azad edib və hərbi əməliyyatlar zamanı humanitar hüququn prinsiplərinə ciddi şəkildə riayət olunub.
“Prezident İlham Əliyev çıxışlarında bu məsələyə xüsusi diqqət yetirir. Müharibə dövründə beynəlxalq humanitar hüququn tələblərinə əməl olunması Azərbaycanın prinsipial mövqeyini göstərirdi. Mülki əhalinin təhlükəsizliyi, humanitar yanaşma və beynəlxalq hüququn qorunması Azərbaycan Ordusunun fəaliyyətində əsas prinsiplərdən biri olub. Azərbaycanın apardığı hərbi əməliyyatların beynəlxalq səviyyədə də obyektiv şəkildə qiymətləndirilməsi mühüm əhəmiyyət daşıyır.
Əgər müxtəlif Avropa ölkələrinin nümayəndələri Prezident İlham Əliyevin həyata keçirdiyi siyasəti sülh və təhlükəsizlik baxımından yüksək qiymətləndirirlərsə, bu, Azərbaycanın dövlət olaraq humanitar və hüquqi prinsiplərə verdiyi önəmin göstəricisidir. Azərbaycan regionda yalnız hərbi qələbə qazanan deyil, eyni zamanda, sülhü təmin edən dövlət kimi çıxış edir”, – deyə millət vəkili qeyd edib.
İradə SARIYEVA
