Afsəddin Nəbiyev: “Paşinyanın Əliyevin dolayısı ilə yararlanmaq istəməsi ehtimalı tamamilə istisna deyil”
Məlum olduğu kimi, Birləşmiş Ərəb Əmirliklərinin paytaxtı Əbu-Dabi şəhərində “Zayed İnsan Qardaşlığı Mükafatı”nın təqdimolunma mərasimi keçirilib. Prezident İlham Əliyev və Ermənistanın baş naziri tədbirdə iştirak ediblər. Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan Prezident İlham Əliyevə və digər laureatlara "Zayed İnsan Qardaşlığı Mükafatı"nı təqdim edib.
Tədbirdə diqqəti çəkən məqam həm də o olub ki, Paşinyan ərəb ölkələri platformasında Prezident İlham Əliyevlə görüşə çox maraqlı və həvəsli yanaşıb. Ola bilərmi Paşinyan Əliyevdən ərəb ölkələri və İsraillə Ermənistanın əməkdaşlıqlarının qurulmasında yardımçı olmasını xahiş etsin? Belə bir ehtimalı ekspertlər necə dəyərləndirir?
Sözügedən məsələni baki-xeber.com-a şərh edən AMİP-in sədr müavini Afsəddin Nəbiyevin fikrincə, son dövrlərdə regionda baş verən siyasi proseslər Ermənistanın xarici siyasətində ciddi bir "manevr" dövrünə qədəm qoyduğunu göstərir: “Ermənistan baş naziri Nikol Paşinyanın ərəb ölkələri platformalarında Prezident İlham Əliyevlə görüşmək həvəsi, bir sülh axtarışı deyil. Bu, həm də İrəvanın regional təcriddən qurtulmaq üçün yeni qapılar döymək cəhdi kimi qiymətləndirilməlidir. Ermənistanın ərəb dünyası və xüsusilə İsrail ilə münasibətləri illərdir ki, durğun və ya problemli müstəvidə qalıb. Azərbaycan isə həm İslam Əməkdaşlıq Təşkilatının nüfuzlu üzvü kimi ərəb ölkələri ilə, həm də strateji tərəfdaş kimi İsrail ilə möhkəm bağlara malikdir. Paşinyan anlayır ki, ərəb dünyasında iqtisadi dividend qazanmaq üçün Bakı ilə olan gərginliyi minimuma endirmək şərtdir. Ermənistanın İsraillə münasibətləri 44 günlük müharibə dövründə ən aşağı nöqtəyə çatmışdı. Paşinyanın bu münasibətləri bərpa etmək üçün Prezident İlham Əliyevin nüfuzundan və "vasitəçilik enerjisindən" dolayısı ilə yararlanmaq istəməsi ehtimalı tamamilə istisna deyil. Lakin bu, rəsmi xahişdən çox, Bakının yaratdığı regional təhlükəsizlik formatına inteqrasiya olmaq cəhdi kimi görünə bilər. Qərbə inteqrasiya və Rusiyadan uzaqlaşma fonunda Paşinyan vaxt qazanmağa çalışır. Sülh gündəmi İrəvan üçün həm də silahlanma və ordunu yenidən qurmaq üçün lazım olan "nəfəslik" rolunu oynaya bilər. Paşinyan dərk edir ki, Azərbaycanın təklif etdiyi 5 əsas prinsip qəbul edilmədən Ermənistanın iqtisadi blokadadan çıxması qeyri-mümkündür”.
A.Nəbiyev onu da qeyd etdi ki, Ermənistanda seçki vaxtı yaxınlaşdıqca Paşinyan ciddi bir dilemma qarşısındadır: “O, həm daxildəki revanşist qüvvələrin "satqın" damğasından qaçmalı, həm də xalqa "rifah və təhlükəsizlik" vəd etməlidir. Paşinyan üçün ən yaxşı seçki strategiyası Ermənistanın sərhədlərinin açılması və iqtisadi canlanmanın başlamasıdır. Bunun yolu isə Bakı ilə imzalanacaq yekun sülh sazişindən keçir. O, "sülh gətirən lider" imicini möhkəmləndirməklə öz elektoratını seçkiyə hazırlayır. Ermənistanın ərəb platformalarına can atması və Bakı ilə təmas axtarışı həm daxili, həm də xarici siyasi ehtiyaclardan doğur. Paşinyanın Prezident İlham Əliyevlə görüşlərdə "regionun açarı" kimi Bakının dəstəyini hiss etməyə çalışması, Azərbaycanın regionda artan dominant rolunun növbəti təsdiqidir. Lakin bu addımların nə dərəcədə səmimi olduğunu yalnız Ermənistanın delimitasiya və demarkasiya prosesindəki real addımları göstərəcək”.
Vidadi ORDAHALLI
