MSK: "Müraciətdə iddia edilən pozuntular hərtərəfli və obyektiv araşdırılaraq…"
Yanvarın 29-da ölkəmizdə keçirilən bələdiyyə seçkilərindən sonra bir neçə məntəqənin nəticələrinin ləğv edildiyi barədə məlumat yayılıb. Mərkəzi Seçki Komissiyasının (MSK) katibi Arifə Muxtarova mətbuata bildirib ki, 81 saylı İmişli seçki dairəsi üzrə 42, 43, 44, 45, 46 saylı məntəqələrdə bələdiyyə seçkiləri üzrə nəticələr ləğv edilib. Həmin seçki məntəqələrində Bəcirəvan bələdiyyəsinə seçkilər keçirilib.
MSK-nın qərarına əsasən, həmin məntəqələrdə seçkinin nəticələri etibarsız hesab edilib.
Maraqlıdır, bu məntəqələrdə səsvermə niyə etibarsız sayılıb? Niyə səslər etibarsız sayılıb? Nə üçün nəticələr ləğv olunub? O məntəqələr üzrə əlavə seçki olacaq, olmayacaq? Onların taleyi necə olacaq? Konkret nə baş verib: yetərsay olmayıb, bülletenlər korlanıb, yoxsa məntəqə üzvləri naşı davranıblar? Səbəb nədən ibarətdir? Məntəqələrdə seçkinin nəticələrinin etibarsız sayılmasına görə məntəqə üzvlərinə, sədrlərə hansısa cəza nəzərdə tutulurmu?
"…Seçkilərin nəticələrinə təsir edə biləcək qanun pozuntuları aşkar edilib"
Suallarımıza cavab almaq üçün MSK-ya sorğu göndərdik. Sorğumuza cavab olaraq MSK-dan bildirildi ki, 81 saylı İmişli seçki dairəsindən
Bəcirəvan bələdiyyəsi üzvlüyünə qeydə alınmış namizədlər Tehmirov Niyaməddin Məmməd oğlu 2025-ci il yanvarın 31-də və Quliyev Barat Əlişirin oğlu 2025-ci il fevralın 1-də MSK-ya müraciət edərək, adıçəkilən seçki dairəsinin həmin bələdiyyəni əhatə edən 42, 43, 44, 45 və 46 saylı seçki məntəqələrində səsvermə günü günün sonunda səsvermənin nəticələrinə dair yekun protokollarının tərtib edilərək təsdiq edilmiş surətinin onlara təqdim edildiyini, ancaq sonradan seçici səslərinin digər qeydə alınmış namizədin xeyrinə saxtalaşdırılaraq az səs toplamış Cəbrayılov Yusif Xalıq oğlunun seçilmiş bələdiyyə üzvü elan edilməsini və seçki qanunvericiliyinin digər ciddi pozuntularına yol verildiyini iddia edərək, bu pozuntuların araşdırılmasını və pozulmuş hüquqlarının bərpa edilməsi üçün müvafiq tədbir görülməsini xahiş ediblər. "Müraciətlər Seçki Məcəlləsinin 112-ci, 112-1-ci maddələrinə uyğun olaraq Mərkəzi Seçki Komissiyasının nəzdində fəaliyyət göstərən ekspert qrupunun üzvləri tərəfindən icraata qəbul edilib və seçki dairəsinin eyni bələdiyyəni əhatə edən məntəqə seçki komissiyalarının fəaliyyəti ilə əlaqədar olduğundan bir icraatda birləşdirilərək araşdırılıb, bu barədə birgə rəy verilib və Komissiyanın iclasında baxılıb.
Araşdırma ilə bağlı müraciət etmiş namizədlərlə əlaqə saxlanılıb, araşdırmada və iclasda iştirak etmək, həmçinin digər hüquqlarının olması izah edilib, araşdırmada və iclasda iştirakları təmin olunub".
MSK-dan bildirildi ki, namizəd N.M.Tehmirov araşdırmaya seçki dairəsinin həmin bələdiyyəni əhatə edən 42, 43, 44, 45 və 46 saylı seçki məntəqələrindən əldə etdiyi səsvermənin nəticələri haqqında məntəqə seçki komissiyasının protokolunun təsdiq edilmiş surətini təqdim edib.
Eyni zamanda namizəd B.Ə.Quliyev müraciətinə 42, 43 və 44 saylı seçki məntəqələrindən əldə etdiyi səsvermənin nəticələri haqqında məntəqə seçki komissiyasının protokolunun təsdiq edilmiş surətini əlavə edib.
"Dairə seçki komissiyasından Bəcirəvan bələdiyyəsini əhatə edən seçki məntəqələri üzrə səsvermənin nəticələri haqqında məntəqə seçki komissiyalarının protokolları alınaraq həmin seçki məntəqələrində təsdiq edilərək namizədə təqdim edilmiş protokolların surətləri ilə müqayisəli şəkildə araşdırılıb.
Müraciətdə iddia edilən pozuntular hərtərəfli və obyektiv araşdırılaraq namizədlər tərəfindən təqdim edilmiş protokolların təsdiq edilmiş surəti ilə dairə seçki komissiyası tərəfindən təqdim edilmiş protokollar və həmin protokollar əsasında Mərkəzi Seçki Komissiyasına daxil olan protokol məlumatlarının müqayisəli təhlili aparılıb və seçki dairəsinin Bəcirəvan bələdiyyəsini əhatə edən 42, 43, 44 və 46 saylı seçki məntəqələrində səsvermənin nəticələrinə dair protokolun tərtib edilməsi zamanı bu və ya digər şəkildə seçkilərin nəticələrinə təsir edə biləcək qanun pozuntuları aşkar edilib. Araşdırma ilə həmin seçki məntəqələrində müəyyən edilmiş qanun pozuntuları seçki qanunvericiliyinin tələblərinə görə seçicilərin iradəsini müəyyənləşdirməyə imkan verməyən hal kimi qiymətləndirildiyindən, qeyd edilən seçki məntəqələri üzrə səsvermənin nəticələrinin etibarsız hesab edilməsi üçün hüquqi əsaslar yaranıb".
Qeyd olundu ki, Seçki Məcəlləsinin 240.2-ci maddəsinə görə, dairə seçki komissiyası və ya MSK bələdiyyə üzrə seçkiləri aşağıdakı hallarda etibarsız sayır: "- 240.2.1. Bələdiyyə üzrə səsvermə zamanı səsvermənin nəticələri etibarsız sayılmış seçki məntəqələrinin sayı həmin bələdiyyənin ərazisində olan seçki məntəqələrinin ümumi sayının 2/5 hissəsindən çoxunu təşkil etdikdə və ya ləğv edildikdə, o şərtlə ki, həmin seçki məntəqələrində seçicilərin sayı bələdiyyə üzrə qeydə alınmış seçicilərin ümumi sayının 1/4-dən çoxunu təşkil etsin.
81 saylı İmişli seçki dairəsi üzrə Bəcirəvan bələdiyyəsinin ərazisində 5 seçki məntəqəsi fəaliyyət göstərir və həmin seçki məntəqələri üzrə 3494 seçici qeydə alınıb. Səsvermənin nəticələri etibarsız hesab edilən seçki məntəqələri üzrə isə 2727 seçici qeydə alınıb.
Bəcirəvan bələdiyyəsi üzrə səsvermənin nəticələri etibarsız hesab edilən seçki məntəqələrinin sayı seçki dairəsi üzrə həmin bələdiyyəni əhatə edən seçki məntəqələrinin ümumi sayının 2/5 hissəsindən çoxunu, həmin seçki məntəqələrində qeydə alınan seçicilərin sayı isə həmin bələdiyyə üzrə qeydə alınan seçicilərin ümumi sayının 1/4-dən çoxunu təşkil etdiyindən, bələdiyyə üzrə seçkilərin nəticələrinin etibarsız sayılması üçün hüquqi əsaslar yaranıb".
MSK 81 saylı İmişli seçki dairəsindən Bəcirəvan bələdiyyəsinə qeydə alınan namizədlər N.M.Tehmirovun və B.Ə.Quliyevin müraciətləri təmin edilməli, həmin seçki dairəsinin qeyd edilən bələdiyyəni əhatə edən 42, 43, 44 və 46 saylı seçki məntəqələri üzrə səsvermənin nəticələri etibarsız hesab olunmalı, Bəcirəvan bələdiyyəsi üzrə seçkilərin nəticələri etibarsız sayılmalı olduğu barədə qərar qəbul edib. MSK-nın Seçki Məcəlləsinin 19.4-cü, 19.14-cü, 28.2-ci, 112-ci, 112-1-ci, 240-cı maddələrinə əsasən qəbul etdiyi qərara görə, 81 saylı İmişli seçki dairəsindən Bəcirəvan bələdiyyəsinə qeydə alınan namizədlər Tehmirov Niyaməddin Məmməd oğlunun və Quliyev Barat Əlişirin oğlunun müraciəti təmin olunub, seçki dairəsinin həmin bələdiyyəni əhatə edən 42, 43, 44 və 46 saylı seçki məntəqələri üzrə səsvermənin nəticələri və eyni zamanda Bəcirəvan bələdiyyəsinə keçirilmiş bələdiyyə seçkiləri etibarsız hesab edilib.
İradə SARIYEVA
