Mətin Məmmədli: "Bayden adminstrasiyası ölkəmizə qarşı qərəzli mövqe nümayiş etdirməklə, mütəmadi olaraq iki ölkə arasında problemlərin yaranmasına səbəb olur"
Məlum olduğu kimi, ABŞ-ın Azərbaycandakı səfirliyinin "X" hesabında ölkəmizə qarşı əsassız ittiham yer alıb. Səfirliyin paylaşımına Azərbaycan Xarici İşlər Nazirliyi öz növbəsində cavab verib.
XİN-in mətbuat katibi Ayxan Hacızadə "X" səhifəsində ABŞ-nin Azərbaycandakı səfirliyinin paylaşımına cavabında bildirib: "Özünü söz azadlığının müdafiəçisi kimi göstərən ABŞ-nin media azadlığına dözümsüzlüyü heyrət doğurur.
Bir sözlə, bütün bunları və ABŞ-nin Bakıdakı səfirliyinin əvvəlki təxribat xarakterli şərhlərini nəzərə alsaq, özünü söz azadlığının müdafiəçisi kimi göstərən ABŞ-nin media azadlığına dözümsüzlüyü heyrət doğurur.
Görünən odur ki, ABŞ-nin indiki administrasiyası xəyali və mifik iddialar üzərində dayanaraq, xarici əlaqələrinə, xüsusən də Azərbaycanla münasibətlərinə xələl gətirmək üçün əlindən gələni edir".
Ümumiyyətlə, Bayden administrasiyası gediş ərəfəsində qəsdən Azərbaycanla münasibətləri, vəziyyəti korlamaq, pozmaq istəyir. Xüsusən də emosional ifadələr-filan işlədilir. Elə bil ki, doğrudan da, gediş ərəfəsində Azərbaycanla bütün münasibətləri pozub getmək istəyir. Bayden administrasiyası niyə belə edir? Trampa daha pis miras qoyub getmək istəyir? Trampın da Azərbaycanla münasibətlərinin gərgin olması üçün baza yaradır? Bayden adminsitasiyası Azərbaycanla münasibətləri niytə belə korlamaq istəyir?
"Bayden ABŞ-Azərbaycan münasibətləri baxımından öz xələfinə də ağır "miras" qoyub gedir"
Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli "Bakı-Xəbər"ə şərhində bildirdi ki, son illərdə ABŞ-Azərbaycan münasibətlərində ciddi problemlərin meydana çıxması müşahidə olunur: "Bu problemin ortaya çıxması məhz ABŞ-ın regional siyasəti, konkret olaraq Azərbaycanla münasibətləri ilə bağlıdır. Xüsusilə də, bizi qane etməyən Birləşmiş Ştatların son illərdə Ermənistan mərkəzli bir siyasət yürütməsi, postmünaqişə problemlərinə qərzəli, ədalətsiz yanaşmasıdır. Bu yanaşmanı da Azərbaycan haqlı olaraq qəbul etmir və daim tənqid edir. Nəticədə də iki ölkə arasında mütəmadi problemlər çıxır. Nəyə görə Bayden administrasiyası regional siyasətdə belə bir mövqe nümayiş etdirir. Düşünürəm ki, Bayden adminstarsiyasının bu qərəzli mövqeyinin bir çox səbəbləri var. Ancaq əsas səbəblərdən biri də geosiyasi amillə əlaqəlidir. Yəni görünən odur ki, Bayden adminstasiyası, ABŞ Azərbaycanın müstəqil xarici siyasət kursunu qəbul etməkdə çətinlik çəkir, yaxud İkinci Qarabağ müharibəsindən sonra regionda formalaşan yeni geosiyasi reallıqları qəbul edə bilmir. Bunlar səbəblərdir".
M.Məmmədlinin sözlərinə görə, təbii ki, burda digər səbəblər də var, daxili səbəblər, erməni diasporunun təsirləri mövcuddur və sair. "Əslində, təəssüf ki, Birləşmiş Ştatlarla Azərbaycan arasında belə bir böhran dövrünə daxil olmuşuq. Yəni bu istiqamətdə böhran müşahidə edilir. Son zamanlarda Birləşmiş Ştatların Azərbaycandakı səfirliyinin verdiyi açıqlamalar bu böhranı daha da dərinləşdirir. Hər halda düşünmürəm ki, Azərbaycan ABŞ-la münasibətlərdə ciddi problemlərin və böhranın yaranmasında maraqlıdır. Azərbaycan bunda maraqlı deyil. Azərbaycan öz xarici siyasətində hər zaman Birləşmiş Ştatlarla münasibətlərə xüsusi yer verib. Biz bir çox vacib sahələr-siyasi, enerji, təhlükəsizlik və sair sahələr üzrə əməkdaşlıq, tərəfdaşlıq münasibətlərini formalaşdırmışıq. Bu münasibətlərin bundan sonra da davam etdirilməsində və dərinləşdirilməsində biz maraqlıyıq. Amma görünür ki, Bayden adminstrasiyası ölkəmizə qarşı qərəzli mövqe nümayiş etdirməklə mütəmadi olaraq iki ölkə arasında problemlərin yaranmasına səbəb olur. Məlumdur ki, Bayden adminstrasiyası hakimiyyətdə, iqtidarda son günlərini yaşayır. Bir neçə gündən sonra artıq yeni adminstrasiya - Tramp adminstrasiyası hakimiyyət başına gələcək. Görünən odur ki, Bayden adminstrasiyası artıq hakimiyyətinin son günlərində Azərbaycanla bağlı qarşı belə məsuliyyətdən kənar bir mövqe nümayiş etdirir. Eyni zamanda Bayden ABŞ-Azərbaycan münasibətləri baxımından öz xələfinə də ağır "miras" qoyub gedir. Hər halda, biz çox istərdik, gözləntimiz də vardı ki, Tramp administrasiyası, sələfindən fərqli olaraq, Azərbaycanla münasibətlərə yeni baxış nümayiş etdirəcək, regionda daha rasional, daha praqmatik siyasət yürüdəcək, iki ölkə arasında münasibətləri ən azından əvvəlki səviyyəyə qaytarmaq mümkün olacaq. Təbii ki, bu bizim gözləntilərimizdir və gözləntilərin nə dərəcədə özünü doğrudacağı ilk növbədə Tramp administrasiyasının atacağı addımlardan asılı olacaq"-deyə M.Məmmədli bildirdi.
İradə SARIYEVA
