Sədrəddin Soltan: "Bu ölkələrin sənədə qarşı çıxmasının səbəbi qətnaməni Rusiyanın hazırlamasıdır"
BMT Baş Assambleyası "Nasizmin, neonasizmin və irqçiliyin müasir formalarının, irqi ayrıseçkiliyin, ksenofobiyanın və bununla bağlı dözümsüzlüyün genişlənməsinə kömək edən digər təcrübələrin tərənnümünə qarşı mübarizə" adlı qətnamənin lehinə səs verib.
Məlumat üçün bildirək ki, sənədi 119 ölkə dəstəkləyib, 53 ölkə əleyhinə səs verib, 10 ölkə bitərəf qalıb. Əleyhinə səs verənlər arasında Almaniya, İtaliya, Kanada, ABŞ, Ukrayna və Yaponiya da var.
Maraqlıdır, adıçəkilən dövlətlər niyə qətnamənin əleyhinə səs veriblər?
"Qeyd edilən ölkələr sənədin mahiyyətinə deyil, qətnaməni tərtib edən ölkələrə etiraz ediblər"
"Orta Doğu" Araşdırmalar Mərkəzinin rəhbəri, siyasi şərhçi Sədrəddin Soltan "Bakı-Xəbər"ə açıqlamasında qeyd etdi ki, "Nasizmin, neonasizmin və irqçiliyin müasir formalarının, irqi ayrıseçkiliyin, ksenofobiyanın və bununla bağlı dözümsüzlüyün genişlənməsinə kömək edən digər təcrübələrin tərənnümünə qarşı mübarizə" adlı qətnamə çox təsirli və mütərəqqidir. Bəzi ölkələr bu qətnaməyə qarşı çıxıb: "Əleyhinə səs verənlər arasında Almaniya, İtaliya, Kanada, ABŞ, Ukrayna və Yaponiya var. Bu ölkələr sənədə deyil, qətnaməni hazırlayan ölkələrə qarşı çıxır. Məlumat üçün bildirim ki, bu qətnaməni Rusiya və Türkmənistan hazırlayıb. Qarşı çıxan ölkələr hesab edir ki, Rusiyada nasizm, neonasizm və irqçilik müşahidə olunur. Belə ki, Rusiyanın Ukrayna ilə müharibə aparması bunu təsdiq edir. Bu səbəbdən də qətnamənin əleyhinə səs verən ölkələrin təmsilçiləri nasizmi, neonasizmi və irqçiliyi tənqid edir. Qeyd edilən ölkələr sənədin mahiyyətinə deyil, qətnaməni tərtib edən ölkələrə etiraz ediblər".
Həmsöhbətimiz onu da əlavə etdi ki, Almaniya, Yaponiya, Ukrayna və İtaliya faşizm və neonasizmdən əziyyət çəkib. Bu ölkələr Birinci Dünya müharibəsində faşizm və neonasizmdən əziyyət çəkib. Kanada faşizmə və neosizmə qarşı mübarizə aparıb. Zaman-zaman ABŞ-da neonasizmə meyl yaranıb, irqçilik tüğyan edib və bunun böyük fəsadları olub. ABŞ irqçilikdən əziyyən çəkən və bezən bir dövlətdir. Bu səbəbdən də qeyd edilən ölkələrin qətnaməyə qarşı çıxması üçün ciddi əsasları yoxdur: "Bu ölkələrin sənədə qarşı çıxmasının səbəbi qətnaməni Rusiyanın hazırlamasıdır".
Günel CƏLİLOVA
