Məsələn, bizim Prezident müsahibədə ATƏT-in Minsk Qrupunun birgə bəyanatla buraxılmasını təklif etdi. Belə əsaslandırır ki, MQ "DQ" münaqişəsinin həlli üçün yaradılmışdısa, münaqişə artıq həll olunubsa, o zaman belə lüzumsuz qurumu saxlamağın nə mənası var?! Məntiqli əsaslandırmadır... Normalda bunun əleyhinə əsaslı bir şey göstərmək mümkün deyil...
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Ancaq Paşinyan "əsaslı şey" tapıb. İlham Əliyevdən sonra o da öz medialarına tələsik müsahibə verib.
O deyir – "Əlbəttə, İlham Əliyev "konstruktiv" danışır (konstruktiv sözünü dırnaqda deyir). Həqiqətən də münaqişə bitibsə, MQ-yə nə ehtiyac var? Ancaq münaqişə bitib? Azərbaycan Qərbi Azərbaycan mövzusunu bizə qarşı ərazi iddiası kimi hazırlayıb. Azərbaycan bizi inandırsın ki, Qərbi Azərbaycan mövzusu ərazi iddiası deyil və Azərbaycan əgər Qərbi Azərbaycan deyəndə Tovuzu, Qazaxı, Astaranı, Kəlbəcəri, Laçını, Qubadlını nəzərdə tutursa, bu yerlərə insanların qayıtması Azərbaycanın daxili işi olur və əlbəttə, biz buna müdaxilə etmərik".
Paşinyanın məntiqinə görə, Azərbaycan Qərbi Azərbaycan mövzusunun ərazi iddiası olmadığına Ermənistanı inandırmaq üçün bəyan etməlidir ki, bu ad altında Ermənistanın indiki ərazilərini yox, Tovuzdan Qubadlıya qədər olan əraziləri nəzərdə tutur... Gülməli deyilmi?...
Prezident İlham Əliyev dedi ki, Ermənistan Konstitusiyasını dəyişməlidir, çünki Azərbaycana qarşı ərazi iddiaları var. Tam əsaslı mövqedir. Çünki Ermənistan Konstitusiyasının preambulasında 1990-cı ilin 23 avqust tarixli Ermənistanın Müstəqillik aktına istinad var və həmin bəyannamədə Dağlıq Qarabağın Ermənistana birləşdirilməsi barədə Ermənistan Ali Sovetinin 1989-cu il 1 dekabr tarixli qərarına istinad olunur. Bu istinad ən azı Dağlıq Qarabağa ərazi iddiası deyilmi?..
İndi görün Paşinyan tələsik müsahibəsində buna necə cavab verməyə çalışır.
Deyir – Konstitusiyanın preambulasında Müstəqillik bəyannaməsinə istinad bu bəyannamənin o cümlələrinə aiddir ki, həmin cümlələr Konstitusiyada ayrıca maddələr şəklində göstərilib. Yəni Konstitusiyanın əsas hissəsinin heç bir maddəsində Dağlıq Qarabağ sözü olmadığı üçün Azərbaycana qarşı ərazi iddiası da demək yoxdur...
O zaman biz Azərbaycan olaraq Paşinyandan sual edirik ki, konstitusiyanı dəyişərək o preambulanı niyə Konstitusiyadan çıxarmırsınız və ümumiyyətlə Müstəqillik bəyannaməsini referendumla niyə ləğv etmirsiniz???
Sonra, deyir – "Konstitusiyada ərazi iddiası, yəni Qarabağ iddiası varsa, o zaman biz Qarabağdan gəlmiş adamlara qaçqın statusunu necə verə bilərdik?!"
Biz Azərbaycan olaraq Paşinyana deyirik ki, siz Qarabağdan gəlmiş ermənilərə hər cür ad qoya bilərsiz, onlara hətta Makron, Vardanyan, Xoren, Maksim Qorkinin məşhur frazası ilə "armyaşki" və sair adlar deyə bilərsiniz. Bu adların nə olmasının ərazi iddiasına nə dəxli var???
Sonra, deyir – "Əgər bizim konstitusiyada Azərbaycana qarşı ərazi iddiası varsa, 1995-ci ildə Ermənistanın konstitusiya referendumunda Dağlıq Qarabağ niyə iştirak etmədi?..."
Onun bu sonuncu mülahizəsinə sadəcə belə deyib üstündən keçə bilərik ki, 1995-ci ildə siz hər şey edirdiniz, istəyəndə heç nə etmirdiniz, özünüzü hakimi-işğalçı kimi aparırdınız, taa o vaxta qədər ki, 2020-ci ildə burnunuz əzildi.
Ancaq İlham Əliyevin əsaslı mülahizələrinə Paşinyanın bu "dahiyanə " cavablarını 2500 il əvvələ aid qədim Yunanıstanda "mənasız müdriklik elmi" adlandırılan "sofistika" ilə müqayisə edirəm. Bu elmin nə elm olduğunu bir sadə misalla izah edim.
Sofist alim bir adamdan soruşur: "Bir nəfərə camaat demək olar?"
Cavab: "Əlbəttə yox, bir nəfər necə camaat adlana bilər?!"
"Bəs 2 nəfərə camaat demək olar?"
Cavab: "Əlbəttə yox!"…
Yalançı alim bu minvalla hesabı hər dəfə bir-bir qaldırır. Nəhayət, məsələn, 500-ə gəlib çatanda "buna necə, camaat demək olar" deyə yenə soruşur. Çarəsiz adam yerə-göyə baxıb təsdiqləyir ki, bəli, bu sayda insanlara camaat demək olar. Yalançı alim dərhal çarəsiz insanın üstünə şığıyır - Bəs necə olur ki, hansısa 1 rəqəminin hesabına çoxalan topluma camaat deyirsən, ancaq tək 1 adama camaat demirsən?!"...
Tamaşaya toplaşmış yüzlərlə, minlərlə adam bu yerdə yalançı alimi gurultulu alqışlara qərq edirdilər... Hətta bəzən elə olurdu ki, nadan kütlə bu yalançı "sofistləri" Aristotel, Demokrit, Epikur, Platon və sair kimi əsil və dahi filosoflardan üstün tuturdular....
Ancaq Paşinyanın bədbəxtliyindən indi daha "sofistika" ilə heç kim məşğul olmur…
Gördünüzmü, "mənasız müdriklik elmi" nə deməkdir?
Paşinyan əsil "mənasız müdriklik elmi" ilə - "sofistika" ilə məşğuldur... Vəssalam...
Tahir TAĞIYEV
